Europe mai ni lo, khawvela football thiam ber ‘Spain’ inkhel hi football tuimite chuan en kan chak a, ngaihven loh pawh tum mah ila a theih tak tak loh a ni ber. Zaninah pawh Europe leh World Cup champion nilai Spain hian Euro 2012-a an match hmasa berah World Cup-a Brazil tih lova sulhnu nei tha ber Italy an tum a, beisei phak bakin a hmuhnawm a ni.

Italy hian 3-5-2 formation rawn hmangin kumdang ang lo takin defence 3 chiah an dah a, hei hian a entir chu attacking football khelh an tum a ni. Defence laiah Roma midfielder De Rossi an rawn hmang teh tlat bawk a. Spain hian 4-3-3 formation rawn hmang ve thungin attacking game bawk khelh an tum a. David Villa a inhliam avangin a aiah Torres a luh mi  tam takin an rin laiin Spanish Coach Vicente Del Bosque chuan rin loh deuhvin Fabregas a rawn hmang a ni.

Tute nge khel?
Italy :  Buffon; Bonucci, De Rossi, Chiellini; Maggio, Thiago Motta (Nocerino 89’), Pirlo, Marchisio, Giaccherini; Cassano (Giovinco 65’),  Balotelli (Di Natale 56’)

Spain : Casillas, Arbeloa, Ramos, Pique, Alba; Xabi Alonso, Busquets, Xavi; Iniesta, Fabregas (Torres 74’), Silva (Jesus Navas 65’)

Rin phak baka hmuhnawm first half 
Mi tam tak chuan Italy-in defensive game an khel ang a, Spanish-in attacking game. Italy an bet reng ang a, Spain-in pet goal an tum ang tih kha inkhelh en hma chuan kan ngaihdan a ni lawm awm e. Mahse a ni hauh lo mai.

Spain-in inkhel an kick-off a. A ngai te bawkin game mawi an khel a, ball an inpe kual nghal char char a. Italy lamin an um a. Mahse rei a ni lo, Italy lamin midfield a dah hnem an chhawr tan a, Spain an nawr a. Minute 10 a ni a, Spain lamin counter attack atang David Silva hmangin chance an rawn nei a, mahse De Rossi chuan pet out hman a. A hnu rei lo teah Sergio Ramos chuan box pawn deuhah Antonio Cassano a titlu a. Ball pet thiam hmingthang Pirlo chuan petin Casillas chuan a lo dang hlauh a, thawm a tha hman kher mai.

Inkhel an inhnehtawk chho zel a. Minute 22-ah Cassano chuan tha zetin a shot a, Casillas chuan a lo dang hman leh hlauh a. An innawr tawn a, Spain lam hian rin ang ngawtin ball an chang tam thei bik lova. Half chance an nei dun zeuh zeuh a, Cassano leh Iniesta-in an thun teuh thei hle. Italy lam counter attack-ah an hlauhawm thei hle bawk.

Juventus midfielder Marchisio chuan minute 43-ah Italy tan goal hma hruai a thun tep a, box pawn atanga a shot tha tak chu Casillas chuan a lo save hman hlauh a ni. First half tawp dawnah Xavi chuan ball tha zet Iniesta a pe lut a, a goal dawn emaw tih laiin Iniesta hian a pet over hlauh bawk. Spain lam hian an ui khawp ang le. Hemi hnu lawk hian Italy lamin chance tha deuh an nei veleh a, Thiago Motta chuan a head goal tep a, first half a tawp zui nghal a.

First half aia hmuhnawm Second half
Euro 12-a la hmuhnawm ber tihngam inkhelah hian first half en mai chuan chak zawk tur rin thiam a har hle a.Italy hi an chak daih mai ang a tih kha mi tam tak ngaihdan a nita zawk tlat mai.

Second half tan a ni a, first half ang bawkin game a rangin inkhel pawh a hmuhnawm lehnghal em em a. Spain lamin minute 50 naah Iniesta hmangin hma an hruai tep a. Hemi hnu lawk minute 52 naah Balotelli chuan Ramos-a tihsual nangchingin amahin ball a khalh lut a, ahmaah keeper chauh a awm tawh avangin a goal ngei dawn anih hi tih a ni hman a. Mahse Ramos chuan a hnung lam atang a rawn chuh buai leh hman a ni. Balotelli hi rang se chuan a pet goal ngei ang le. Anih loh vek paw’n Cassano kha pe se a goal mai thei bawk. Hemi hnu lawk minute 56-ah Balotelli hi Di Natale chuan a rawn thlak nghe nghe. Italy Coach Cesare Prandelli hian substitution a va siamfuh tehreng em ! Minute 61 naah Pirlo chuan mawi lutukin Spanish midfielder te a bum a, defender te inkrkah Di Natale chu ball duhthusam a pe a, ani hian mawi lutukin a pet goal a, thawm a va tha kher em ! Chak zawk tura mi tam zawkin an rin Spain-in si an phur ta zawk tlat mai.

Mahse rei a ni lo, minute thum bak ala ral lo tihin Minute 64 naah Spanish player te’n mawi lutukin Italy defence an thiat a, Silva chuan ball tha tak Fabregas tan a pe lut a, Torres aia lut Fabregas chuan mawi zetin a pet goal a ni. Hemi hnu hian Fabregas chhuakin Torres a rawn lut a. Torres hian a ‘first touch’-ah Italy defender te offside trap siamsual zar zovin chance a rawn nei nghal a. Champions League semi-final a Valdes a bum ang khan Buffon a bum leh ang a, a goal dawn anih hi tia rin anih tawh laiin khawvela keeper tha bera la chhal ngam Buffon chuan fing takin dive tur awm ang deuhva awmin a veilamah Torres a tlan khalh a, Torres hi ball a chhuhsak daih a ni. Torres hi a vanduai kanti dawn nge Buffon-a ‘class’ san vang zawk? Balotelli hmingchhe tur a rawn ti ziaawm a ni ber.

Minute hnih vel chauh a ral tihin bench atanga rawn lut thar Giovinco chuan Di Natale tan ball a vawrh lut a, mahse  Di Natale hian a pet over hlauh a ni. Midfielder nei tha zawk Spanish hovin game an thunun chho zel a, Italian players te’n chance an nei thei meuh lova. Torres rawn luh hnu phei chuan game a rawn thlak nasa hle a ni. Chance a rawn nei ngah nghal em em a. A vanduai zan kanti dawn nge a form loh vang zawk ni, a teuhin a ral zet a ni. Minute 84 naa Buffon a ‘chip’ khum te kha goal se chuan a va han nalh dawn tehreng em. Italy lam hian chance an rawn nei ve leh zauh a, hun tawp dawnah Marchisio chuan box chhungah ball la lutin uihawm takin a thelh leh a ni.

Goal dang a luh belh lova, 1-1 in an in draw a.

Neuh neuh
* Italy leh Spain hi vawi 29 an in tum tawh a. Spain hi vawi 8 an chak a, vawi 11 an in draw a, Italy hi vawi 10 an chak ve tawh thung.

* Major International tournament bikah hian vawi ruk an intum tawh a. Italy hi vawi thum an chak, vawi hnih an in draw a,Spain hi vawi khat chiah an la chak a ni. Spain chak chhun hi chu Euro 2008 quarter final kha niin penalty shoot-out ah Spain an chak a ni.

* An in tum tawp ber chu August 2011 khan niin Italy hi 2-1 in an chak a ni.

* Spain hian first 11 ah Barcelona player 5 leh Real Madrid player 4 an rawn hmang a. Italy paw’n Juventus player 6 ngawt first 11 ah an hmang ve bawk.

* Tournament tan hmaa match fixing vanga buai tak Italy chu rin phak bakin an khel tha a. An coach phei chuan tournament khelh loh pawh pawi a ti lo hman anih kha. Mahse hetiang deuh hian 2006 khan match fixing vangin an buai tawh a, World Cup-ah an champion ta tho va. An hmingchhiat kum hi an chet that kum a ni leh mai lo’ng maw?

* Kum dang ang lo takin Italy-in defensive game an khel lova, hei hi an thatpui zawk kan ti em? Champion lai pawh an hneh phah tep a ni.

* Spain hi chak zawk tura rin an ni a, tin champion tura rinkai ber an ni bawk. Zaninah khan Italy an hneh lo tep zawk a ni a, an champion kan ring leh em? Hei erawh kan hriat a tha. World Cup 2010 an champion tum pawh khan first match-ah Spain hian 1-0 in Switzerland an hneh lo anih kha.

* Spain hian experienced defender Puyol awm lo an tuar a tih theih a. Italy players ten chance an ngah a. Tin, Cassano goal pawh kha defender marking chhiat vang a tih theih. Ramos leh Pique an in man tawk lo a tih theih awm e.

* Tin, Spain khan David Villa awm lo an tuar a tih theih bawk a. Torres an ring zo si lova, a aiah striker ni lo Fabregas an dah a, chance a ngah lo mahse goal erawh a thun. Coach hian Torres hi risk ngam zawk se an tifuh ang em? Zanin paw’n minute 15 chhung vel chauh a khel chung paw’n game a rawn thlak hle a, chance a rawn nghah viau anih kha.

* Kumin Euro chu a tantirh zan atang ala hmuhnawm tluan zak a, chak zawka rin an chak lo fo ta mai. Hei hian football a ti hlu zawk kan ti em? Comment lamah sawi zui ang.

Statistics :