1. SECOND DIVISION I LEAGUE-AH MIZORAM CLUB PAHNIH
Mizoram Football Association hnuaia football club pahnih – Luangmual FC leh Aizawl FC-te chu AIFF-in Second Division I League qualifier khelh phalna a pe ta a, an document theluhte AIFF lamin an endik hnuah an pawmsak tawh a; nimahsela Aizawlah lo kalin an hmunhma leh an team inrelbawlnate an rawn la endik leh ang.
I League Second Division qualifier khel tur hian football club hi commercial entity a ni tur a ni a, private limited company anga inziah luh vek a ngai. AIFF lamin an duh angin tun hnaia an sum leh pai che vel te, an inrelbawl dan kimchangte an neih vek a ngai a, hengte hi ziakin AIFF-ah an thehlut vek tur a ni. Hei bakah hian I League second Division khelh an dilnaah hian coach atan AFC B Licence coach certificate nei an nei ngei tur a ni a, heng coach-te certificate tel lo chuan dil theih a ni lo.
Heng document zawng zawngte hi Luangmual FC leh Aizawl FC-te hian nei theiin AIFF-in an document neihte an pawmsak tawh a, Second Division I League qualifier khel thei turin provisional clearance an pe thei ta a ni. Football club-te hi AIFF duh ang chuan private limited company anga in ziah luh vek a tur a ni a, hei hi Mizoram lama football club-te hian kan la zawm hleithei lo a, thlen thui tuma tan la tur club-te chuan hei hi an zawm a ngai dawn a, tuna Mizorama football club dangte pawh heng tehnaah hian an la tlin loh avangin Second Division I League qualifier khel tur hian an la dil ve thei lo a, document nei tha leh Asian Football Confederations lamin club inrelbawlna dan a siam zawmte tan chuan MFA kal tlangin Second Division I League qualifier khelh dilna hi thehluh theih a ni a, MFA lam chuan Mizoram football club a tam thei ang berin he tehna hi zawm thei se a duh hle a ni.

2. RED RIBBON INTER VILLAGE FOOTBALL, 2012
Mizorama football intihsiakna ngaihhlut ber zinga mi, Red Ribbon Inter Village Football Tournament, 2012 chu nakkum February thla chawhnu lamah Aizawlah khelh tan a ni leh dawn a, MSACS leh MFA tangkawpin he intihsiakna hi an huaihawt leh dawn a ni.
Tun hnai khan Health Minister, Pu Lalrinliana Sailo; MSACS Project Director, Dr Eric Zomawia leh MFA hruaitute chuan Red Ribbon Inter Village Football Tournament, 2012 chungchang hi an sawiho tawh a, he tournament hi kum thara Mizoramin North East Games a thlen tur an zawh ruala tan theih turin ruahmanna an siam.
MFA chuan kum dang zawng aia Red Ribbon Inter Village Football Tournament hlu zawk leh boruak sang zawk neih tumin tan a la dawn a, khua/veng tel tumte chu a hma thei ang bera inbuatsaih turin a sawm.