#ZoFooty

September ni 5 ațanga țan tur, Durand Cup-ah Match Commissioner turin Pu R.Malsawma chu ruat niin Durand Cup-a Mizo MC hmasa ber tur a ni.

Tata Trusts Centre of Excellence Manager Asawma hian 2017 khan Match Commissioner course hi lo zirchhuak tawhin Pu Lalrawngbawla nen chiah Match Commissioner zirchhuak (pass) an la ni. Asawma hi local tournament-ah chuan MC lo ni fo tawhin national level-ah erawh a hnathawhna avangin a kal thei lo țhin a, tun țumah erawh a kal thei dawn ta a ni.

Asawma chuan “Hna lama kan buai theih em avangin ahmaa min sawm tawhna, National Sub Junior Tournament leh Santosh Trophy Final Round ah te ka kal thei lova, tun țuma ka kal thei tawh tur hi chu ka lawm a, ka theihtawp ka chhuah ang. Kal min phalsaktu Office (Neida, Tata Trusts) lama kan pute chungah pawh lawmthu ka sawi bawk e” tiin ZoFooty.com a hrilh.

Asawma hi group match 8 ah MC ah a țang dawn a, knock out stage-a duty tur erawh tihchhuah a la ni lo thung. Durand Cup ah hian substitution 5 siam theih a ni dawn a mahse vawi 3 ah siam zawk tur a ni. A rualin foreigner 4 an khel thei bawk ang.

Kolkata-a khelh tur Durand Cup ah hian team 16 an inel dawn a, champion lai chu Gokulam Kerala an ni. Durand Cup hi Asia-a football inelna upa ber a ni a, khawvelah erawh football inelna upa pathumna a ni thung.

2016-a zirchhuak Pu Bawla erawh national level-ah a lo MC fo tawh a, I-League 2nd Division, I-League U 18, Santosh Qualifier, National Junior & Sub Junior Tournament, National Senior Women, National U-17 Girls ah te a lo duty tawh a ni.

Tin, Pu Bawla hi Mizoram Premier League-ah MC a ni bawk a, heti chung hian MPL tel lovin national level ah țum 96 lai MC a ni tawh.