MICHAIL ANTONIA
Tun season EPL-a tawhkhirh zet mai, English striker Michail Antonia hi a hming pum chu Michail Gregory Antonio niin Non-League club Tooting & Mitcham United atangin bul a tan a, a kawng zawh a awlsam bik lo hle.
West Ham-a a insawhngheh hma hian club hrang hrang 4 laiah loan-in a lo chhuak tawh.
Kum 2015 khan West Ham chuan an la lut a, mahse, position mumal a nei lo. A season khatnaah phei chuan right back, right midfielder, winger leh striker atan an chhawr kual!!
Striker atana an hman hnuah che tha viau mah se hliamin a tlakbuak avangin a pil deuh vang vang a, season hnih chu a zawnin EPL-ah goal 10 a thun tling ve ve tho.
Tun season-ah a hming a rawn chherin vawi thum a inlan atangin goal 4 a thun der tawh a, EPL-ah goal 50 thun tling ta chiahin goal thun tam lamah a club tan record thar a siam bawk.
August 15, 2021 khan Newcastle United lakah ELP-a goal 47-na thunin The Hammers tana EPL-a goal thun tam ber, thinchhe ngilnei Paolo Di Canio record a nihrual a. August 23, 2021 khan Leicester City lakah goal hnih thunin record a siam ta a ni.
Kum 30 mi hian a football zinkawng chawhnu lamah striker angin a hming chher mah se a khelh duhna ber position erawh Winger a ni.
Wandsworth, Greater London-a piang ni mahse an thlahtute avangin Jamaica khua leh tui nihna a nei. Jamaica chuan an ram tana khel turin an sawm nain England tana khelh a thlan avangin a hnar.
Kum 2016 khan Sam Allardyce chuan England team-ah ko mahse mual chhungah a lut lova, Gareth Southgate hian kum 2017 khan World Cup Qualifying khel tur zingah telh leh mah se, March 20, 2017 khan inhliam avangin squad atangin a inhnukdawk.
England tan khelhna hmun chan a inbeisei ta lo a ni mai thei, Jamaica-in kum 2022 World Cup a khelh ngei theih na’na puih a hreh loh thu sawiin Jamaican Passport a buaipui a. Jamaica tana inlan turin a inpeih.
Kumin March thlaa USA hmachhawn tur player 19 awmna Jamaica team-ah a tel lova, kumin June ni 18 khan 2021 CONCACAF Gold Cup khel tur Jamaica player atana thlan lailawk player 60 zingah tel mah se Jamaican passport a neih hman loh avangin a final squad 23 zingah a tel lo. Tunah chuan Jamaican Passport a nei ta bawk a, Jamaica tan a inlan tawh ngeiin a rinawm.
England senior team-ah koh ni tawh mah se a la khelh loh avangin ram dang tan senior team-ah a la inlan thei.
