Tunah tak hian khawvelah tu nge lawm ber ang ti ta se, Manchester United tantute an ni ngei ang. A chhan chu khawvel footballer tha bera an chhal Cristiano Ronaldo an laklet leh vang a ni.
Man United hian Ronaldo an laklet thu hi an tichiang tawh a, Ballon d’Or vawi nga dawng tawh hi pound maktaduai 12.8-in Juventus atangin an lalet. Portuguese forward hian Red Devils tan match 292-ah goal 118 a khung tawh a; Premier League nomawi pathum, Champions League pakhat, League Cup pahnih bakah FA Cup, Club World Cup leh Community Shield te vawi khat theuh a champion pui hnuah kum 2009 khan Real Madrid a pan.
A MAK!
Nipui bazara Manchester United nena an sawizawm thin chu Jadon Sancho an ni a, Ole Gunnar Solskjaer hoten an lak felna a rei tawh. Sancho ringawt pawh hi Man United tantute tan lawmna tham a tlin tawh nen Raphael Varane a rawn lang leh thut a, awlsam takin an tifel.
PSG-in Lionel Messi bakah player langsar an lalut a, Chelsea-in Romelu Lukaku an lalut a, Manchester City-in Jack Grealish an la ve bawk. Nipui bazar hmang tha club an awm nual chungin Man United tantute nipui transfer-a an chet danah an lungawi hliah hliah le.
Man United-in tantute ngaih tha taka an awm laiin an hmelma Manchester City leh an club legend Cristiano Ronaldo chu sawizawm a ni a, khawtlang media thenkhat chuan mimal inremna an nei tawh ti hialin an ziak.
Club tantute chauh ni loin Man United player hlui Rio Ferdinand leh Wayne Rooney te pawh an mangang hman hle. Welcome to Manchester tih banner a pawl ngeia siam, Ronaldo lem chuanna pawh a darh nual hman. He banner ang deuh chiah hian Carlos Tevez lem chuanna a darh tawh avangin Man United tantute tan chuan hmun nuam a ni lo.
Lionel Messi aia Ronaldo tha zawk tiha theihtawp chhuaha tang thin Man United tantute mangang taka an awm laiin Portugal captain chu Old Trafford-a let tura sawi a rawn awm thut a, darkar thum vel lek chhungin engkim a chiang. Man United tantute boruak tawn hi Barcelona tantute boruak tawn letling thawk kha a ni a, football tuichilh tak tak loh chuan an hrethiam pha lo ang.
A PUI TEH E
Sap ram boruak chu dah tha ila, Mizoram boruak ringawt pawh pui tham tak a ni. WhatsApp status-ah Ronaldo a rawn lang nghal tuarh a, Manchester United tantu ngahzia a hriat theih bawk.
He’s Back.. GGMU; A va nuam ve; United jersey hi a va nalh em em ve, ka lei dawn chiang lutuk; Bawihte, a va nuam ham ham ve. Khawvela ka player duh ber ka club tan berah a rawn kir; Ka tah nuih tawp. Ka hlimzia leh lawmzia hi thu hian a sawifiah zo lo a ni ber e. Welcome Home Cristiano.
A chunga kan tarlan hi status thenkhat a ni a, Skylar Grey hla, “I’m coming home, Tell the world I’m coming home, Let the rain wash away all the pain of yesterday…,” tih te chu background music-ah a hmang ang a, United kawr nena Ronaldo che tla lai video ngei chu an hmang.
Tunah rih chuan Southampton nen an inhnehtawk vanga Man United tantu thinrimna chu nuai rehin a awm a, Ronaldo vangin an hlim a, an hun tawn hi anmahni bawkin an sawifiah thiam ang.
