Chanmari West lakah AFC vannei

william-lalnunfela-aizawl-fc
Mizoram Premier League Round 9 inkhel hnuhnung berah Aizawl FC chuan William Lalnunfela goal hmangin Chanmari West FC sikhat faiin an hneh a, Aizawl FC goalkeeper khel tha Zothanmawia (T. Mawia) chu man of the match atan thlan a ni.

Jumbo thlahna
November 4, Zirtawpni zan inkhelh hmain Herbert Winston Vaughan (Pu Jumbo/Pu Zama) hriatrengna hun hman a ni. Jumbo hi Mizorama awm thin, Mizo nupui neia Mizoram ngaina em em a ni a, inkhelh ngaina tak niin a vanglai chuan East India a goalkeeper tha bera ngaih a ni.

Lammualah vawi duai lo lo khel tawhin Aizawl XI tante pawhin a inlan tawh a, a boral hmaa a thurochhiahah Lammual ngeia a puala hun hnuhnung siam tura a tih chu a chhungten bawhzuiin MFA pawhin a ngaihlu a, inkhelh hma hian a chhung leh khatte Sheffield, England atanga lokalte leh Aizawl, Shillong leh hmun hrang hrang atanga lokal khawmte leh player te mual laiah dingin mipuiin ding chungin an lo tawiawm bawk a, minute khat chhung ngawi renga dingin amah sunna hun hman a ni.

Chawlhlawk laiin Pu Jumbo puala hun hman chhunzawm niin TBC Zaithanpuia chuan zaiin mipui a awi a, a nupui Pi Rokamlovi chuan a vap chu Lammualah a thehdarh a ni.

A hmuhnawm
Inkhel tan atangin Chanmari West lamin bul an tan tha a, an nawrtuah an tang deuh char char. Minute 10-naah R. Laldanmawia hmangin goal an thun a, mipui lawma an au dar dar laiin West Warrior goal khung hi offside vangin pawm a ni lo.

Chanmari West an hlauhawm chhunzawm a, chutih laiin Aizawl FC pawhin an nawr ve reng tho. Inhnehtawk taka an innawr tawn laiin chance tha ber pawl tih theih Brandon chuan a hmu a, box chhunga a ball khalh luh nalh tak chu a pet goal lo hlauh.

Team lehlam lehlamin goal hlauhawm an nei ve ve a, Chanmari West goalkeeper Lalruatpuia’n (Mama) hna a ngah malh malh hle. Mual vei lamah Albert chuan ball tha lain box-ah a luhpui a, hei hi petin Chanmari West defender ten an dan per chu Ricky chuan kawh zet maiin a pet a, Mama chuan lo tawkin goal kham a per zui a, hei hi Ghanaian forward Bright Middleton Mends chuan goal zawnah a tauh thei lo.

Chanmari West pawh an awm mai mai bik lo a, shot hlauhawm tak tak an nei deuh reng a, striker PC Lalawmpuia’n (Tuaitea) Dampuia a pe a, West Warrior captain hian a khalh luh hnua a pet goal chu offside vanga pawm loh a ni a, mah se, Dampuia hi a offside lo niin a lang – Chanmari West tantute an lungawi lo hle.

Goal khat chauh
Halftime zawhah pawh team pahnihte an innawr tawn reng a, Chanmari West tan Dampuia leh Danmawia te an hlauhawmin Aizawl FC goalkeeper T. Mawia a lo che tha ve bawk a, Dampuia pet tha tak a, a dan hnuah Danmawia pet chu tha takin a lo dang leh bawk. Aizawl FC tan Ricky Lallawmawma leh H. Lalbiakthanga ten Chanmari West keeper Mama an rumthaih ve reng a, minute 76-naah Ricky cross chu William chuan tauh lutin, goal pawimawh a ni.

Goal a luh hnu hian Aizawl FC game a tha sawt a, Chanmari west hma tawngten theihtawp chhuah mah se an tlarhnung a phui that avangin point thum hlu tak an hlawh chhuak. Chanmari West hian hmatawngah Tuaitea an chhawr kha an tifuh lo niin a lang a, Aizawl FC pawhin Nigerian international nia inchhal Benjamin Onome an chhawr kha an chak loh pui lek lek niin a lang bawk. Benjamin hian MPL match thum a inlanah player naran a nih zia a la lantir chho zel a ni.

Inkhelh zawh hian MFA team leh Pu Jumbo team ten friendly match an khel a, 2-2 in an inhnehtawk bawk.

Ti hian, Chanmari West FC chuan point 16 hmuin pathumna an la ni chhunzawm zel a, Aizawl FC in point 16 tho hmuin head to head-ah an intluk a, goal difference-ah an chhiat zawk avangin palinaah tho an la awm.

Enge hmabak?
Chanmari West FC hian November 11-ah Dinthar FC an hmachhawn dawn a, hemi ni hian Aizawl FC-in Zo United FC an hmachhawn thung ang.

ZoFooty Statistics
Chanmari West FC 0-1 Aizawl FC
AFC : William Lalnunfela 76′
MoM : Zothanmawia. Aizawl FC
50% Ball Possession 50%
10 Shots 22
6 On Target 15
1 Yellow Cards 1
0 Red Cards 0
Powered by Rainbow Multibrand Mobile Showroom

Tute nge khel?
Chanmari West FC : Lalruatpuia, Toky Zomuanpuia, Racy K Lallremmawia, Vanlalzuia Hnamte, R. Lalawmpuia, K. Lalnunzama, Lalbiakhlua, Lalmuanzuala, R. Laldanmawia, Laldampuia, PC Lalawmpuia.
Subs: Lalmalsawma Hmar, Calvin Zosiamliana, JH Lallawmkima, Lalmuansanga, R. Lalremruata, H. Lallianzama, Ramengmawia, Lalnunfela.
Aizawl FC : Zothanmawia, Lalhriatrenga, Ricky Lallawmawma, Lalrinzuala Khiangte, Lalramchullova Pautu, Brandon Vanlalremdika, Rohmingthanga, Eniwo Benjamin Onome, William Lalnunfela, Albert Zohmingmawia, Bright Middleton Mends.
Subs: Sangtluanga, Jonathan Lalhriatkima, Lalramhmunmawia, Lalthakima, H. Lalbiakthanga, Vanlalthazuala, Lalnuntluanga, Jonathan Lalrawngbawla, F. Lalremsanga.

Posted in Mizoram, Tualchhung and tagged , , , .

Leave a Reply

Or