#ZoFooty
Samthang tlangval Dinpuia hian Mizoram Premier League (MPL) season 7 (2018)-ah khan Chhinga Veng FC tan khelin hemi season-ah hian CVFC chu table hmahruaitu ni chungin final a luhpui a mahse Aizawl FC lakah an vanduai a, Dinpuia erawh Best Defender ah thlanzui a ni ta tho.
Hemi season ah hian Chhinga Veng FC hian anmahni record lo siam tawh chu khumin record thar an siam a, top flight-ah match 26 chhung hneh loh nei lovn an kal tluang a, he record an siam naah hian Dinpuia hi player pawimawh a ni. Hemi season vek hian Chhinga Veng FC tan I-League season division-ah a inlan bawk.
Local football-a tawnhriat neițha Dinpuia hi Bethlehem Vengthlang FC ațanga hriathlawh niin mamawh hunah chuan striker ang pawn a chhawr theih a ni. BVT ah season hnih khelin MPL 6 ah khan final luhpuiin Chanmari FC lakah an vanduai thung.
MPL season hnuhnung berah khan Electric Veng FC chu final a luhpui a mahse Aizawl FC lakah an vanduai a, Dinpuia hian MPL nomawi erawh a la chawi lo a ni.
Zo United leh Luangmual FC-a lo khel tawh thin bawk Dinpuia hian I League hnuhnung berah khan Aizawl FC tan khelin club lian zawkte hmelhriat a hlawh a, Jamshedpur FC chuan kum thum chhung khel turin contract an ziahpui ta a ni.
Bethlehem Vengthlanga khawsa Dinpuia chuan “Chona thar hmachhawn tura India rama league sang ber, ISL Club ka zawm tur hi ka lawm a, ka lo chak em em țhin anih avangin ka theihtawp ka chhuah ang. State pawn club-a ka vawikhat khelhna tur anih avangin ka tan chuan engkim hi thil thar a ni, Mizo mipuite min lo tawngțaipui turin ka sawm a ni.” tiin ZoFooty.com a hrilh.
Jamshedpur FC ah hian Mizo pathum Ricky Lallawmawma, Laldinliana Renthlei leh William Lalnunfela te an khel mek a, Isaac Vanmalsawma erawhin Odhisa FC a zawm thung a ni. Jamshedpur FC-a Mizo 4 khel turte hi MPL lama tawnhriat nei tawh vek, local chhuak vek annih avangin a lawmawm lehzual a ni.
