Liverpool striker Luis Suarez chuan Liverpool football club-ah a hlim thu sawiin, tunhnaia Liverpool chhuahsan mai tur nia ‘ri ret ret’ awm chu a dik lohzia a nemnghet chiang hle.

Suarez chuan Liverpool official website hrilhin, “He club-a thuneitu ṭhenkhatte ka be tawh a, he hmunah hian ka hlimin nuam ka ti a ni tih an hria. Tuman min hralh tur thu emaw, min chhuahtir tur thu an sawi lo bawk. He hmunah hian inkhelh zel ka duh a, ka contract ah kum engemawzat ka la nei a, Anfield hi keimah chauh ni lo, ka chhungte pawhin nuam an tiin kan hlim em em a ni” a ti.

Pathianni zana Stoke City lama goal thun a, Liverpool in FA Cup semi final an luh theihna tura thawhhlawk tak Luis Suarez chuan a goal thun chu Bolton Wanderers midfielder Fabrice Muamba tân a hlan a. Kan hriat ṭheuh angin Muamba hi Tottenham Hotspurs leh Bolton te inkhelh laiin nikhaw hre lovin a tlu a, tunah hian damdawiinah enkawl niin, ṭhat lam pan hret hret mahse a dinhmun a la derthawng hle a ni.

“Hun harsa tak kan paltlang mek a, thuchah a ni emaw, engemaw hlan a ni emaw, Muamba hi kan ṭan a, kan duhsak tih lantir hi kan tih tur niin ka hria. Keimah chauh ni lo, England leh khawvel pumpuia football ngainatute a hnungah kan ding a, a ṭhatchhuah thuai beiseiin kan duhsak a ni tih hi amah mai bakah a chhungte pawh kan hriattir tur a ni.” tiin Liverpool striker hian a sawi. Stoke City lama a pet goal, Muamba tâna a hlan tak hi tun season-a Suarez-a goal 11 na a ni.

source: fifa.com