KHA ZAN KHA

Paris khawpuia Stade de France-ah FIFA World Cup final khelh a ni dawn a, champion lai Brazil in hetih hunlaia khawvela striker tha ber Ronaldo an kawl miau avangin an zam lo a, France hi a thlengtu mah nise khawvelin chak zawk ni turin a beisei lo.

Mahse rin loh tak maiin inkhelh chhung zawng Brazil thiampuipa a bo tih theih a ni a, Ronaldo hian a khel thei thlawt lo ! France defender te tan hlauhawm a ni pha lo a, keipui huaisen kha zawhte ang lek a ni ta.

Kha zanah khan Ronaldo kha engvangin nge kha ti khan a awm tak ? Eng harsatna nge a tawh tih chu mi zawng zawng hriat chak a ni.

Brazil team hian final an khelh dawn ni hian Chateua de Grande Romaine-ah chaw chhun an ei a, heta tanga hotel-a an haw hnu hian kum 21 a upa striker hian harsatna a nei ta niin an sawi. Ronaldo hi Roberto Carlos nen room khatah an awm a, room an thlen leh hnu hian nasa takin a khur a, a chil a phuan bawk a, amah leh amah nasak takin a inchum a, buaipui ngaiin a awm.

Team doctor leh a thiante an rawn lut vat a, theih ang angin an buaipui zui a. Ronaldo room a chhuahsan hian team doctor Lidio Toledo chu a tap niin an sawi.

He thil thleng vang hian Brazil coach Mario Zagallo chuan j.no.9 hi inkhelh bultantu zingah a telh lo a, khawvelin mak a ti. Zagallo leh Brazil team thuneitute chuan Ronaldo hi a inhliam a ni tiin khawvel hmaah he thil thleng hi an zep.

Brazil team member zingah pawh khelh tir duh leh duh lo pawl an awm niin an sawi. Ronaldo hi clinic ah hruai a nih hnuah test hrang hrang ah engkim a that vek avangin Zagallo hian hun tepter tawh takah Edmundo aiah Ronaldo hi a dah zui a, tangkaina erawh a nei teh chiam lo.

Mi thenkhat chuan Ronaldo hi ‘turin an hrai’ niin an ring a, thenkhat erawh chuan ‘depression’ nasa tak a neih vangin heti hian a awm ta mai niin an sawi bawk. Team doctor te’n a khup na chhawk nan a damdawi an pek chu a zo lo a ni an ti thung.

He thil thleng chungchangah hian Brazil sponsor tu Nike chu thuk takin a inrawlh niin an sawi bawk. He thil thleng chhui chiang tura din Brazil Paliamentary Inquiry Commission meuh pawh thu mum nei thei lo in a zuzi ringawt bawk.

Thudik tak erawh Ronaldo chauh hian a hre mahna…