Zidane khelhpuitu Indian player Vikash Dhorasoo : Ziaktu – John Zothansanga
Vikash Dhorasoo tih hming hi i lo hre tawh ngai em? Khawvela footballer ropui ber pawl Zinedine Zidane kianga lo khel tawh thin kha? Kha player kha Indian a ni asin!
Kum 47 mi ni ve tawh Dhorasoo hi a thiamna piahah huaisen taka a ngaihdan a sawichhuah thin avangin hriat a hlawh a, 5 ft 6 in leka sang a ni chungin AC Milan vanglai thleng khan a khel phak ve tlat.
A hming dik tak Vikash Rao Dhorasoo hi Harfleur, France-a piang a ni a, Indian thisen kai ni mah se France khua leh tui nihna nei a nih avangin football khawvela ram ropui ber pawl France tana khelh a thlang.
French club Le Havre atanga a career tanin a hming chher takna erawh Lyon a ni a, 1998-2004 inkar khan French club lar thinah hian a khel – Ligue 1 nomawi vawi hnih a chawipui a, Coupe de la Ligue leh Trophée des Champions-ah a champion pui ve ve bawk.
2001-02 season khan Bordeaux-ah loan-in a khel zuai a, hetihlaia French club naran tak hi Coupe de la Ligue nomawi a chawipui a, hemi season-a Portuguese striker ropui Pauleta nena an in ‘man’ lutuk chu European football titi a tling pha.
Kum 2002-ah Lyon coach thar Paul Le Guen-a’n a chhuah phal tawh lo a, Dutch club Vitesse atanga Mahamadou Diarra lalut bawkin Juninho Pernambucano a awm bawk a, an pathum inkawp chu French football tihmuhnawmtu an tling – Ligue 1 nomawi an chawi reng a! He season-ah hian Lyon Player of the Year a ni hial.
Mahse, 2003-04 season-ah league nomawi an chawi nawn chungin Dhorasoo hi hliamin a tlak buak a, a dam hnuah ngai a awh lo – contract pawtsei duh loin AC Milan a zawm a, mahse, Andrea Pirlo leh Clarence Seedorf an awm avangin hmun pawimawh a chang phak lo a, Champions League 2005 final-a Liverpool an hneh loh tum khan bench-ah a thu.
A vanglaiin France tan vawi 18 a inlan a, goal khat chiah a khung thung – Zidane a awm miau avangin hmun pawimawh a chang hleithei lo a, Euro 2004 quarter-final a Greece an hneh loha Zidane , Lilian Thuram, Bixente Lizarazu leh Marcel Desailly an chawlh khan a tan vanneihna a her chhuak.
Raymond Domenech-a’n an team ‘creative player’ turin Dhorasoo a ring a, World Cup 2006 an tlin nana player thawhhlawk a ni. Mahse, Zidane a lo kir a, World Cup final an luh tum hian Switzerland laka rei lo te a inlan tih loh chu Dhorasoo a lut lo.
Dhorasso hian Domenech hi, “Tlang lawn turin kum hnih chhung min hrual a, tlang lawn turin ka inpeih ta maw tihah thenawmte fapa a thlang leh si a ni,” tiin a sawisel!
World Cup 2006 hnuah ram tan inkhelh a chawlhsan a, Paris Saint-Germain leh Livorno tan khel leh mah se club thuneitute nen an intihthiam loh avangin a contract an tihtawp sak ve ve a, inkhelh a chawlhsan.
Kum 2006 khan Starsport-in India a lo kal tumin, “Bench atanga Zidane thlak thintu nih chu a nuam viau lo maw?” tiin an zawt a, “Zidane nena khelh dun a nuam zawk,” tiin a chhang!
Tunah chuan French fourth division club Entente SSG-ah Chairman a ni mek e.
