LIBERTY STADIUM ATANG MEIKHUPIN ARSENAL AN HAW – Lawmkima Hmar

Nizan zanlai pelha English Premier League khelhah club talbuai Swansea City chuan Arsenal lo chingchauvin 3-1 in hnehna an chang a, November 2017 hnu lama a vawikhat nan relegation zone an chhuahsan.

Transfer lama boruak nei lian Gunners hian a pumpuiah 75% zet ball chang mahse awmze neiin an nawr hlei thei lo va, inkhel tan atanga minute 30 chhung chu goal zawnah vawikhatmah an pet lo.

Darkar chanve liam hnuah Arsenal in goal hmahruai an thun a, goal thuntu hi an hmatawngte zinga mi ni lovin left-back Nacho Monreal daih a ni. Spanish defender hian Ozil-a ball pek fing tak mai chu chan loh khan atangin hnai set sawt atangin a kei veilamin a thun.

Goal thun hmasatu an nui rei lo, minute khat hnu lekah Sam Glucas chuan a rawn sut ve leh.

Chawlhlawk hnuah pawh Arsenal eng an ni chuang lo, an midfielder ten ball awmze nei an pe chhuak lo va, midfield laia awm Elneny, Xhaka leh Ramsey ten anmahni lawmna khawp paw’n an khel chhuak zo lo.

Ball chang tlem, Swansea nawr chhun a hlauhawm thin a, senior keeper Petr Cech chesualin an back pass chu petchhuak mumal thei lovin Swans hmatawng Jordan Ayew a pe, Walse club in hmahruai na’n an hmang. Hun tawp nan minute 6 chauh a awm tawh tihah Sam Clucas bawkin an goal thumna thunin an chak zui ta a ni.

Nizan inkhelah hian Arsenal tan Mkhitaryan London club tana a game hmasa berah thil ropui a ti thei lo va, transfer boruak rit takin a chelh Oliver Giroud chu minute 76-naah luhtir a ni teh tlat bawk.

Wenger chuan, “Goal venhim kawngah kan hlawhchham a, tihsual lian tak tak kan nei a ni.Goal hnihna leh goal thumna kan chhuah chungchang sawizui kher a ngai awm lo ve.

“Swansea kha goal hmaah an hriam a, chak duhin an tuihal a, an inthlungkhawm tha bawk a ni. Zanin atan chuan kan tha tawk lo va, kan thawkho tawk lo a ni,” a ti.

Chhinchhiah atan :

* Tun tum hi Swansea in tun season-a a zawna hnehna an chan hmasak ber niin Arsenal hian Premier League khual muala an match hnuhnug 13-ah vawi 3 chiah hnehna an chang thung.

* Carlos Carvalhal hi a match hmasa pahniha Arsene Wenger hneh thei 5-na chiah a ni. Alex Ferguson, Luis Enrique, John Gregory leh Roy Evans te khan hetiang hi an lo ti hmasa.

* Arsenal hian tun season EPL ah khual mual atangin point 13 chiah an la hlawhchhuak a, tun ang huna point an la hlawhchhuah tlem ber dawt tum a ni. 2005-06 season khan point 12 chiah an lo hlawhchhuak tawh bawk.

* Arsenal hian hma an hruai zet hnuah tun season-ah point 15 an hloh tawh, a chhe zawnga record neihah hmahruai zet hnua point 16 hloh tawhtu Watford chiah an phak lo.

* Top flight huanga Sam Clucas-a goal 3 te hi Arsenal lama a thun vek an ni. Nizan khan goal zawnah vawi 3 petin goal 2 a thun.

Swansea City 3-1 Arsenal
Clucas 34′, 86′, J.Ayew 61′ – Monreal 33’

Posted in News.

Leave a Reply

Or