#ZoFooty
Mizo zinga World Cup khel hmasa ber Lalengmawia (Apuia) chuan Indian Super League (ISL) champion lai Mumbai City FC a zawm niin Times of India chuan a tarlang. Mumbai City FC ah hian Ramhlun North tlangval, Hmingthanmawia (Valpuia) chu Mizo player khel lai mek a ni a, Aizawl FC Academy chhuak Valpuia hian vawiin khan Mumbaia cham chhunzawm tur hian contract a ziah belh nghe nghe a ni.
Tunge Apuia chu?
Vaivaikawn tlangval Apuia hian kum ruk a nih ațangin football a khel tan a, Subroto Cup-ah Mizoram tan khel tawhin Regional Sports Training Centre,Saidan, Kolasib ah a awm țhin bawk.
MPL U-17 ah a inlan tawh bawk a, hemi hnu hian AIFF Elite Academy zawm lehin 2017 FIFA U-17 World Cup ah khan India U-17 tan a khel a, Mizo zinga World Cup khel hmasa ber record a siam. 2017 khan Indian Arrows ah contract ziak zuiin 2019 khan North East United a zawm leh a ni.
Apuia tan 2020-21 season a hlu!
Apuia hian season liamtaah khan North East United chu table-ah pathumna nihpuiin semi final a luhpui a, mahse ATK Mohun Bagan hneh lovin final an lut zo lo.
Nimahsela Apuia hi a chetțhat em avangin ISL Emerging Player of the Season ah thlan a ni a, FPAI Young Player of the Year ah thlan a ni bawk. Tin, November ni 30, 2020 khan FC Goa nen an inkhelh țumin team captain a ni a, ISL-a Captain naupang ber record a siam a ni.
India senior team tana koh niin kumin March ni 25 khan India senior team tana a match hmasa ber a khel a, he inkhelah hian India chuan 1-1 in Oman an draw a, Apuia hian half time ah Rowllin Borges a thlak a ni.
ISL club inchuh ‘Apuia’
Apuia hian 2019-a Indian Arrows chhuahsana NE United a zawm khan kum thum chhung khel turin contract a ziak. Tunah hian a season hnihna a hmang zo chiah a, kum khat dang contract a la nei a ni.
Apuia hi a la naupang nain a thiamzia leh a talent hi tuman an hmuh hmaih lova, chuvangin ISL club liante chuan tun transfer hun chhung hian an inchuh ta a ni. Abik takin season liamtaa finalist, ATK Mohun Bagan leh Mumbai City FC ten an inchuh nasa hle.
Sum nei pahnih hian Apuia an neih theihna anih chuan sum tam tak thehchhuah an hreh lova mahse NE United erawhin Apuia hralh lova, contract ziah belh pui an tum thung a ni.
Vaibelchhe hnih man ‘Apuia’
Apuia hian NE United-a la cham chhunzawm hi a hreh hran lova mahse NE United hian club dangte angin hlawh an offer sang thei lova, chutak chu an buaina a ni.
NE United hian tuna an hralh loh chuan nakkumah a ‘free’ in a chhuak dawn tho tho a, chuvangin man to taka an hralh theih hunlai hi bawhpelh an duh bik lo.
Tichuan, ISL Club tam tak zingah Apuia ngam huai pahnih, Mumbai City FC leh ATK te chuan Apuia chu an inchuh ta zel a. Apuia hlutna ti sang turin Japan League sang ber (J1 League) Club FC Tokyo chuan Apuia hi an bia niin sawi a rawn awm leh bawk nen Apuia man hi a to phah lehzual niin sawi a ni bawk.
Tuin nge Apuia chu la lut dawn ta tia football ngaihventute an inhnial mek laiin Mumbai City FC chuan vaibelchhe hnih (2 crore) in Apuia hi an leichhuak ta niin Times of India chuan a tarlang.
Indian football ah Mohun Bagan leh East Bengal inhuatzia leh inhal zia kan hria mahse ATK Mohun Bagan Club hruaitu hlui pakhat chuan tunhnai bikah hi chuan East Bengal aiin Mumbai City FC nena kan inelna (rivalry) hi a ril zawk tiin a sawi hial.
Indian player man to ber ‘Apuia’
Apuia hi nikum khan ISL-a Captain armband hreng thei naupang ber record siamtu a ni a, kuminah record dang siam lehin Indian player manto ber a ni.
ATK chuan tun season tirh khan Hyderabad FC winger/forward Liston Colaco chu vaibelchhe khat velin an lei niin sawi a ni a, hemi hma hian 2019 khan ATK tho hian Jamshedpur atangin Michael Soosairaj chu nuai 90 bawr velin an lei niin tarlan a ni bawk. Apuia chuan he record dinglai hi a khum chiang hle.
India ramah erawh footballer te hlawhzat, man zat leh contract ziah dan hi ziah a ni thin lova, hei vang hian thuchiang tak hi hriat a har phah țhin a ni.
Apuia hlawhzat?
A chunga kan tarlang ang hian Apuia hlawhzat tur hi hriatthiam a har a, a man (vaibelchhe hnih) a san tawh em avangin mi tam tak chuan a hlawh a tam loh phah an ring. (Kan belh duh lawk chu. Apuia man zat, vaibelchhe hnih leh Apuia hlawh hi chu a hrang daih a ni. Vaibelchhe hnih hi chu NE United chan tur, Apuia man bik a ni. Apuia hian a hranpain hlawh a nei leh dawn bawk a, he a hlawh zat erawh puanzar a ni lo thung.)
Chutih rualin Apuia hian NE United leh ATK aia hlawh pe tam theitu Mumbai City FC a pan tih hriat a tha, chuvangin Mumbai City FC hian hlawh an pe chhiain a rinawm loh a, a zat erawh sawi theih a ni lo thung. Thil chianga ngaih erawh Mumbai FC hian rei tak chhung contract an ziahpui a rinawm a, kum 5 chhung tal contract an ziahpui a rinawm a, buy out clause pawh a to hlein a rinawm.
Țha taka inkhel zel turin ZoFooty.com chuan Apuia hi duhsakna kan hlan a ni
