MPL6 Qualifier champion Mizoram Police – Rooney Opa

Mizoram Police-in an thiamna atanga tehna an awmna hmun tur takah an awm leh ta. Mizoram Premier League Season 6 khelh theihna ticket nei turin Police-in vawiin tlai khan RG Stadium-ah New Serchhip FC 5-2 in an sawp.

Police tan hian Lalbiakhlua (Biaktea), V. Laltanpuia (Tri-a), Lalfakawma, Lalfakzuala leh Lalbiaknunga (Manunga) ten goal an khung a, New Serchhip tan Lalhlimawma leh Lalhriatzuala ten an thun ve bawk. Minute 67-naah captain Tri-a hnawhchhuah ni mah se Police-in player 10-a khel chungin harsatna nei loin hnehna an chang.

Police nge nge
Tialthawnga hote hian MPL6 Qualifier match hmasa berah Venghlui FC chu 6-1 in an sawi sa tawh a, Police-in match hnih khelhah point ruk an hmu. Aizawl DFA first division champion Police ropuina tak erawh an point zat ni loin an goal khung zat a ni a, match hnihah hian goal 11 khungin goal thum chiah an chhuah.

Aizawl khaw pawn club New Serchhip FC-in match hnuhnung bera an hmachhawn tur Venghlui FC aiin Police lakah goal an chhuah an tlem a, hei vang hian 2016 L&L Football champion New Serchhip FC tan MPL6 Playoff khel turin Venghlui FC draw a tawk dawn. MPL6 Qualifier match hnuhnung ber hi Thawhtanni tlai dar 1:00 hian Lammualah khelh a ni ang.

Serchhip record
New Serchhip FC hi Serchhip DFA buatsaih L&L Football Tournament champion lai an nih avangin Serkhawpuiah chuan club lar an ni a, Serchhip football club zinga MPL Qualifier khel hmasa ber an nih avangin an chanchin hi tualchhung football history-ah nem kai a ni tawh ang.

L&L Football champion hian MPL-a khel tawh player an kawl nual a, record neih duh vanga qualifier hmachhawn satliah ni loin player tha fawm khawmin inelna an hmachhawn. New Serchhip vanduaina erawh Mizoram Police awm tumah qualifier an hmachhawn a, Police hian 2016 MFA Super Cup-ah MPL club Chhinga Veng leh Dinthar FC an hneh theih avangin an tha tih chu tlang hriat a ni.

Police an hrang
Police lamin bul an tan tha a, MPL inpetkai ngei tumin an goal nawr a na nghal hle. Minute 11-na lekah MPL2 leh MPL3 top scorer Biaktea chuan mual dinglamah ball tlanpuiin box chhungah a luhpui a, New Serchhip goalkeeper Malsawmtluanga man hman lohin a pet lut nghal.

Hemi hnu hian Police attack a na chhunzawm a, New Serchhip-in goal venhim hna an thawk a ni ber. Minute 28-naah box pawn chiahah Police-in freekick an hmu a, captain Tri-a’n mawi zetin a pet lut a, a hnu minute khat lekah Fakzuala chuan Aizawl DFA first division top scorer Lalsangbera pass tha tak mai chu a thun zui bawk.

Police tan Sangbera, Fakzuala leh Fakawma te inkawp an hlauhawm a, goal chance an ngahin New Serchhip tlarhnung ten an chai hleithei lo. Goal thum an thun hnu lawkah Dawrpui tlangval Sangbera pass tha tak mai chu ho takin Fakzuala’n a hlah a, amaherawhchu minute 33-naah Armed Veng tlangval Fakzuala’n a tihsual siam tha in Fakawma a goal khung tur a siam sak.

Chawlhlawk hmain goal li zet an khung a, Police-in MPL an khel dawn tih a chiang tawh a, Venghlui FC beiseina chu New Serchhip-in an goal chhuah aia tam chhuah se tih a ni.

Beiseina nung
New Serchhip-in goal li an chhuah hnuah pawh match hnuhnung ber atan inkhel pawimawhna an hrechiang a, hei vang hian an inthlahdah duh lo. FC Kulikawn winger hlui Lalremruata (Arapa) hmangin New Serchhip-in goal an khung teuh a, Arapa ball pet hi Police keeper Andrew Lalhmingliana’n dang thei lo mah se first division best defender Lalhmunmawia’n (Ahmuntea) a lo dang hlauh.

Chawlhlawk zawhah phei chuan Police tlarhnung an nawr bet nasa a, awlsam taka chak mai theih tura ngaih Police lakah goal hnih ngawt an khung. Minute 54-naah Police tlarhnung pherh vangin Lalhlimawma’n New Serchhip tan a khung a, 4-1 a ni. Amaherawhchu Police-in Hlimen tlangval Manunga hmangin goal ngana an khung a, he goal-ah hi chuan Police aiin Venghlui an phur tawh zawk a rinawm.

Amaherawhchu minute 59-naah Arapa pass chu Lalhriatzuala’n goal-ah a chantir a, New Serchhip tan goal pawimawh bik a ni. Minute 67-naah first division best player Tri-a chu hnawhchhuah a ni a, Police-in an captain tel loin goal an khung thei tawh lo.

Huntawp lamah Police-in an tlarhnung venhim lam an ngaihtuah a, hei hian New Serchhip tlarhma tan hun thawl pein Chanmari player hlui C. Lalnuntluanga pass tha zet chu box chhungah vengtu nei lo Reitlang winger hlui Ralkapzauva’n vai thelh. Hei bakah hian hnai tak atangin Lalhriatzuala’n goal kham chungah a thlawh a, C. Tluanga freekick tha tak mai pawh Police keeper Andrew-a’n tha zetin a dan sak bawk.

Welcome back Police
MPL awm hmain Mizoram Police an tha tawh a, MPL1 hmasa berah pawh champion tur khawpin an tha a, an zinchhuah tam vang chauhin an champion lo. Amaherawhchu civil club an inlak that zel laiin hna nghet an pek theih loh avangin player thain an zawm duh lo a, an chhe tial tial. MPL4-ah champion tur khawpin a tha tawk lo tih a chiang a, relegate lo tur khawp erawh chuan an tha tawk. Amaherawhchu an player tha pahnih F. Lalrinpuia leh Lalbiakhlua te Aizawl FC-ah an hawhtir a, an hmelma lakah ralthuam tha bik an pek an tuar a, an relegate phah.

Tunah erawh Valpuia leh Biaktea te an nei let tawh a, first division leh MPL Qualifier khel turin an tha tawk. MPL4-a mimal lawmman zawng zawng hui vek thei Republic Veng tlangval Valpuia a inhliam chung pawhin Police hian harsatna an nei lo a, an thiam fal nalh. Mizoram Police tana hriat tur erawh tuna an player ang hi chuan MPL an champion dawn lo tih an hriat a, Mizoram inelna sang bera nomawi chawi an tum a nih chuan an squad an tihchhah a pawimawh takzet a ni.

Player 13 chauh
Serchhip DFA aiawha tel New Serchhip-in player tha an nei a, amaherawhchu MPL khel turin an la inpeih lo tih a chiang. Mizoram Police an hmachhawn tum hian squad-ah player 13 chiah ziak lut a, Mizoram inelna sang ber khel tur zawnnaa thil thleng atan chuan a mawi lo lam hret a ni.

ZOFOOTY STATISTICS
New Serchhip FC 2-5 Mizoram Police FC
NSFC : Lalhlimawma 54’; Lalhriatzuala 59’
MPFC : Lalbiakhlua 11’; V. Laltanpuia 28’; Lalfakzuala 29’; Lalfakawma 33’; Lalbiaknunga 55’
52% Ball Possession 48%
14 Shots 14
6 On Target 9
0 Yellow Cards 2
0 Red Cards 1
Red Card: V. Laltanpuia 67′, MPFC
Powered by Darchiauva Hardware, Mission Veng

Tute nge khel?
New Serchhip FC: Malsawmtluanga, C. Lalnuntluanga, Remlalruata, Lalhriatzuala (Joseph Lalmuanawma 80′), Lalremruata (Arapa), Lalthakima, Lalchhanliana, Ralkapzauva, Ramduhawma, Vanlalhruaizela (David K Hmingthanga 85′), Lalhlimawma.
Sub tluan: –

Mizoram Police FC: Andrew Lalhmingliana, Lalhmunmawia, PC Vanlalhruaia, Zohmingmawia (Lalropuia 51′), Lalbiaknunga, Lalramtharmawia, V. Laltanpuia, Lalsangbera (C. Lalnunmawia 82′), Lalfakzuala, Lalbiakhlua, Lalfakawma (R. Vanlalhriata 77′).
Sub tluan : VK Malsawma, Lalrinchhana, Moody Lalfakawma, Simon Lalruatkima, F. Lalrinpuia, Roliantluanga.

Team Dinhmun

MPL QUALIFIER FIXTURES & RESULTS
December 8, Lammual
Mizoram Police 6 – 1 Venghlui FC
MPFC : Lalfakawma 7′; Lalramtharmawia 37′; TC Vanlalhruaia 69′; Lalfakzuala
85′; V. Lal\anpuia 88′; F. Lalrinpuia 89′
VFC : C. Lalmuanpuia 79′

December 10, RG Stadium
New Serchhip FC 2-5 Mizoram Police FC
NSFC : Lalhlimawma 54’; Lalhriatzuala 59’
MPFC : Lalbiakhlua 11’; V. Laltanpuia 28’; Lalfakzuala 29’; Lalfakawma 33’; Lalbiaknunga 55’

December 12, Lammual
1:00 PM Venghlui FC vs New Serchhip FC

MPL PLAY OFF FIXTURES
December 14, Lammual
Ramhlun North FC vs Qualifier 2

December 16, Lammual
Qualifier 2 vs Ramhlun North FC