LAL THAR LO PIANG CHU

#ZoFooty

Pianna hmun tlawm-
Lancashire and Yorkshire Railway hnuaia Carriage and Wagon department (bungraw phurh lam buapuitu) chuan Football Club din ve an chak a, sum lamah pachhe viau mah se, an Company-a Department dang leh Railway Company dangte hmachhawn tur tawk vel chuan an kal chhoh ve theih an beisei a, kum 1878 khan Newton Heath LYR Football Club an din ta a ni.

Mumal taka chhinchhiah china an Game hmasa ber chu November 20, 1880 khan an khel a, Railway Company Colour ‘a hring leh rangkachak rawnga’ inthuam chungin Bolton Wanderers Reserve Team an hmachhawn a, Goal 6 an chhuah a, an khung ve lo!

Kum 1888-ah League pakhat, ‘The Combination’-ah an inziak lut a; mahse, he League hi kum khat lek hnuah a tawp. League dang ‘Football Alliance’ an zawm leh a, he League-a Season thum an khelh hnuah, Football Alliance chu Football League First Division nen chhun fin a ni a, Alliance League kheltute chuan First Division League an khel chhunzawm a, an zingah Newton Heath pawh an tel.

Retheihna ngamtu-
Rel kawnga hna thawk, rethei tete ten an din Newton Heath chu sum lamah a tal buai ta thuai reng a, kum 1902 khan leiba £2,670 (kumina a hlutna £290,000 vel) zet an nei a, Second Division-ah an tla thla leh bawk nen, an buai hle. Thuneitu lamin mahni inenkawl zo lo, Club hlawhchhamah ngaiin, tih tawp tumin hma an lo la ve mek bawk. Mahse, beidawnga indawm kun mai lovin an Captain Harry Stafford chuan tanpuina dilin sumdawng pali a be kual a, a buai hle.

Chutianga a dawr kual zinga mi pakhat, John Henry Davies chuan £500 a lo Invest hlauh mai a, an leiba rulhna daih lo mah se, chu pawisa tlemte leh hmun dang atanga tlem tlem an hmuh te chuan chu Club chu a tinung leh ta hram a. John Henry Davies pawh Club President ni zuiin, rethei tak chunga Newton Heath Club neitute leh Player te tanrualna a hmuh chuan a rilruah hming thar a lo awm a, hemi kum (1902) hian Manchester United tiin a hming a thlak ta a ni

Hmatiang sawnin-
Thawhrimna leh inpekna sang tak nen theihtawpin an bei a, Manchester United tih hming a put atanga kum 5-na, 1906-07 ah Division I-ah an inhlang kai leh a, 1907-08 Season-ah an Champion zui. Tlak hniam zeuh zeuh chang nei mah se hma lam pan zelin, Division I-ah hian vawi 7 an Champion hman.

Thawnthu hlui an chang-
Hma sawn tia sawi theih an nih laiin, First Division-a an Champion hnuhnun ber chu 1966-67 a ni a, kum 1986 ah chuan an vanglai nite chu ‘thawnthu hlui’ an chang tan. Insiam that duhna lian tak lo piangin, kum 1986-ah Scottish pachal Alexander Chapman Ferguson (a hnua Sir ni ta) chu Manager atan an la lut. Mahse, beisei an pha lo. Lehlamah, an khaw bul lawk (mel 34)-a an hmelma, Liverpool-in no mawi an chawi chho zawt zawt a, no mawi an chawi apianga auh el nuam an tih ber chu Manchester United an la ni zui! Manchester United fans ten ning hluah hluah mah se, an Champion thei chuang si lo va, Liverpool an haw hlur tawh a ni ber!

Mahse, a tir atanga harsatna lianpui paltlangtu Manchester United an beidawng lo va, beiseina sang tak nena an lak luh Sir Alex-a chu ban duh mai lovin, dawh thei takin an nghak a. Fans lam pawh beidawnga indawm kun mai lovin, kum 1983-a tlangzarh ‘Glory Glory Manchester United’ tih hla nen, an ropuina ni tur beiseinain an thlir thin.

Lal thar a piang e-
Tichuan, kum 1992-ah Premier League a lo piang a, chu League thar chuan ‘lal thar’ a rawn chhawm a, chu ‘lal thar’ chu Manchester United a ni. Kum 6 liamta chhung khan, dawhthei taka an nghah Sir Alex-a chuan a duh ang takin Man Utd chu a lo siamrem a, ‘Old Trafford’ chu Sakeibaknei puk angah a chhuah a, Premier League Season hmasa berah Champion pui nghalin, an hawi kir ta lo! ‘A pianna tlawm mah se, ka Chhandamtu a ni’ tih hla ang deuh khan, an pianna tlawm mah se, Sir Alex-a Man Utd kher kha chu Premier League King an ni ber e.

A tawi zawngin – An Champion chhunzawm zel a, an Champion apiangin Liverpool an awhfik let ve thei ta! Mahse, Liverpool lam an lo duai duh lo va, “Vawi 18 in Champion ve hunah min nuihsawh ve dawn nia,” tih chu an tan chhan ve tlat! Kum 2008-09 Season-ah meuh chuan chu hun chu an nghak chhuak a, an hmelma Liverpool Champion zat an Champion ve ta; an la duh tawk lo, 2010-11 leh 2012-13 ah te Champion zuiin,’ English League sang bera Champion ngun ber’ tih zawha Club hming an ziah thin chu Manchester United a lo ni ta. Anni lawmna san zia leh a lehlam natna thuk zia kha!

Lung i her leh si-
Kum a vei a, hring mite hai ang tarin, kan vanglai ni te a liam thin. Khawvela Manager ropui bera mi tam takin an ngaih Sir Alex Ferguson pawn chu chu hriain, Manchester United chuan enkawltu thar a la mamawh thuai dawn tih a pawm a, kum 2013 khan League no mawi chawi chungin chawlh zai a rel ta.

Sir Alex-a liam rualin Manchester United ropuina a liam tel nghal a, ta ena an en Premier League no mawi meuh pawn lung a her san ta! An vanglai nite chuan mual an liam a, Champion lawm boruak te chu hmanlai an chang zo ta! Sakeibaknei puk ang maia mi dang tana tihbaiawm ni thin Old Trafford pawh mikhual tana hmun nelawm a chang a, Daniala Sakeibaknei puk lut ang a ni ta fo! League no mawi thlir liam chu ngaiah an nei zui ta rih a ni.

Beiseina leh duhsakna-
Thawnthu hlui chang mek Manchester United ropui lai nite chu koh kir tumin, beiseina nen kawng hrang hrang an dap a, engtik niah emaw chuan an la hlawhtling ang. Chutih hunah chuan Premier League no mawi nen ‘Glory Glory Manchester United’ tih hla an sa leh ang a, Manchester United ropuina thawnthu hlui chu a lo thar leh ang.

Chu hun chu engtika lo thleng tur nge a nih kan hre lo, zanin atang hian a intan thei a, kum dang nghah leh a ngai thei bawk. A tir atanga tumruhna nena inthuam sa, beidawng lova harsatna tam tak pal tlangtu Manchester United a nih angin, Man Utd fans zawng zawngte beiseina nen hma lam thir turin kan duhsak che u a, in ropuina ni in nghah chhuah thuai theih nan duhsakna kan hlan a che u – Season hman nuam ule.