MPL6: CHHINGA VENG HNEH THEIH LOH RAMHLUN NORTH

Vawiin tlaia inkhel boruak tang takah a zawna match 17 chhung hneh loh nei tawh lo Chhinga Veng FC leh a zawna vawi thum tlawm tawh Ramhlun North FC an inhmachhawn a, point khat ve ve an insem.

He inkhelah hian Chhinga Veng tan Lalkhawpuimawia, Laldampuia leh Lalrinchhana Tochhawng te’n goal an thun a, Ramhlun North tan Lalremruata leh V.Lalchhuanawma’n penalty atangin tum hnih a thun bawk.

Thawnthu hlui

Aizawl DFA hnuaia club pahnihte an awm dun laiin Ramhlun North an chungnung a, vawi hnih an intumah vawi khat chakin vawi khat an draw bawk. MPL5 Qualifier-ah Chhinga Vengin an ngam lo leh a, MPL ‘tak takah’ Ramhlun North an chungnung chhunzawm a, vawi hnih an intumah point 4 an hmu thei.

Tute nge khel ?

Ramhlun North FC (4-1-4-1): Lalrinhlua; Rosangliana, Toky Zomuanpuia, Lalfelpuia, Jesse Laldinpuia; C.Ramdinmawia; Jessy Vanlalmuana, Lalramzauva Khiangte (Lalmuansanga 20′), Harry Delona (V.Lalchhuanawma 80′), Lalrinfela; Lalremruata

Subs : Emmanuel Mawia, Lalmuansanga, V.Lalchhuanawma, Lalhmunsiama, Lalrinawma, Laldawngliana Colney, Lalnunpuia, Liansiama, Lalmuanawma

Chhinga Veng FC (4-4-2) : Zothanmawia; Lalthlamuana (R.Laldinliana 59′), Lalrinchhana Tochhawng, R.Lalawmpuia, Hmingthanmawia; Laldampuia (Lalrammuanpuia 84′), Lalrinchhana, R.Malsawmtluanga, Laldingngheta (Vanlallawma 76′), Malsawmfela, Lalkhawpuimawia

Subs : Francis Rambeiseia, Vanlallawma, K.Lalthlahlova, R.Lalhmangaihzuala, Lalchhuanpuia, Ramfangzauva, Lalramliana, Lalrammuanpuia, R.Laldinliana

Inkhel chu

Beisei loh zawk Ramhlun North FC in minute 3-na lekah Lalremruata tauh luh hmangin hma an hruai a, Remruata hian Ramzauva corner pet a tauh lut. Minute 14-naah match hmasaa chesual tawh Toky Zomuanpuia a chesual leh a, Lalkhawpuimawia’n box chhung atangin an siphurh sut nan a hmang.

Chhingcows an phur laklawh a, Dingngheta ball vawrh luh chu Dampuia’n goal kilah nalh takin a pet lut. Hemi hnu lawk hian Ramhlun North player pawimawh Ramzauva chu inhliam vangin lakchhuah a ni a, tun season-a hmahruaitu leh team tawhkhirh Chhinga Vengin goal an thun belh nual dawn niin a lang hman.

Ramhlun North-in an ngam than Chhinga Veng lakah tlawm an duh bik lo a, Rinfela, Jessy leh Toky te hmangin goal an thun teuh thin hle.

Team pahnihte an innawr tawk a, minute 80 hnuah thil engkim a danglam. Chhinga Vengin Chanmari an hneh tuma man of the match ni thei hial khawp a khel tha midfielder Lalrinchhana chu box chhungah a hand a, referee in penalty a pe. Inhliam vanga inlan thei lo rei tawh V.Lalchhuanawma chuan bench atanga a luh hnu lawkah he penalty hi an siphurh sut nan a hmang.

Ramhlun North an phur thar a, Lammualah an fans te au thawm hriat tur a awm leh ta. Hun pangngai tawp dawn minute hnih a la awm tihah Chhinga Veng goalkeeper Zothanmawia’n box chhungah penalty a chawi a, Chhuantea bawk rawn penchhuakin 3-2 in Ramhlun North hma a rawn hruai pui.

Inkhel boruak sang tak karah Ramhlun North player te an inthlahdah hman a, Chhinga Veng captain Lalrinchhana Tochhawng in an khingpui defender te muthlu karah nalh zetin a pet goal a, 3-3 niin hun a tawp zui.

Sawi belh ang

Inkhel pumpui thlirin Chhinga Veng an khel tha tawk lo a, Ramhlun North in point hmuh an phu hle. Chhingcows hi a zawnin game 18 hneh loh nei lo in an kaltluang ta a, record ropui tak a ni. Chutih rualin an player te’n chak zel tumna an nei tawh lo emaw tih hial turin hma an hruai hnuah an inthlahdah a, an chesual teuh hle.

Ramhlun North in game 4 chhunga a vawikhat nan point an hlawhchhuak a, an team boruak a vawrh kan hret a rinawm. Chutih rualin match hnih ngawt chu an defender te tihsual vangin goal an chhuah tawh a. Vawiinah hun tawp dawn tak takah ‘full concentration’ nen an khelh loh avangin point hnih an hloh angin a sawi theih.

Minute 88-naa penalty chawitu Zothanmawia’n red card a hmu lo kha a vannei a, T.Mawia yellow card hmuh dan chungchang a lungawi lo Lalrinchhana Tochhawng in inkhelh lai leh inkhel zawh hnu thlenga match official te a tawng khan mit a ti mim hle.

ZoFooty Statistics :
Ramhlun North FC 3-3 Chhinga Veng FC
Lalremruata 3′ V.Lalchhuanawma 83′ (pen) 89′(pen) Lalkhawpuimawia 14′ Laldampuia 17′ Lalrinchhana Tochhawnga 90+2′

46% Ball Possession 54%
12 Shots 16
7 On Target 9
2 Yellow Card (s) 4
0 Red Card (s) 0

MoM : Lalrinfela (RNFC)
Match Referee : C.Lalruatkima