July ni 26 aṭanga khelh ṭan tur, London Olympics Football-a inel turte chu group ah ṭhenfel an ni ta. Thawhlehni khan Wembley Stadium-a Boby Moore room-ah draw hi neih a ni a, England striker hlui Gary Lineker chuan draw hi a kaihruai a ni.

A thlengtu Great Britain hi Group A ah Senegal, UAE leh Uruguay te nen an awm a. Senegal hian Newcastle United striker pahnih Papiss Cisse leh Demba Ba te an ko tel dawn niin thuthang a awm a, Uruguay hian an duh chuan Luis Suarez, Edinson Cavani te ho an hruai thei bawk ang. Football tournament lian dang ang em emin ngaihhlut hlawh lo mahse Olympics gold medal awrh châk lo tunge awm ang?

Senior team a ṭha ṭhang Spain leh Brazil te hi Olympics ah pawh hian ṭha tura beisei an ni a. Brazil hian kum 23 hnuailamah Neymar, Ganso te ho an rawn thawhchhuahpui chuan an chhe zawk zawk lo ang. Spainish rawlthar rual ṭhatzia chu kan hria e.

Olympics football ah hian kum 23 leh a hnuailam an khel ṭhin a, team pakhatah kum 23 aia upa pathum zel an tel thei bawk a ni.

London 2012 ah hian mipa team ah Europe leh Africa aṭangin team 4 an tel a, Asia aṭangin 3, South America leh North America aṭangin 2 ve ve telin, Oceania aṭangin 1 an tel bawk a ni.

Men’s Olympic Football Tournament
Group A: Great Britain, Senegal, UAE, Uruguay
Group B: Mexico, Korea Republic, Gabon, Switzerland
Group C: Brazil, Egypt, Belarus, New Zealand
Group D: Spain, Japan, Honduras, Morocco

Women’s Olympic Football Tournament
Group E: Great Britain, New Zealand, Cameroon, Brazil
Group F: Japan, Canada, Sweden, South Africa
Group G: USA, France, Colombia, Korea DPR

source: fifa.com