MPL6 : VAWIINAH ROUND 11 HMAWRBAWKNA

Vawiin MPL inkhelah palina atanga pasarihna te an inlan kim vek dawn a, vawiin inkhel result hian semi-final luh leh luh lohah nghawng thui tak a neih dawn avangin club pali te tan an thiamna khek lo a beih a tul ang. Inkhel en man hi cheng 30 a ni a, naupang school bang inkhel en chak te tan luh man a ngai lo ang.

3:00 pm Ramhlun North FC vs Chanmari West FC (27.10.17)

Team pahnihte hi point 11 ve ve hmu in parukna leh pasarihnaah an awm a, phase 1-ah 2-1 a hnehna an chan tawh avangin ‘head-to-head’ ah West Warriors an chungnung.

Ramhlun North hi an match hnuhnung berah tlawm mahse team hlauhawm an ni a, MPL team zingah ‘shot accuracy’ nei tha ber pawl an nih bakah match 10 an khelh tawhah match khat chiah goal thun loh an la nei. Tlarhnung lamah erawh goal 19 zet chhuah tawhin an record a ropui lo a, West Warriors lakah chak turin player nei tha tawk mahse football hi minute sawmkaw chhung khelh thin a ni tih an player te’n an hriat reng a tul ang.

West Warriors in an coach thar H.Lalnunzira hnuaia an match hmasa berah point thum an hmu nghal a, an phur vanglai a ni. Chanmari derby-a hnehna an chan tum khan an striker thar Benjamin Cooper chuan goal a thun a, MPL6-a goal la thun tlem ber West Warriors tan point thum hmu turin Liberian striker hi a khelh that a tul ang. Zirtea tan midfield-ah Jacob Lalrawngbawla chu innghahna tur ni leh dawn mahse game rang khel thin Ramhlun North dang chat turin Phase 1-a man of the match Lalromawia a pawimawh ang.

7:30 pm Mizoram Police FC vs Chanmari FC (27.10.17)

Round 11 hmawrbawkna inkhel hi tualchhung football ngainatuten nghahhlelh chhan an nei a, chu chu hei hi a ni – Mizoram Police in an chet that vanglai tak a club talbuai mek, player nei tha si Chanmari FC an hmachhawn tur hi. Phase 1-ah khan Chanmari FC in 4-1 in Police hi an lo sawp tawh a, Chanmari winger Thasiama chu man of the match atan thlan a ni.

MPL6-a goal 21 thun tawh Mizoram Police tunhnaia an chet thatzia kan hria a, point 14 neiin palinaah an awm mek a, an chak emaw an draw emaw chuan pathumna an ni ang. Tlarhmaa an player te en in eng team tan mah dan chakawm an ni lo a, goal thun thei player an ngah hi an vanneihna pakhat a ni. Chutih rualin MPL6 match zawng zawngah goal an la chhuah vek a, an tlarhnung rem phui dan ngaihtuah hi coach Lalbiaksanga Colney tihtur pawimawh ber te zinga mi niin a lang.

Point 12 nei mek Chanmari hian inkhel hmasa result hre sa in an khel dawn a, champion lai an nih avang leh a zawna match 6 zet hneh an neih tawh loh avangin ‘pressure’ an nei ngei ang.

MPL tan tirh lam a ‘striker thlanmual’ ang hial a sawi thin Chanmari ah an striker te an par vul thei lo a, Alex Whittemore an chhuahtir hnuah MC Malsawmzuala lalut mahse Saiha tlangval hian penalty atang bakin goal a la thun lo a, Jakob Vanlalhlimpuian Round 1-a a goal thun a la chhunzawm thei lo. Chanmari tan an winger tlanchak te bawk an innghahna an nih a rinawm a, Police defender te lakah an chungnung zawk thei a nih inkhel ti danglamtu an ni thei ang.

Posted in MFA, MPL, Tualchhung.

Leave a Reply

Or