Mizoram Premier League (MPL) round 6 khelh zawh a ni a, vawiina inkhel hmasa zawkah Kanan FC chuan 7-4 in College Veng FC an hneh a. He inkhel hi tun tournament-a goal luh hnemna ber a ni a, rin phak bakin a hmuhnawm bawk. Kanan FC tana goal thun tute chu Lalruatsanga, Lalsangbera (2 goals), Vanlalhlua, Lalchhuansanga (2 goals) leh Malsawmtluanga (Puia) te an ni a. College Veng FC tana goal thuntute chu P.Laldinpuia (2 goals), K.Zonunmawia leh Lalrinawma te an ni.

Kanan FC hian point 11 an hmu a, Goal Difference nei tha zawk Aizawl FC leh Reitlang FC hnuaiah awmin table-ah palina an ni. College Veng FC erawh point 3 hmuin beisei an nei tawh lo thung.

Inkhelh hma chanchin
Nimin lamah Reitlang FC leh Aizawl FC an chak avangin Kanan FC tan chuan chak ngei ngei a ngai a. College Veng erawhin beisei an nei tawh lo thung a.

Kanan FC hian hmatawngah Puia leh Sangbera tho an rawn dah leh a. Midfielder leh Captain ni bawk Achhuana chu an defender tha te inhliam vangin defence laiah dah a ni a. Chak an tum hle.

College Veng FC paw’n point hmu hniam ber nih an tum lova, point hmuh an tum ve hle bawk a. Hmatawngah goal thun thei tak P.Laldinpuia an rawn dah leh a. Captain Mamawia chu defence atangin wing-ah sawnchhoh a ni thung. Tin, College Veng player te’n chhiat an tawh avangin an players an kim lova, hei hian team boruak a tichhe deuhva ngaih a ni bawk.

First half : Bul tan tha Kanan FC

Kanan FC hian bul an tan tha hle a, minute 2 lekah Kanan FC in Lalruatsanga hmangin an ti goal nghal a. He goal hi counter attack atanga lut a ni. Puia’n box chhungah ball a la lut a, a cross a, buai deuh nuaih nuaih kar atangin Ruatsanga hian a rawn ti goal a ni. Hemi hnu lawk hian College Veng FC lamin an nawr ve thung a. P.Laldinpuia hmangin chance a nei a, mahse keeper-in a save hman hlauh.

Kanan FC player Puia bawk a langsar leh a. Chance a nei zeuh zeuh a mahse a pet goal thei meuh lova. Mahse Sangbera tan erawh goal a siamsak thung. Minute 16 naah ball khalh lutin Sangbera tan a siamsak a, Sangbera hian keeper veilamah a push a, a pet goal a ni. Minute 16 chauh a la ni a, Kanan FC lamin goal 2 an thun der tawh a, mi tam tak chuan College Veng FC hi an sawp hrep an ring hman a ni. Chutih rualin thenkhat erawhin Kanan FC hian goal thun hmasa zawk mah se an zuih ral leh tho ang, College Veng FC lam hian an siphurh an sut leh tho ang ti pawl pawh an awm bawk a.

College Veng FC lamin Captain Mamawia hmangin goal an thun ve tep a, through ball tha tak a hmu a, a pet hman dawna rin anih laiin keeper-in ball a lo chhuhsak hman hlauh a ni. Kanan FC lam paw’n pet goal belh tumin an nawr a. Tin, College Veng FC paw’n goal phurh belh an duh tawh bik lova, an siphurh sut tumin an nawr ve bawk a.

Minute 39 na a ni a, College Veng FC lamin goal an thun ve a. P.Laldinpuia’n a pet goal a. College Veng FC lam an rawn phur thar a, entute rindan ang ngeiin College Veng FC lamin goal khat chu an rawn thun ve leh ta phawt a, an sut zawh ring an awm nawk bawk. Hemi hnu hian an innawr tawn a, College Veng FC te’n Sangbera an chan nasat lutuk vangin Puia’n chance a ngah phah a, a pet goal teuh thei hle a ni.

College Veng FC lam hian rawn draw-na chance tha tak an nei bawk a. Captain Mamawia wing-a an chhawr hi an tifuh a tih theih. An goal bawh a nat phah a, an nawr nat phah a ni. P.Laldinpuia bawkin chance a nei leh a. Box chhungah ball lo chest thlain a pet goal dawn emaw tih laiin a pet goal lo hlauh a, pet goal se chuan College Veng FC hi an phur thar anga result pawh hi a dang mah na. Mahse goal dang a luh belh tawh lova. 2-1 in first half a tawp a.

Second half : Goal a sur, goal 8 a lut !

Kanan FC Coach Asanga’n an chetsual leh a hlauh a. A naute a fuih nasa a. A chhan chu Theiriat FC nen an inkhelh tumin goal 3 an thun hmasa zet a, mahse Theiriat FC lam hian 3-4 in an rawn lehthal thei a ni. Hei vang hian Coach pawh a fimkhur hle a. Inkhel an tan leh a. College Veng FC lamin first half-a left back-a an hman Lakima pawh left wing-ah rawn dah tawhin an tifuh hle a. Lakima hian chance a rawn nei a mahse a pet goal lo hlauh a. Minute 49 naah Kanan player Vanlalhlua’n through ball tha tak a hmu a, a tlan luh puia a, a pet goal a, 3-1 in hma an hruai a.

College Veng FC Captain Mamawia’n minute 50 naah a rawn pet goal ve leh a. Through ball tha tak a hmu a, ball tlan luh puiin a khalh tlang a, a pet goal a. Minute 6 pawh a ral lo tihin College Veng FC lamin an siphurh an rawn sut zova. P.Laldinpuia bawkin minute 55 naah a rawn pet goal a. Lakima shot tha tak chu Kanan Keeper-in lo dang perin Dinpuia hian a lo pet goal thung a ni. Minute 55 chauh a la ni a, 3-3 a ni ta der a. Mi tam tak chuan College Veng FC zawk hi an chak an ring a.

Kanan FC khel a buai tan a, an down a, College Veng FC erawh an tang tual tual a. Captain Mamawia, Vanlalkohchhuaha (Puipuia) leh Lakima te’n chance an nei zeuh zeuh a, hmahruaina chance an neih an hmang tangkai thei meuh lo thung.

Minute 64 naah Kanan FC lamin Sangbera hmangin an rawn ti goal a, Sangbera hian kawh tawkin a pet goal a ni. Kanan FC an rawn phur thar leh a, draw an duh lova, chak loh phei chu an tum lo bur a ni. Sangbera hian hattrick siamna chance a nei a mahse a pet over hlauh a ni.

Minute 72 naah counter attack atang Kanan FC lamin an nawr a, Striker tlanchak Sangbera’n ball luh puiin Ruatsanga tan a cross thla a, Ruatsanga hian pet mai lovin Team Captain Achhuana tan a siamsak a, Achhuana hian awlsam tein a lo pet goal a ni. College Veng FC lamin Dinpuia leh Puipuia te hmangin an ti goal ve tep a, Kanan Keeper in ropui takin a save ve ve a ni.

Minute 75 naah Kanan Striker Puia’n mawi lutukin College Veng FC defender te bumin ball a la lut a, mawi zetin keeper a bum a, pet goal a ni. He goal hi chu goal naran a ni, mahse pet goal tura Puia ball lakluh dan mawlh kha a class a sang hle a ni. Dennis Bergkamp-a’n Newcastle defender te buma a pet goal kha min hriatchhuahtir rum rum.

Kanan FC lam hian goal 6 ngawt an thun tawh avangin an ‘selfish’ deuh a tih theih. Mahniin lak tlang an tum a, pet goal an tum vek tawh a. Ni lo se chuan goal 10 pawh an thun mah na ! Minute 89 naah College veng FC tan P.Lalrinawma chuan goal ropui a thun a, halfway line atanga hla vak lo atang a pet goal a. A pet goal-na hi a hla a, kawh takin a pet a, keeper man phak lovin a pet goal a ni.

6-4 in a tawp mai dawn emaw tih laiin minute 91 (injury time) ah Kanan Captain Achhuana’n a pet goal leh a, hun a tawp zui bawk a, 7-4 in Kanan FC an chak a, Aizawl FC leh Reitlang FC ten en point 11 vek hmuin table-ah palina an ni.

Sawi zui ang
Kanan FC te hian attacking players an nei tha a, goal pawh an thun hnem. Goal 7 hi tun playoff-a goal lut hnem ber a la ni a, mahse goal 4 ngawt an chhuah leh a. College Veng FC kha vannei phei se chuan 3-3 a an in draw lai khan 4-3 a hmahruaina chance an nei a. 4-3 khan College Veng FC lam khan hma hruai ngat se chuan an tlabuai hlen mai thei a ni. Match hnuhnung berah Kanan FC hian table-a sang ber Chanmari FC an tum dawn a, Chanmari FC hian chak loh zawn an duh dawn lova, chuvang chuan Kanan FC hi an tan hle a ngai dawn a ni. Goal 10 pawh thun mah se an lama goal 11 a luh chuan an chak lo tihna a ni a. Kanan FC lam hian chak an duh a, MPL an khel duh anih chuan an defence hi an thawm that ngei a ngai ang.

College Veng FC erawh beisei nei tawh lova khel an ni a. Pressure awm tawh miah lova khelh hi a nuam letling phian mai thei a ni. Kanan FC te hian attacking players an nei tha tih an hria a, mahse hlau miah lovin an nawr ve a, chance tha tak tak an missed a. 3-3 a an in draw lai phei kha chuan hmahruai theihna chance pawh an nei sang hle a. Tin, chhiattawh avang leh eng emaw harsatna avangin players te an khel kim thei lova. An match hnuhnung bera RS Annexe an khelh hunah an kim theih ngei beisei a ni. Annexe hian luhna chance an la nei a, mahse College Veng FC Coach Mpa chuan chak loh kan duh lova, chak ngei kan tum dawn a ni a ti.

Match Statistics
Kanan FC 7-4 College Veng
(Lalruatsanga 2′; Lalsangbera 16′, 64′; Vanlalhlua 49′; Lalchhuansanga 72′, 91; Malsawmltuanga 75′) – (P. Laldinpuia 39′, 55′; K. Zonunmawia 50′; Lalrinawma 89′)

MPL PLAYOFF ROUND 6 TABLE