Indian football ropuina liam puitu Rahim
Ziaktu : John Zothansanga
September 3, 1962 zan a ni a, Jakarta kawtthlerah Indian coach ropui pakhat, a hming dai tawh ngai lo tur Syed Abdul Rahim chuan mei a zu hlat hlat a, cancer natna vei mek ni mah se zial a thlah thei tlat lo.
Rahim hian Asian Games football final-ah India a hruai thleng a, a tuk lawka South Korea nena final khel tur an ni. A tuk lawka final khel tur ni mah se an helhhawlh luatah an mu thei lo a ni ber a, an lengkhawthawng a ni.
Indian footballer ropui ber ber, Tottenham Hotspur sawmna hnartu Chuni Goswami, Asian All Star Football Team captain ni thei Jarnail Singh, kum 1958-a Asia keeper țha bera thlan Peter Thangaraj leh FIFA chawimawina sang ber FIFA Oder of Merit dawngtu P. K. Banerjee te nen an titi a.
Rahim hian thu tam a sawi lo – a player ropuite chu an mitah tak a en a, “Naktukah thil pek pakhat min pe ula ka duh a, chu chu gold medal a ni,” tiin a chah.
A tuk khua a lo var a, South Korea nen mipui nuai khat chuang hmaah final an khel teh reng a nih kha – hetihlai hian Asian Games leh Olympic football te hi Asian Cup leh World Cup te aiin an dah sang zawk.
Men in Blue tan P. K. Banerjee leh Jarnail Singh-ten goal khat ve ve an khung a, 2-1 in an chak a, India an champion. Mahse, hemi hnuah hian India-in hlawhtlinna liantham sawi tur a nei leh tawh lo.
A chhan maw? June 11, 1963 khan Rahim a thi a, a hmun ruak hnawh khat thei coach India-in a hmu leh tawh lo. Indian coach ropui hnuaia khel țhin Franco Fortunato chuan, “Indian football ropuina chu thlanmualah a liampui a ni,” tiin Rahim a chungchang a sawi a, a dikzia inhrilh nawn kan ngai lo.
