Chanmari Chanmari Chanmari Chanmari – Opa

Mizoram Premier League Season 5 final lut turin zanin khan Chanmari FC-in Aizawl FC 2-1 in an hneh. MPL2 champion hian aggregate-ah I League club hi 6-2 in an hneh a, final-ah Bethlehem Vengthlang FC an hmachhawn ang.

MPL2 champion Chanmari FC hian MPL final awm hnuah a sang pahnih zingah an la tel pha vek a, MPL club zinga final lut thei hmasa ber an ni. Aizawl FC erawh vawi hnih an champion zawn hnuah final an lut thei lo a, a zawna vawi thum champion an inbeiseina chu an elpui Chanmari lakah a thamral.

Chanmari FC-in first leg-ah Aizawl FC hi 4-1 in an sawi sa a, second leg-ah Malsawmfela leh Leonce Dodoz ten Chanmari FC tan goal an khung a, Aizawl FC tana Jonathan Lalhriatkima khung chu scoreline lan mawina chauh a ni. Ramhlun South tlangval Sawmfela penalty khung tur hlawhchhuah saktu Dodoz chu man of the match-ah thlan an ni a, Ivorian forward hian Chanmari tana a goal hmasa ber a khung ta bawk.

Entu tlem
Tualchhung football-ah chuan Aizawl FC leh Chanmari FC te inkhel hi chu ‘big match’ a ni a, amaherawhchu 1st leg-ah Lalsangzuala Hmar hote 4-1 zeta an chak tawh avangin mipuiin an ngaihven tawh lo niin a lang.

I League club tana harsatna belhchhah turin Lalramchullova chu a la dam lo a, MPL3 best player Chullova bakah hian first leg-a inhliam chunga khelh luihtir Lalrinzuala Khiangte chu chhawr theih a ni tawh lo. Chanmari captain hlui Ricky Lallawmawma chu first leg-a hnawhchhuah a nih avangin Aizawl FC tan a inlan thei lo a, Nigerian midfielder midfielder Benjamin Onome leh ZoFooty Young Player of the Year lo ni tawh Lalthakima te Coach K. Malsawmkima’n a ring ngam lo niin a lang bawk.

Chanmari FC \antu lam pawh an tam bik lo a, Aizawl FC an sawp tawh avangin final lut tawhah an inngai. Chanmari mipuiin final an thlir a, I League club an hneh lai en nawn châkna an nei tawh lo niin a lang. Final-ah erawh Chanmari FC-in Champhaia an sawp tawh BVT an hmachhawn dawn avangin Lammual mawi tham erawh an pung khawm leh ngei ang.

Beiseina hmet mittu Sawmfela
Ramhlun South tlangval Malsawmfela hian second leg khelh hmain MPL5-ah goal 10 a thun tawh a, Chanmari West captain Laldampuia nen top scorer nih tumin an um mek. West Warrior-in BVT an hneh loh avangin goal 11 khung tawh Dampuia a inlan tawh dawn lo.

Zaninah Sawmfela’n penalty a khung a, Dampuia goal khung zat goal 11 a khung ve chiah bawk. Kawrtethawveng tlangval Dampuia hi match 16-ah inlan vekin Chanmari forward aiin match khatin a khel tam zawk. Tun dinhmunah Sawmfela hi top scorer atana thlan tur ni mah se final-ah a inlan a nih chuan Dampuia nen an match khelh zat a inang dawn. MPL5 top scorer chawimawina dawng tur a la hriat loh!

Mimal chawimawina dawn nan Sawmfela penalty a la tawklo mah se Aizawl FC beiseina hmeh mit nan erawh a tha tawkah angaih theih. Chanmari FC penalty hmuh hi Dodoz-a hlawhchhuah a ni a, Jonathan Lalhriatkima chuan Ivorian forward ball chhuhsak a tumna lamah a kutin ball a khawih a, penalty a chawi. Ramhlun South tlangvalin penalty hi chiang zeta a khung avangin Aizawl FC tan final luh beiseina a tawpah an ngaih theih bawk.

Second half-ah AFC defender Jona-a’n a tihsual siamtha in Rochharzela corner pet chu a tauh lut a, Hnahthial tlangval goal-in Chanmari player erawh a tibuai pha lo. Minute 57-naah defender Lalrinchhana ball vawrh luh chu Dodoz-a’n goal-ah chantirin Chanmari FC-in harsatna hranpa nei loin hnehna an chang nawn.

Mahni tana khel
Chanmari FC-in goal hnih aia tam khung thei turin chance tha an nei a, amaherawhchu tlarhmaa awm Sawmfela, Dodoz leh Fela Zote ten scoresheet-ah an hming thai lan an duh vek. Hei vang hian Chanmari FC-in first leg-a an khung zat an khung thei tawh lo a, Aizawl FC tlarhnung phuahchawp lakah goal hnih chiah an khung.

Ivorian forward Dodoz-a’n man of the match dawn phu mah se a finishing a tha tawk lo a, first half leh second half-ah AFC keeper T. Mawia chiah hmachhawn goal-ah a chantir thei lo ve ve. Sawmfela’n MPL-ah top scorer chawimawin a la dawng lo a, goal khung a tum ruhna lutuk lamah a thiante ball a pe lo a, chumi rahchhuah chu ball tha a chang bik lo.

AFC an ral?
Aizawl FC-in MPL tan hmaa inelna I Day Football leh MFA Super Cup-ah nomawi an chawi a, amaherawhchu an champion danah team tha bik zia an chhuah lo. Season liam ta atangin Aizawl FC-in player 15 vel zet an chhuah a, an foreigner lakluh Bright Middleton Mends leh Benjamin Onome te an fuh tawk loh bakah an player pawimawh inhliam avangin final thleng tur khawpin an tha tawk lo.

AFC-in semifinal thleng turin vanneihna an mamawh a, I League an hmachhawn huna result tha nei tur chuan an squad an thuahfai a tul ngei ang. Tuna an player nen Aizawl FC-in I League an hmachhawn a nih chuan Mizo mipui lak atangin tawiawmna tha an hmu thei lo ang.

ZoFooty Statistics
Aizawl FC 1 – 2 Chanmari FC
AFC : Jonathan Lalhriatkima 50′
CFC : Malsawmfela 41′(P); Leonce Dodoz 57′
MoM : Leonce Dodoz, CFC
Agg-ah Chanmari FC 6-2 in an chak
59% Ball Possession 41%
11 Shots 11
6 On Target 5
1 Yellow Cards 2
0 Red Cards 0
Powered by Rainbow Multibrand Mobile Showroom

Tute nge inlan?
Aizawl FC (4-4-2) : Zothanmawia; Lalhriatrenga, Jonathan Lalhriatkima, Rohmingthanga, Lalramhmunmawia; Rochharzela, Lalawmpuia Hnamte (Albert Zohmingmawia 61′), H. Lalbiakthanga, Brandon VL Remdika; William Lalnunfela, F. Lalremsanga (Vanlalduatsanga 50′)
Subs: Lalawmpuia, Lalthakima, Vanlalthazuala, Lalnuntluanga, Jonathan Lalrawngbawla, Vanlalduatsanga, Albert Zohmingmawia, Bright Middleton Mends, Lallawmzuala Chhakchhuak.

Chanmari FC (4-4-2) : F. Lalmuanawma; C. Lalrosanga (Lalrammawia 57′), Ugochukwu Godswill, Lalrinchhana Tochhawng, Ramfangzauva; Vanlalbiaa Chhangte (Lalmuanzova 86′), R. Malsawmtluanga, Lalrinchhana, Leonce Dodoz; Malsawmfela, Lalruatfela Zote (Rochhingpuia 69′).
Subs: Lalrinnunga Hnamte, MS Dawngliana, C. Vanlalhriatpuia, MS Dawngzela, Rochhingpuia, Rosangliana, Lalrammawia, Lalmuanzova, Francis Rambeiseia.