Barcelona football club tâna goal thun hnem ber record siam turin Lionel Messi hian goal 4 emaw a la mamawh kan ti a, Barcelona players, staff leh fans te pawhin hei hi an hriat dan a ni ve tho. Mahse Thawhlehni (March ni 19, 2012) khan thuthar a awm ta.
FC Barcelona Center of Documentation and Studies leh La Vanguardia chanchinbu te ṭangkawpin an zirchian hnuah, tun dinhmuna Barcelona tâna goal thun hnem ber record nei mektu César Rodriguez chuan goal 235 ni lovin, goal 232 zawk a thun tih an hmuchhuak a, goal 231 thun tawhtu Messi nen an inthlauhna chu goal 4 ni lovin, goal 1 chauh a ni ta a ni.
Messi hian César-a record hi a khûm ngei dawn tih chu a chianna a rei tawh a, engtikahnge a khûm ang tih chauh kan nghak tawh a ni. César Rodriguez hi kum 1950 chho vel daih ami tawh a nih avangin hetia record vawndik loh palh pawh hi thil awm thei tak a ni awm e. A goal thun zat zirchiang tur hian La Vanguardia chanchinbu database pawh an haidarh hneh hle a, thil hriat tur pawimawh tak chu, a goal thun zat hi hrechiang tawh mahse, club lam chuan official takin an la nemnghet lova, an nemngheh thuai erawh rin a ni.
Tin, César Rodriguez record hi official match record chauh a ni a, friendly match leh charity match neuh neuh te nena belhkhawm veka Barcelona tâna goal thun hnem ber chu Paulino Alcántara niin, a ni hian game 357 ah goal 369 tehmeuh a thun. He record break tur hi chuan Messi ‘meuh’ pawhin hun a la duh rei deuh dawn niin a lang.
Barcelona hian Thawhlehni zana La Liga match-ah Granada FC an mikhual dawn a, an inkhelh zawh meuh chuan Barcelona tâna official match a goal thun hnem ber record thar a awm tawh maithei a. A awm a nih chuan, record neitu hming chu Lionel Messi a ni ang.
source: fcbarcelona.com
record thar a siam niah a lawm na’n hat-trick a siam nghal….
Messi hi tan toh teng.. A hahdam thlak ber ka ring..lol
A siam ta nge nge e. A thiam thlawt a ni.
khum ngei teh se
A dam a nih cuan a khum vek ag th k swi gam.
BVT… Messi nge nge a ropui e..
Messi hi chu a ropui thlawt a ni.. Paulino Alcántara record hi khum thei tak ang maw ! Post tha thuai thuai hle mai macha..
A va hnaih tawh tawh ther ther em ve le..Paulino record zawk pawh, reilo te ah a khum vat mei ang.