Round tawp berah engkim a chiang dawn

chhinga-veng
Mizoram Premier League Season 5 beisei phak bakin a ngaihnawm a, team pariat zingah dinhmun nghet nei pakhatmah an la an awm lo.

Chanmari FC, Bethlehem Vengthlang FC leh Aizawl FC ten semifinal an lut tawh mah se an khingpui tur a la chiang lo. Chanmari West FC leh Chhinga Veng FC-in round tawp berah knockout stage hmunruak pakhat an inchuh dawn a, Dinthar FC leh Ramhlun North ten relegation playoff pumpelh an tum dawn. Hei chauh hi a la ni lo, table mawngphaha awm Zo United an la relegate lo.

Tla duh lo Zo United
November 17 tlaiah Chanmari West FC-in table mawngphaha awm Zo United hneh se West Warrior-in semifinal an lut ang a, zo United an relegate thung ang. Amaherawhchu season tawp lama tang rei thei tak Reitlang hming pu thin Zo United-in an zia an chhuah.

West Warrior-in 3-1 hma an hruai tawh hnuah pawh Zo United an beidawng lo a, hun a tawp chuan 3-3 a ni. Chanmari West-in semifinal an la luh bik loh ang thoin Zo United an la relegate bik lo.

Tla thei Ramhlun North
Zan lamah Chanmari FC-in harsatna nei loin Ramhlun North 2-0 in an hneh a, MPL kaitharin point an hmuh loh avangin tla thei an la ni.

MPL tan hmaa I Day Football final lut thei Ramhlun North-in MPL hautak zia an hre chho a, season tawpah an player pawimawh Zosangliana (Chhaia) leh C. Ramdinmawia te an inhliam avangin an hmabak a harsa sawt a, hmabak khirh tak an hmachhawn a tul phah bawk.

Mumang ramah Chhinga Veng
November 18 tlaiah Chhinga Veng leh Dinthar FC te an intawng inhmachhawn a, point 13 hmu ve ve leh semifinal luh theih dan nei ve ve an ni bawk a, inkhel a hmuhnawm takzet. Dinthar FC-in goal khung hmasa mah se Chhinga Vengin goal hniha an chhan let avangin MPL1 champion semifinal beisei a tawp. Chhinga Veng tana goal khungtu Lalkhawpuimawia leh Ronald Zothanzama te hi Dinthar player hlui ve ve an ni.

AFC chungah BVT
Bethlehem Vengthlangin Round 13 kharna inkhelah Aizawl FC goal awm loa an draw theih avangin pahnihna aia hniamah an tla thei tawh lo. Lalbiaksanga Colney hote hi AFC aiin head to head-ah an tha zawk a, league round khelh zawhah Chanmari FC chungah an la awm thei.

Aizawl FC erawh an match hnunhnung bera Chanmari FC an hneh loh chuan pathumna atangin palinaah an la tla thla thei thung.

Engtin Zel?
Round 14-ah engkim a chiang dawn. November 24, Ningani tlai dar 4:00-ah Ramhlun North leh Dinthar FC an inhmachhawn ang a, zan dar 7:00-ah Chanmari West FC leh Chhinga Veng FC te an inkhel leh ang.

November 25, Zirtawpni zanah Bethlehem Vengthlang FC leh Zo United te an inkhel ang a; November 26, Inrinni zanah Aizawl FC leh Chanmari FC te an inkhel leh ang.

Relegation playoff
Dinthar FC tan relegation playoff pumpelh turin Ramhlun North draw a tawk a, MPL kaithar tan chak ngei ngei a ngai thung. Chutihrualin Lalruatliana Sailo hote hian point khat an hmuh chuan relegation playoff an hmachhawn ang a, an relegate nghal dawn lo tihna a ni.

Relegation playoff erawh a zuam awm chuang lo, Aizawl DFA hnuaia first division ringawt thlir pawhin Mizoram Police hi playoff-a hmachhawn theih zinga mi an ni a, MPL khelh zel duh chuan pumpelh a him ber ang.

Semifinal inchuh
Chanmari West-in Champhaia Aizawl FC an hneh hnua match rukah vawi thum an chak lo a, vawi hnih an draw a, vawi khat chiah an chak avangin semifinal an la nemnghet thei lo. West Warrior tan Chhinga Veng an hmachhawn hunah tun season-a player langsar ber zinga mi Laldampuia a chet that leh a tul dawn a, Sialhawk tlangval R. Laldanmawia, Lengpui tlangval Lalmuanzuala bakah Lunglei tlangval H. Lallianzama ten an thlawp that a tul dawn. Chutihrualin semifinal lut tura point khat chiah an mamawh avangin tlarhnunga R. Lalawmpuia leh Toky Zomuanpuia te inkawp an pawimawh ang.

Chhinga Veng erawh an phur vanglai tak a ni a, MS Dawngliana’n a thiamna a pholang leh tawh bakah Chanmari West an hmachhawn hunah H. Lalmuankima hremna hlih a ni chiah dawn. Tlarhnungah Emma Chigozie a khel tha a, tlarhmaah Lalkhawpuimawia a dam tawh a, Kelkang tlangval hian a club hlui Dinthar lamah goal a khung. Chanmari West hian Zo United laka 3-1 a hma an hruai hnuah an chak zawh loh avangin tla thei an ni tih an hrechiang ang.

Hmahruaitu (?) leh mawngphah
Bethlehem Vengthlang FC-in Zo United an hneh chuan league hmahruaitu an ni rih dawn a, Zo United an relegate dawn tihna a ni bawk ang. Chutihrualin Ramhlun North-in Dinthar laka point an hlawhchhuah chuan Zo United hi an tla tawh hrim hrim bawk, Dinthar an chak erawh chuan Zo United-in tharum point thum sual chhuak tur hrim hrim Lammualah an lut ang.

Zo United defender Lalnunpuia chuan man of the match a thlan a nih tumin kan vaiin kan attack dawn tihin a sawi lawk a, West Warrior nena an khelh dan thlirin a thusawi ang hian an khelh ngei a rinawm.

MPL final rematch
MPL3 leh MPL4 final-ah Chanmari FC leh Aizawl FC te an inkhel a, I League club an chak ve ve. Chanmari hian AFC hi pumpelh an duh a nih chuan point khat an hmuh a ngai a, point thum an hmuh erawh chuan I League club chungah Chanmari West an la awm theih avangin semifinal-ah MPL final rematch a la hmuh theih tho dawn.

A tawi zawng chuan MPL5 round tawp ber match pali te hi a pawimawh vek dawn a, tualchhung football ngaina chin tan Round 14 hi hmaih phal chi a ni lo.

Round 13 Thlirna Tawi
November 17, Ningani
Zo United 3-3 Chanmari West FC
ZUFC : Lalhlimpuia 36′; Malsawmdawnga 63′; Lalnunpuia Pachuau 74′
CWFC : Ramengmawia 19′: Laldampuia 32′; Malsawma Chhangte 59′(OG)
MoM : Lalnunpuia Pachuau, zo United

Chanmari FC 2 – 0 Ramhlun North FC
CFC : Vanlalbiaa Chhangte 36′; Malsawmfela 40′
MoM : Vanlalbiaa Chhangte, Chanmari FC

November 18, Friday
Dinthar FC 1 -2 Chhinga Veng FC
DFC : Cho Tshering Lepcha 40′
CVFC : Lalkhawpuimawia 48′; Ronald Zothanzama 50′
MoM : Emma Chigozie, Chhinga Veng

Bethlehem VT 0-0 Aizawl FC
MoM : Lalnuntluanga, Aizawl FC

Round 14 Fixtures
November 24, Ningani
4:00 PM Ramhlun North Vs Dinthar FC
7:00 PM Chanmari West FC Vs Chhinga Veng FC

November 25, Zirtawpni
7:00 PM Bethlehem VT Vs Zo United

November 26, Inrinni
7:00 PM Aizawl FC Vs Chanmari FC

Team Dinhmun

# Team Pld W D L GF GA GD Pts
1 Chanmari FC 13 7 5 1 23 11 12 26
2 Bethlehem VT 13 7 3 3 12 10 2 24
3 Aizawl FC 13 6 3 4 13 9 4 21
4 Chanmari West 13 5 3 5 18 15 3 18
5 Chhinga Veng 13 4 4 5 18 17 1 16
6 Dinthar FC 13 2 7 4 15 19 -4 13
7 Ramhlun North 13 3 3 7 12 20 -8 12
8 Zo United 13 1 6 6 11 20 -9 9