KULH BANG MAN TO LEH GUARDIOLA – Zosangliana Khawlhring

Manchester City chu an player neihsa parukte chuan club dangah an insawn san tawh a, player pahnih dang pawh contract neih lai chu an tihtawp sak bawk. Chung player chhuak ta pariat te zing a paruk chu goalkeeper leh defender te an ni. Kolarov, Clichy, Caballero, Zabaleta, Joe Hart leh Sagna te an ni.
.
Guardiola in a sawi tawh angin, Man City chuan siamthar lehna ropui an kal pui mek a, mak deuh mai chu team kulhpui bang lam atangin a tan mek a ni. Kulh dinglai chu a thiat a, a aia nghet zawk kulhpui ban tur a phun leh mek a ni. Khawvela goalkeeper man to ber Ederson a la lut a, Walker, Danilo, Mendy te lalut lehin khawvela defender man to ber berte nen an kat nuk ta mai. Pound million 170 chuang team dinthat nan an hmang tawh a, an la duh tawk mai dawn in a lang lo. Chuvangin enge lo thleng leh dawn tih sawi lawk a har a, mahse, defence line a thuam that hle dan te hi thil ngaihven tham chu a tling tawh tho a ni.
.
Nikum season ah Man City hian manager atan Guardiola hi an la lut a, pound million 170 chuang sengin player tha a khawn khawm a, position tin thuam tha mah se a sum hman tamna ber erawh defender John Stones niin pound 47.5 million sengin a lalut. A duhzawng, a rin ngam Bercelona atangin Bravo a hruai lut a, EPL match 38-ah goal 39 lai a chhuah avangin lungawina tur a awm lo. UEFA Champions League-ah a lungawi thlak loh leh zual a, group match ruk ah goal 10 a chhuah a, Round of 16-ah Monaco lakah goal 6 a chhuah leh a, hma takah tournament a chhuah san. An result en hian season thar atan inbuatsaih dan tur a hrilh lawk nasa hle a ni. Defender inngahna captain Kompany a inhliam reng a, hei hi an buaina ti belh chhahtu a ni. English media ten team thatna tur a nih chuan sum lamah tiam chin awm loin hman an phal tih an ziah lan angin kum hnih chhungin pound million 370 vel chu an hmang ral tawh a ni.
.
Tunlai chhanah EPL level ah chuan sum hman tam lam an inel emaw tihna hmun a ni a, thil mak vak pawh a ni lo. Mahse, champion tura chung lam atanga nawrna chu a na ve tulh tulh dawn tih erawh kan hre tlang vek awm e. Barcelona, Bayern Munchen a enkawl laiin Guardiola hian hetiang zat sum hman tur a nei bik ngai lo. Barcelona season 4, Bayern Munchen season 3 chhungin pound million 430 vel chiah a hmanga, chu pawh player to tak taka hralh chhuah a neih nual avangin sum hmang tam lo ve tak a ni thin. Man City ah chuan player hralh nan pound million 30 vel chiah a la lalut a, a hman chhuah leh a lakluh chu inthlau ve tak a ni. A team enkawl hmasa zawkah chuan team siamthat nan attacker lam deuh zel a la lut a, Man City ah chuan defender man ah sum a seng hnem ber a ni. Barcelona ah Ibrahimovic, Bayern Munchen ah Gozet te hi a sum seng hnemna a ni a, Man City ah chuan defender ten club record an khum zak zak a ni.
.
Man City hian manager tha ruaiin team tha an nih theih nan sum tam tak an seng fo tawh a, season khat chhungin EPL team hlauhawm an ni nghal tawh a, mahse club neitu te lam atang chuan duhkhawp lohna a la sang hle a, EPL mai ni lo, UEFA hnuai a team hlauhawm nih pha hi an tumber a ni.( UEFA club thaber chu FIFA hnuai a club thaber ang tho a ni) Chuvangin Guardiola nen thawh hona an ziah hnuah a hma coach pahnih te player lak sa chu dim lo takin an thehchhuak zung zung nghal a, Mancini lak player te phei chu awm tawh lo ang ani. Manuel Pellegrini lak khawl sa player man to rual, De Bruyne, Sterling, Otamendi, Mangala tih vel chauh an bang tawh a, mak tak maiin player man to rual ho hi Guardiola hian a hralh tum zingah an tel lova, player man to ho hi player tha ah a ngai ve hrim hrim nge, team man to ber nih a tum hrim hrim zawk? Player man to u chuak ho hi player chhe tak erawh an ni bik ngai lova, player tha nei tur chuan man to tak tak a, lak khawm chu a ngai a ni tih kan hre tlang vek awm e.
.
A pawimawh ta ber zawk chu player tha chu team in a mamawh a, chuvangin sum tam zawk a lei khawm a ngai a, a hmun diktak leh a hun dik tak a remkhawm thiam erawh a ngai a ni. Guardiola chuan kum thum tal hman theih tur player te hi ka duhsak bik a ni a ti. Kum 30 chunglam tan hmun a awm ta meuh lo tihna ang ani a, Man City chuan EPL atan short time policies kan hmang tawh a, Long time policies lam kan hawi tawh dawn a ni tihin media te a hrilh. Hei erawh kan la nghah ve deuh a ngai dawn a ni. Tunah chuan Guardiola hian eng vanga defensive lam ngai pawimawh ta viau nge a nih tih erawh thil ngaihtuah tham ani. EPl season khat a hmang zo a, EPL ziarang a hre ve tan nge, Barcelona leh Bayern Munchen anga leauge thunun theih a nih loh vang nge? a hma team leh tuna Man City team, A hma league leh EPL danglam tih chu a hriat vek a, a hma in sum hmantur nei reng chungin Barcelona tan champion chuhpui thei Real Madrid chauh leh, Bayern Munchen ah BVB deuh chauh champion chuhpui thei tur an awm vangin champion tur a, an kalkawngah harsatna lian tham tawng loin kum 7 chhung hun a lo hmang thin.
.
Team elpui tur tam tham an awm loh vangin game a thunun hneh thin hle a, defensive lam thuam belh vak lo pawhin harsatna lian sawitur a nei lo. EPl ah chuan thil engkim a danglam tawh a, kei ka ni ti thei club 5/6 vel an awm reng a, team te a ngaihin barakhaih zeuh zeuh an lo ching bawk nen, tunlai chhanah tactic tam tak leh formation thlirin defensive game khel thei zawk ten hlawhtlinna an chan ngun zawk fo avangin a thil tih te hi a dik tihin kan pawmpui mai dawn em ni? Guardiola thil tih hi a dik leh dik lo chu rei lo teah a lang nghal dawn a, a beisei angin a hlawh tlinpui a ngem? Mahse season thar lo amw turah EPL champion tur a rin kaiber chu Man City an ni leh tho a, an rin lawk ang ngein pound million 300 man vel defender te hian enge min hmuh tir dawn tih chu i lo thlir phawt teh ang.

Posted in Analysis, Articles.

Leave a Reply

Or