Croatia leh Ireland te hi coach nei tha leh nei nghet an ni a. Croatia coach Slaven Bilic hi tun Euro 2012 a Lowe (Germany) leh Olsen (Denmark) te dawta team enkawl rei ber a ni a. Tunah hian Croatia hi FIFA ranking ah 8 n niin an hun tawnsan lai ber a ni. Ireland coach Giovanni Trapattoni hi Ireland a enkawl hmain club lian bakah Italy a lo enkawl tawh. Player lam en in English Premier League a hmelhriat an thahnem a. Ireland phei chu England ‘Second Team’ anga sawi ngam a ni hial. Croatia lamah pawh Modric, Jelavic te kan hmu bawk.

Line Up
Croatia: Pletikosa, Strinic, Corluka, Srna, Schildenfeld, Rakitic, Vukojevic, Modric, Perisic, Mandzukic, Jelavic
Ireland: Given, StLeadger, Dunne, O’Shea, Ward, Whelan, McGeady, Andrews, Duff, Doyle, Keane

Poland khua Poznan a inkhel ah Croatia in bul an tan tha zawk a. Inkhel tan atanga minute 3 na ah Wolfsburg striker Mario Mandzukic chuan Ireland goal ah remlo tak, mawi tak si in a tauhlut a, Croatia in hma an hruai nghal der mai. Ireland lam hi tha ngah zawk (physical) nia rin an nih angin free kick an hmuh te hmang tangkai tura rin an nih ang chiahin minute 19 na ah free kick atangin Ireland full back St Ledger chuan a tauhlut ve leh a, 1-1 a ni. Half time ah an inhnehtawk dawna a lan laiin minute 43 na ah Everton striker Nikica Jelavic chuan offside nia lang, linesman in a pharloh chu hmang tangkaiin Croatia goal hnihna a thun leh a, Croatia in 2-1 a hmahruai in an chawl.

Second half tan anih atanga minute 3 na ah Mario Mandzukic bawk chuan Croatia goal thumna a thun nghal a. He goal hi Borussia Dortmund midfielder Ivan Perisic a pek phei Mandzukic in a lo tauhluh bawk a ni. Robbie Keane chu penalty box ah Croatia defender Schildenfeld in a nemtlu a, referee in penalty a pekloh chu Ireland fans te tithinurtu a ni ngei ang. Balkan ho hian game an thunun chho a, inkhel pawh a tawplam thlengin a muang a, 3-1 in Group C a an inkhel hmasaber chu an chak ta a ni.

Man of the Match: Mario Mandzukic