Sandesh Jhingan: A pem fuh dawn em?

Sandesh Jhingan: A pem fuh dawn em? – John Zothansanga

Nipui transfer-a Indian football nghawrnghingtu pakhat chu Sandesh Jhingan a ni. Punjabi tlangval hian Indian footballer tam takte tih theih loh (tih ngam loh?) tiin Croatian top division club HNK Šibenik a zawm.

Indian player zingah Renedy Singh (CSKA Sofia – Bulgaria), Subrata Pal (FC Vestsjaelland – Denmark) leh Gurpreet Singh Sandhu (Stabæk – Norway) te chu European top division club zawm tawh an ni a, Renedy leh Subrata phei hi chu an club tan match khat pawh an inlan lo.

India hi kan football thiam dan atanga teha phu loha hlawh tamna hmun a ni a, hei vang hian hma an sawnna tur zawk pawh ni se player tam takin ram pawn ‘try’ ai chuan India-a hlawh hnem taka khelh an duh zawk.

Sandesh hi kum 28 a ni ve tawh a, football thlirna atanga tehsak chuan Mohun Bagan-a hlawh tam tak kalsana Sibenik zawm a duhna thinlung hi fak tlak a ni.

India international defender hian Kolkata club-ah khan kum khatah nuai 170 bawr vel a hlawh a, Sibenik-ah hian season khatah nuai 50 aia tam a hlawh a rinawm loh – Sibenik-a hlawh hnem ber Juan Mesa hian season khatah nuai 217 vel a hlawh.

Mesa dawta hlawh hnem Kéres Masangu hian nuai 158 vel season khatah a hlawh a, anni huangah hian Jhingan hi a awm dawn lo chiang. Hei vang tak hian hlawh tam tak kalsana European top football-a a theihna enchhin a châkna hi fak a phu a, a huaisen bawk.

India international lar tak pakhat chuan, “Europe-a khelh hi a châkawm loh a ni lo a, mahse, player chu vawi khat inhliama career zo thei kan nih avangin sum leh pai anga kan himna hmun hi ngaihtuah tel a ngai a ni,” tiin min hrilh a, ka tawmpui viau.

Hei vang tak hian Jhingan-a thutlukna hi a ngaihsanawm lehzual a, Austria, Greece leh Croatia top division club zinga duhtu a nei hi Indian football tan chuan a lawmawm hrim hrim bawk.

Chutihrual chuan Jhinghan tan Europe-a zuk khelh hi ‘investment’ țha tak a ni thei. Gurpreet-a’n Stabæk tan a khelh lai khan season khatah nuai 20-30 inkar vel a hlawha ngaih a ni a, India a lo kir leh meuh chuan European top flight football-a experience nei keeper hian season khatah nuai 170 vel a hlawh thei.