ZoFooty #FootballKaida

GERMANY-IN QATAR TICKET AN NEI TA
FIFA World Cup 2022 atana inpettling hmasa ber chu Germany an ni a, Hansi Flick-a hote hian nizan khan North Macedonia 4-0 hnehin Qatar zin theihna ticket an kawl ta.

Nakkum World Cup hi Qatar-ah nghah a ni dawn. Qatar hian vawi khatmah World Cup an la khel lo a, tun hi an vawi khat World Cup khelhna tur a ni. Tap chhak aṭanga mawlmang taka thlir chuan India tan pawha World Cup khelh dan awlsam ber chu thlengtu nih hi a ngei ang le.

December 2, 2010 khan Qatar-in World Cup an thleng dawn tih a chiang a, World Cup an khel dawn tih a hriat nghal bawk. Hmunruak 31 dang erawh qualifier hmanga zawn tur a ni a, champion lai France tan pawh inpetlin a ngai. Qatar dawta inpettling hmasa ber chu Germany an ni a, an inpettlin hun hi October 11, 2021-ah a ni.

PHUBA AN LA TA
Kumin April 1 khan MSV-Arena-ah Germany-in North Macedonia hi an mikhaul a, 2-1 in an hneh lo. Joachim Low kaihhruai Germany hian ball possession 70% an chang a, mah se goal zawnah vawi hnih chiah an pet. Goal zawna an pet zawng zawng hi goal pawh ni se 2-2 a la ni dawn tho. A tawi zawngin Die Mannschaft an khel ṭha tawk lo.

Nizanah erawh North Macedonia mualah an inkhel a, hetichung hian Germany-in phuba lak an ṭhulh lo. First half-ah goal an kung lo chungin second half-ah Kai Havertz (50’), Timo Werner (70’, 73’) leh Jamal Musiala (83’) te hmangin goal li an khung.

Flick-a hote hian 75% ball an chan bakah goal zawnah vawi 10 an pet a, Low-a hnuaia an inkhel nen a danglam ta. Germany thar hmuhin a awm a, World Cup champion tur khawpa fak hluai chi chu an la ni lo nachungin Group J-ah erawh an ṭha fal tih nemnghetin a awm.

A CHHEHVEL
Inkhel chhunga insawrbing loin a chhehvel lam hi an sawi zau ta zawk ila. Flick-a hnuaiah goal khat chiah an la chhuah a, captain Manuel Neuer erawh a la clean sheet vek thung.

Romania nena an inkhelh ṭumin Marc-André ter Stegen a rawn inlan a, Barcelona keeper ni loin Neuer pawh hi lut ta se, Ianis Hagi goal khung kha a chhuah tho ang. Mahse khelmuala an chetvel dan aṭanga thlirin Neuer chu chiang takin No. 1 a ni a, Germany tan bik chuan amah elpha reng an awm lo.

TLARHNUNG
Tlarhnung hi zau taka sawi ngai lo chu a ni ta. Flick-a hnuaiah match nga an khel tawh a, goal khat chiah an chhuah. Statistics aṭang chuan an record a ṭha a, mah se a takah chuan a ṭha si lo. World Cup ṭan hma ngeiin Flick-a’n a siamṭhat a ṭul dawn a ni.

Defence lai : Flick-a hnuaia an match hmasa ber Liechtenstein leh hnuhnung berah North Macedonia lakah Niklas Sule leh Thilo Kehrer te an inkawp. A bak match thumah Sule leh Antonio Rudiger te an inkawp thung. Lammuala zin tawh Sule-a’n bul a ṭan vek a, hmun pawimawh a chang. Kehrer hian PSG-ah khelhna hmun chan a harsat dawn a, Rudiger erawh Chelsea-ah a pawimawh. Flick hian player rin ngam pathum a nei a, a duh dan ang chiahin an inkawp fuh em tih erawh hriat a la har hle.

Hei erawh a hriat thung. Euro 2020 khan Low-a’n defence laiah player pathum Rudiger, Mats Hummels leh Matthias Ginter te a hmang ṭhin. Hummels hi squad-ah a la ko lo a, Ginter erawh bench-ah a awm leh tawh. Player pahnih tan World Cup-a tel pha/rinrawl ni tur chuan club tan chet ṭhat a ṭul tawh ang.

Right Back : Euro 2020-ah Joshua Kimmich chu right back-ah a awm ṭhin a, tunah erawh Kimmich hi a duh dan takin midfield laiah a awm dawn a, Flick-a’n right back thar a zawng mek. (Kimmich hi Germany right back ṭha ber a ni la ni tho!)

Flick-a’n Wolfsburg right back Ridle Baku a chhawr hmasa ber a , hemi hnu hian Borussia Monchengladbach midfielder Jonas Hofmann chu right back-ah a chhawr. North Macedonia lakah hian RB Leipzig right back Lukas Klostermann-a’n bul a rawn ṭan leh ta zawk a, Romania an hneh ṭum pawh hian Klostermann-a’n Hofmann hi a rawn thlak.

Hmunruak pakhat hi mi pathumin an inchuh rih mek. Baku hi match hmasa berah a khel tluan lo a, Iceland an hmachhawn ṭumin a zin ve loh bakah October thla international break-ah koh a ni lo. Wolfsburg right back hian Flick-a hmin zo lo niin a lang. Hofmann hi a che ṭha viau a, amaherawhchu Romania lakah wing back ni tura a tlan chak tawk lohna chu a hmuh theih. Glabach lamah midfield hna a thawk reng si avangin Flick-a rilru a hmin zan bik lo.

Klostermann hi Euro lai khan squad-ah awm mah se a inhliam a, dam ta reng pawh ni se Kimmich a tluk lo. Tunah erawh RB Leipzig right back tan Germany tana rinrawl nih theihna hun ṭha a inhawng a, bul a ṭan hmasak berah a khel ṭha. Mahse match khat chauh a ni, tih kan hriat a ṭha e.

Left Back : Euro 2020 thlir ṭhin chuan Germany left back tur chu Robin Gosens ni turah an ngai fur ang. Hei pawh a chiang leh tawh lo. Atalanta left back Gosens hi Liechtenstein lakah khel tluan mah se a bak match liah inhliam vangin a khel lo vek. Gosens aiah hian defence laia awm Thilo Kehrer hman a ni ber a, Romania lakah erawh Hoffenheim left back David Raum an chhawr ta zawk.

A tawi zawng chuan centre back leh left back-a chhawr theih Kehrer hi squad-ah a awm dawn tih chu a hriat theih nghal a, kum 23 mi Raum hian Gosens a dinhmun hi a ti nghing pha ang em tih hi zawhna a ni bawk. A tawpah erawh club khelhna a pawimawh ṭhin a, Champions League khel pha Atalanta player chu Europe-a inlan pha lo Hoffenheim player ai chuan a dinhmun a ṭhat zawk chu a rinawm fan e.

NOVEMBER THLAAH AW
Midfield leh Forward lam pawh han zirchiang nghal law law te pawh a chakawm a, mah se hei a sei lutuk ta hret. Germany chanchin chhiar peih lo phei chuan a tawp kharna lam phei chu an chhiar thleng tawh lo hrim hrim.

November thlaah international break a awm leh dawn a, Pathian zara dam chuan Germany chanchin kimchang rawn post leh kan tum dawn nia.