MANCHESTER UNITED NUMBER 7

Player thenkhatin number 7 chu an theihna hmanga chhang letin, Man Utd tan ropui takin an khel a. Player thenkhat chuan chu number 7 phurrit chu in delh beh tirin, number 7 ropuina chu anmahni timualphotu a chang ve fo bawk.

Number 7 an pek zinga lawm lo ta ber nia lang chu Di Maria hi a ni awm e. Cristiano number tur chungchang sawi neuh neuh karah Di Maria hi rawn tawng chhuakin, “Man Utd-a ka luh khan, ka number hak duh pawh min zawt lovin number 7 min pe tawp a, number 11 ka duh em em a, khatih lai khan number 11 kha a awl ve tho bawk. Mahse, duhthlanna hun min siamsak lovin number 7 kha min pe tawp a, chu number 7 chanchin chu min hrilh hrep bawk. Mahse, ka tan chuan engmah a ni lo, Jersey pakhat ve mai a ni. No 11 ka duh daih zawk,” a ti chhuak piap piap mai!

Chuti taka an dah san number 7 chu tu ten nge a ropuina hum a, tu ten nge a ropuina hum zo lo? Bihchiang ang:

1. George Best: Manchester United number 7 ropuina mei det tu he player ropui hian, 1963-1974 chhung khan ropui takin Man Utd tan a lo khel tawh a, game 470 zet khelin goal 179 a khung. A mei det tu a chhem nung nghal a ni ber.

2. Bryan Robson: Manchester United tana game 461 zet in lan, a goal 99 hmanga George Best-a number 7 mei nun sa chhem alhtu a ni. Premier League tan a nih hnuah, number 7 chuan Cantona kutah hlan ni mah se, a hma lama a hak chhungin number 7 ropuina a chhawm nung tha hle.

3. Eric Cantona: Premier League-a Man Utd number 7 ha tu hmasa ber hi chawimawi phu tak a ni bawk. Cantona hian number 7 hi lo mualphopui se chuan, vawiina an ngaih hlut ang hian number 7 hi an ngai hlu ang em? tiin a ngaihtuah theih. Chuvangin, Premier League History-a tha taka bul lo tantu Cantona hnathawh hi a ropui tlat.

Man Utd tan vawi 185 in lanin goal 82 a khung a. Premier League-ah vawi li a champion pui.

4. David Beckham: Man Utd class of 92-a tel phak, 1998/99 season-a Treble champion an nih theih nana player pawimawh David Beckham hnenah hian, 1997 khan Cantona chhuahsan tak number 7 an pe a, an rin ngamna chu thiltihin a chhang let a, Premier League-ah vawi ruk zet champion puiin, Champions League no mawi a chawi pui bawk.

5. Cristiano Ronaldo: Kum 2003 khan Sporting CP atangin Cristiano Ronaldo an la lut a, Man Utd-ah hian Sporting-a a hak number 28 a dil. Mahse, a theihna an hmu chiang a, David Beckham-a chhuahsan Jersey number 7 an pe chat! Jersey number-ah Beckham, Eric Cantona leh George Best te hnung a zui a, khelmual chhungah an hnung a zui zo ang em? tih chu mi tam tak rilrua zawhna awm, a hnu lawka, “Zui zo e le…” tia a rawn chhan tak chu a ni.

Ronaldo hian Man Utd-a kum ruk a cham chhungin, vawi 292 inlanah goal 118 a khung a, Premier League no mawi vawi thum chawi puiin Champions League-ah a champion pui bawk. A ropuizia sawi chiam a ngai lo, in hre vek. Man Utd Number 7 ha tawh zinga he number ropuina tizualtu berah ngai ila, a pawm a nuam berin a rinawm.

A rawn ha leh ngeiin a rinawm a, tun season-ah a rem ta lo a nih pawn season tharah chuan a hak tho a rinawm. Eng dinhmun nge a thlenpui tih chu hunin a la hril ang.

6. Michael Owen: Kum 2009 ah Man Utd a pan a, Ronaldo chhuahsan tak number 7 hak a duh ve tlat! A duh ang ngeiin an pe, a sulhnu enin a awm lo hran lo. Mahse, Old Trafford-a season thum a cham chhungin, hrang hluite sulhnu a chhui thuk lutuk thei lo va, game 52 ah chiah in lanin, goal 27 a khung.

7. Antonio Valencia: Number 25 ha chungin Man Utd player tangkai tak a ni chho va. 2011/12 season-ah phei chuan Sir Matt Busby Player of the Year leh Manchester United Players’ Player of the Year awards te a dawn bakah, Blackburn laka a goal khung chu ‘goal of the season’ ah thlan a ni bawk. An phur tlang bawk a, kum 2012-ah Michael Owen-a kalsan number 7 an pe ta nge nge. Mahse, pressure a zo lo nge, a hma a phak lo chho ta viau a; kum 2013-ah number 7 chu thlahin, a vanneipui zawk nia a hriat number 25 hak leh a dil tawp a, a duh ang hian thlaksak a ni leh ta a ni.

8. Angel Di Maria: Number 11 duh mah se, number 7 ha turin an duh miau a, lungsi lo takin a ha ta a ni. A tui loh ang angin number 7 ropuina a chawi nung zo ta lo a, season khat chiah a cham ta a nih kha.

9. Memphis Depay: Number 7 ropuina a hmu thiam ve a ni ngei ang, a dil ve tlat niin an sawi. Mahse, season khat leh a chanve a cham chhunga League goal hnih chiah neiin, Lyon lamah a inpu chhuak ta!

10. Alexis Sanchez: Sum vang nge Trophy vang? tih zawhna lian tak karah Arsenal chhuahsanin Man Utd a zawm a. Arsenal-a a khelh dan enin number 7 an lo pe chat. A tawpa lawm ta chu, thinrim leh ui tak chunga thlahtu Arsenal fans-te an ni. Chu chuan number 7 ropuina a chhawm nun lohzia a tarlang chiang mai awm e!

11. Edison Cavani: Tar-a-lamah Man Utd a zawm teh mial a, club dang fans ten, “Putar an la lut,” tiin nuih mah se, ring tawk takin number 7 an lo pe mauh mai! Mahse, ‘tar chhia’ a lo la ni hauh lo tih khelmualah a lantir a, League game 27 a in lanah goal 17 a khung der tawh. A number zawngin a la tam tehchiam lo na’in, a la rei lo bawk nen, number 7 pek fuh loh zual zinga rin luh phal chi niin a lang lo.