Semifinal luh tum Chhinga Veng kal zel

Mizoram Premier League kaithar Chhinga Veng FC chuan champion hmasa ber Dinthar FC 2-1 in an hneh a, semifinal luh an inbeiseina an chhawm nung zel.

November 18, tlai inkhelah Dinthar FC-in Cho Tsering Lepcha hmangin goal an khung hmasa a, Chhinga Veng lamin substitute Lalkhawpuimawia hmanga an sut hnuah Ronald Zothanzama freekick hmangin hnehna an chang. Chawngthansanga hote tana goal khungtute hi Dinthar tana khel tawh ve ve an ni a, MPL champion hmasa ber hi an player hlui goal vangin relegation playoff khel thei dinhmunah an din phah bawk.

Dinthar midfielder Lalbiaknia chu minute 10 a la awmin hnawhchhuah a ni a, player 10-in an khelh tluan phah. Chhinga Veng defender Ugochukwu Chigozie Emmanuel chu tum dang ang bawkin tlarhnungah a tangkai a, man of the match atan thlan a ni.

Inthlahdah theih loh
Team pahnihte hi point 13 ve ve hmuin semifinal luh tuma bei ve ve an la ni a, an inhnehtawk erawh chuan club pahnih beiseina a tawp ang a, Chanmari West-in semifinal anlut ang.

Chak zawk an awm chuan a chak zawk zawkin an game hnuhnung ber an khelh dan a zirin semifinal an la lut thei a, hei vang hian inkhel pawimawh a ni a, a tu ve ve tan pawh inthlahdah a thiang lo.

Dinthar hun
Team pahnihte an inbei tawk nghal hle a, Chhinga Vengin an nawr na hret a, Vanlalthanga chu vei lam kilah a club hlui tan a hnawksak hle. Dinthar FC-in Cho Tsering Lepcha leh Michael Lalremtluanga te an neih avangin Chhinga Veng tlarhnung tan awm hahdam theih a ni lo.

Chawlhlawk hmain game a nung em em lova, hun reitak chhung chu mual laiah intichhe tawnin goalkeeper pahnihten hna an nei tam lo. Amaherawhchu, minute 40 a ni a, Dinthar lamin corner kick hmuin heta tanga ball kal hi Chhinga Veng goalkeeper Lalhmangaihzuala (Lalhmaa) chuan ball kal dan a chhut dik lo a, a zuan phak loh avanga Dintharin ball an chan chu Cho Tshering Lepcha chuan lo thunin hma an hruai. Goal luh hnu lawk hian corner atang tho in Zothanzuala chuan chance tha hmu in a thun lo hlah bawk.

Chhinga Veng hian si an phurh hnuah an game thlak danglamin nawr lam an buaipui ve tan a, Paul Ramfangzauva freekick tha tak mai chu Dawngtea chuan lo tauhin goal zawnah a kal lo hlauh. MPL kaithar an vanduai a, goal an chhuah hma hian VL Thanga cross chuan Dinthar captain VL Chhanhima kut fuh mah se penalty pek an ni lo.

Chhinga Veng hun
Chhinga Vengin Joy lachhuakin Lalkhawpuimawia (Mapuia) an luhtir a, an goal nawr a nat sawt bakah an game pawh a mawi sawt. Substitute awmze neiin goal a thlen a, minute 48-naah Emma freekick chu striker palian Mapuia’n mawi takin a tauh goal. Hemi hnu lawkah hian Ronald chuan freekick atangin goal ropui a thun a, minute hnih chhungin goal hnih an thun.

Chhinga Veng an khel tha telh telh a, Paul-a ball vawrhluh chu Dawngtea’n tha taka lo lain chep tak karah petin goal ban a pet per a, a lo let leh pet nghalin goal kham a pet per leh zui a, Chhinga Veng tantute an phurin an thawm a ring ham ham hle. Dinthar an talbuai takzet a, minute 56-naah goalkeeper Joseph Lalruatfela aiah Luangmual tan pawha khel tawh Isak Lalmuanpuia an luhtir hial.

Inkhel boruak a tang tial tial a, Chhinga Veng hian minute 62-ah an goal thumna an thun teuh hle a, Dawngtea ball lakluh tha zet mai chu Vanlallawma’n lo dawngin a pet zui a, pet chhe hle mah se Dinthar defender Steve-an a lo clear chhe ve leh chhawng a, an goal-ah a lut tep. Substitute keeper Isak-a’n a lo dang hram a ni.

Dinthar lamin theihtawp chhuahin an nawr let a, goal chance pawh an insiam nual hman, amaherawhchu, player an tang ulh niin a lang a, yellow card an hmu phuk phuk mai. Minute 80-naah Dinthar midfielder Biaknia’n yellow card pahnihna hmuin hnawhchhuah a ni a, Chite tlangval hian tun MPL-ah red card a vawi hnih hmuhna a ni bawk.

Counter attack-ah Chhinga Vengin Dawngtea leh Lawma te inkawp hmangin Mapuia tan ball tha hmu mah se hnai set sawtah Kelkang tlangvalin a tauh goal lo.Hun tawp a hnai a, player 10-in khel mah se Dinthar goal bawh a na hle. Dinthar defender Balogun Hammed hmangin hun tha an nei a, goal-ah a chantir thei lo. Injury time-ah substitute Samuel Laltlanthanga goal khung tur chu Chhinga Veng keeper R. Lalhmangaihzuala’n mak takin a dang a, Dinthar forward Lalruatpuia’n hun tawp hma chiah chance tha bik a hlah bawk.

Huntawp thlengin boruak a so sang a, Dinthar FC-in semifinal luh beiseina an nei ta lo a, Chhinga Veng erawh beiseina sang tak nen Round 14 an hmachhawn dawn ta a ni.

Dinthar FC hian point 13 hmu in parukna an ni chhunzawm zel a, an khelh leh turah Ramhlun North hmachhawn dawnin an chak lo a nih chuan relegation playoff an khelh a ngai ang. Chhinga Veng hian Chanmari West FC an hmachhawn dawn a, MPL kaithar club hi an chak a nih chuan semifinal an lut ang.
ZoFooty Statistics:
Dinthar FC 1-2 Chhinga Veng
DFC : Cho Tsering Lepcha 40′
CVFC : Lalkhawpuimawia 48′; Ronald Zothanzama 50′
MoM : Emma Chigozie, Chhinga Veng
50% Ball Possession 50%
13 Shots 14
7 On Target 5
3 Yellow Cards 0
0 Red Cards 0
Powered by Rainbow Multibrand Mobile Showroom.

Tute nge inlan?
Dinthar FC : Joseph C Lalruatfela, Stephen Lalnunmawia, VL Chhanhima, Zothanzuala, Balogun Hammed, Saihmingthanga, Carter Ezebube Clarence, Lalbiaknia Pautu, Michael Lalremruata, Lalruatpuia, Cho Tsering Lepcha.
Subs: Isak Lalmuanpuia, Freddy R Zothanpuia, Lalremtluanga, Vanneihtluanga, C. Lalnunsanga, Joseph Lalthafela, R. Lalnunmawia, Samuel Laltlanthanga, Chawngthansanga.
Chhinga Veng FC : R. Lalhmangaihzuala, Ronald Zothanzama, K. Lalthlahlova, Lalramfelpuia, Ugochukwu Chigozie Emmanuel, Joy Mrong Khar Raswai, Vanlallawma, Vanlalthanga, Paul Ramfangzauva, MS Dawngliana, Joseph Lalnunpuia.
Subs: C. Lalbiaksanga, Dinthangpuia, R. Laldinliana, Joseph Biakthianghlima, Lalramliana Varte, Lalthlamuana, Isaac Lalremruata, Lalkhawpuimawia, Lalfaktlinga.