Q6. Mizoram a football club te hi India ramah Second division khel ve turin a harsa em? A kal phung egtin nge ni ang? (I-leaque te hial khel thei club te nei ve ila tiin rual awh luatah duhthu k sam thin) – Rela ralte

Ans= ‘A harsa’ ti pawhin a sawi theiha, ‘a harsa lo’ pawh ti ila, a dik thei ve ve tho awm e. Han ngaihtuah mai chuan club in sum leh pai bakah player te an nei tha anih chuan thil harsa tak anih hmel loh!! State chhunga club inelna lianber (league or cup) a champion nih a, 2nd division qualifiers paltlang hnua khelh mai theih niawm tak a ni. Zawhna hmasa lam kan chhanna ang khan Mizoram Football Association (MFA) hian Football huangchhunga club te pawimawhna leh hlutna hi an ngaih pawimawh loh avangin ‘DAN / KALPHUNG’ mumal tak an nei ngai lova. Tualchhunga league / tournament a club chetha leh chechhia te kalkawng pawh an nei lova. Club engzatnge Relegate / Promote ang? tihte, league champion in i-league 2nd div. qualifiers an khel ang, tih velte hi dan mumal an nei lova, an duh duhin club an tirchhuak mai thin. Chuvang chuan an club duhsak zawng nih loh chuan kal thui a har viau a, duhsak zawng nih erawh chuan kal thuina chance pawh a tha hle thung. Engpawhnise, kum 35 vel zet kan ar khawthim dai hnuah MFA chuan hruaitu thar neiin mumal taka kal beisei a ni.

Q7. MFA chungchang Football a tui hle si hian kan state hi football infrastructure,basic needs ah kan pachhe hle mai a,hei hi kan MFA thiamloh vang nge sawrkar zawk,tin ramdang FA te hian sawrkar an mamwhloh tehreng nen,keini chu an pawisa hmuhna ber pawh MSSC atangin ania,hetiang hi kan FA ala nih si chuan,I-League thleng tura min hruaitu atan chuan anva laktlak awmloh ve. Engnge i ngaihdan? -Rinchhana Ralte

Ans= Football hi chu Mizoramah chuan infiamna lar ber a ni a, mahsela engchenin nge kan tui pui? tih hi hriatthiam a har hle. Hmunhma leh kawng hrang hranga hmasawn tur hian MFA hian tihtak zeta hmalakna leh thuneitu lam na taka nawr velte hi an neih hriat a ni ngai lova. Nimahsela Sorkar chuan tunhnaiah khelmual tihchangtlunnana phul-lem an phahte, khelmual mumal sak hna an thawh mek te chu sawi nuam an ti hle a, fak pawh an hlawh khawp mai. Ramdang FA in sorkar an mamawh lo, tih hi chu eng chungchangah nge an mamawh lem loh?…hriatthiam a har hle. Ram changkang zawkah te chuan football hruaitute hi milian tak tak an nih thin avangin kalphung mumal tak an nei a, hengahte hian sorkar nen an thawhhona chu a thuk hle thin zawk. Engpawhnise, India rama state zingah pawh a pachhe ber zingami kan nia, sports leh entertainment thil lamah hi chuan sorkar ngheng lo chuan thui kal a har hle.

Q8. Penalty chungchang D-Line kan tih mai chhung a foul zawng zawng hi penalty a hrem tur a ni vek em ni? Goalmouth zawn ni miah lo a kilsir daih a foul te pawh hi penalty an pe fo mai si a. -Samuel

Ans= Penalty area chhunga foul chungchang hi sawi tur a tam hle. Football danpui ah hian thil tisualtute hremna hi chi hnih – INDIRECT FREE KICK leh DIRECT FREE KICK hmanga hrem (offence) chi a awm a. Direct free kick a hrem theihna ‘foul’ hi mahni penalty area chhunga chawi a nih phawt chuan penalty kick hmanga hrem ngei tur a ni a. Goalmouth ani emaw ni lo emaw, penalty area chhung a nih phawt chuan inngaihnathiam theih a ni lo (FIFA-The Laws of the Game, Mizo tawnga SOCCERMANIA BIBLE tia kan chhuah tawh kha dan siamthar a awm nuala, a rawn chhuak leh tep e.)

Q9. Players salary chungchang Chibai,khawngaihin I-league players hlawhtlang pui hriat va chak awm ve,hmasawnna atan – Davidbuata

Ans= Mizo te leh mi tlemte tel lovin, India rama khua leh tuite’n mahni sum dehchhuah atangin chhiah an chawi thin a. Hetiang anih avang hian India ram chu chhiah awl ruk hisapa mahni sum dehchhuah thenkhat thup bo tum theuh chenna ram a ni a. Hetiang anih avang hian professional footballer te pawh an inthup ngar ngar thin a ni.

(Admin : Zofooties ten zawhna in rawn chhawpchhuah te Pu Mamuana’n a lo chhang thin a, heng ho bak ah hian a hma a zawhna te chhiar leh duh tan a sir a Q&A with Football Expert (Mamuana) tih column ah hian chhiar tur a awm e)