Maradona’n City ring mahse Mancini a sawisel : Khawvela football khel tawh zinga lar ber pawl Diego Maradona chuan Manchester City chu Premier League-ah an champion theih a rin thu a sawi a. Chutih rual chuan manager Roberto Mancini chu a huaisen tawk lo niin a hriat thu a sawi thung.

Maradona hian City hmatawng, a makpa (a fanua pasal) Sergio Aguero te tlawhin tunah hian England-ah a cham mek a. Sap chanchinbuten an kawmnaah he thu hi sawiin, “Manchester City hi an champion theih ka ring a, mahse Mancini hi, a player neihte en hi chuan a huaisen tawk lovin ka hria. A inveng (defensive) lutuk a, Italian a nih vang pawh a ni maithei. Manchester United hi an tangrual tha a, an khelhdan pawh hi a hmuhnawm ka ti. Mahse club pakhat chauh tan tur ni ila chuan ka makpa khelhna hi ka tan ber ang,” a ti bawk.

Maradona chuan Aguero chu Atletico Madrid-ah khel zel se a duh tih a sawi a, “Madrid-ah khan awm zel se a inkhel pawh a hmuhnawm ka ring zawk a, mahse City sawmna hi hnar phal chi a ni lova. Bakah, tunah chuan khawvela team tha ber zingah a khel ta a ni,” a ti bawk.

Maradona sawi ang hian tun hnaiah City hi an defensive riau a. Season tir lamah khan an khel ropui thei hle a. Game 11 ah goal 39 khungin, point 33 hmuh theihah khan vawikhat chiah draw neiin, point 31 an hmu a. Mahse a hnu match 11-ah goal 16 chiah an khung a, point 11 lai an hloh thung a ni.

West Ham-in Torres an duh!: Pound maktaduai 50 man a ni a, mahse tunah chuan Championship club West Ham-in an duh thu an sawi ngam tawh! Hei hian Liverpool hmatawng hlauhawm thin Torres-a chet chhiatzia a hril chiang hle awm e!

Premier League atanga tla thla, tuna Championship lama che tha ber zinga mi West Ham chuan Chelsea hnenah Torres hi loan-a lakluh tum thum lai an dil tawh tih sawiin, ‘An la phal chiah lo,’ an ti a. An la beidawn loh thu an sawi zui!

Field chhungah darkar 21 chhung teh meuh mai Chelsea striker Torres hian goal khung lovin a tal vel tawh a. West Ham neitu pakhat zawk David Sullivan chuan loan-a lakluh an tum thu a sawi ngam ta tlat mai!

Sullivan chuan, “Premier League-ah goal a khung thei si lova, kan hnenah thla khat vel rawn awm se, goal a khung leh thei maiin kan ring a, mahse tun dinhmunah chuan loan-a chhuahtir hi Chelsea-in an phal rih lo a ni,” a ti a. “Rei lote chauh hawh turin kan dil,” a ti bawk!

Hetih lai hian West Ham hian Manchester City player talhial Carlos Tevez pawh loan-a lakluh an tum a, City hian an phal lo tih an sawi a. Kan hriat angin West Ham hi England-a Tevez-a laluttu leh khawvel hriata tilartu an ni.

Arsenal tan Champions League khelh Trophy a ni mai!: Arsenal manager Arsene Wenger chuan Premier League-ah 4-na niin, Champions League an khelh phak chuan trophy la tlukah an inngai ang tih a sawi! A va chauhthubarawh ta ve!

Kum 2005 atang khan Arsenal hian eng trophy mah an la chawi leh lova. Kuminah pawh Champions League atangin an tla a ni thawthang tawh a, FA Cup leh Carling Cup atangin an tla tawh bawk si a. A zawna season 7 nan trophy la lovin season an hmang tluan leh dawn a ang hle tawh a ni.

Hetiang a nih vang nge, a lawm tawk tak tak tih hriat lohvin Wenger chuan, “Kan trophy hmasa ber tur chu Premier League-ah top 4 a awm a ni a, chu chu kan la ti thei a ni,” a ti a. “Sunderland kan hneh loh chhan chu Milan nen kan inkhelh avanga kan chauh vang a ni,” a ti bawk.

Watford-ah Kuszczak:  Manchester United goalkeeper Tomasz Kuszczak chu Watford chuan emergency-in tun season chhung atan loan-in an la.

Championship club Watford hian tun hma pawhin United goalkeeper Ben Foster an lo hawh tawh a, United nen hian an inbe chhe lem lova. Season nga leh a chanve lai United tana khel tawh Kuszczak hian Watford-ah hian number 35 a ha dawn a, nimin khan an inhawhna hi an ziak fel a ni.

Mourinho a tha ber – Maradona: Argentina mihrang hlui, Dubai club Al Wasl coach ni mek Diego Maradona chuan Real Madrid Coach Jose Mourinho chu khawvela coach tha ber a nih thu a sawi a, Barcelona coach Pep Guardiola pawh tha a tih thu sawi mahse, Portuguese thluak tha Mourinho hi coach dang zawng zawng aia danglam bik a nih thu a sawi a ni.

Maradona chuan, “Mourinho hi ka ngaisang tawp. A mihring mihrinna, trainer leh coach a nihna leh mihring enkawl a thiamnaah hian ka ngaisang. Coach tha ber niin ka hria. Ani hi chuan engmahlo atanga engemaw siam hi a thiam a, mi danglam bik a ni,” a ti.

Guardiola chungchang sawiin, “Pep hi ka hre chiang hle a, ani pawh hi mi tha leh ropui tak a ni. Mahse player tha ber ber a kawl a, result pawh tha tak tak a nei. A la naupang a, hmingthannain a la bawm zel ngei ang,” a ti.

Maradona chuan Barcelona goalkeeper Victor Valdes chu thiam a ti lo hle a. “A hmaah player tha ber ber an awm a, chuvangin a lang chhe lo mai mai a ni, he pa hi chu a tha thlawt lo,” a ti hmiah mai!