FC Barcelona leh Conscient Football tangkawp chuan naupang tan football camp a siam dawn a. Naupang te hi khawvela Youth Development Program tha ber hnuaia trained an ni dawn a ni. He football camp hi “FC Barcelona Soccer Camps” tih niin 2012 kumtir lam hian New Delhi ah hawn tum a ni.

Enge FC Barcelona Soccer Camp chu?

Nikum lam khan FC Barcelona Soccer Camps hi ram hrang hrang 22 zetah neih a ni a. Naupang 18,000 zet he camp ah hian trained chhuah an ni. Barcelona thiam zia leh ropui zia chu sawi ngai lovin kan hria, an senior team atanga an youth academy “La Masia residential youth academy” thleng hian khawvel-a a ‘ber’ pawl chu an ni zel a nih hi maw ! Messi, Xavi, Iniesta, Fabregas, Pique, Puyol, Valdes te pawh hi La Masia residential youth academy chhuak vek hi an ni nghe nghe. He FC Barcelona Soccer camp ah pawh hian naupang te hi Barcelona players te dawn ang a tha training pek an nih thu leh Barcelona-a cheng ang an nih thu an sawi hial a ni. He camp hian naupang te chu FC Barcelona official football school “FCBEscola” atan a buatsaih a ni.

Xevi Marce, FCBEscola Director chuan India ram a rawn cham chhungin heti hian a sawi a. “Conscient Football nen a kan inthlunzawm thei hi ka lawm tak meuh meuh a. Tunah chuan FC Barcelona Soccer Camps kal tlangin India ram hian FC Barcelona a hmelhriat a. India hi FC Barcelona tan hian a pawimawh em em a, India ramah football hi nasa takin a than phah dawn a ni.” a ti a ni.

Engtin nge training an neih dawn?

He training ah hian Technical Team te hi Spain atang an lo kal ang a, naupang te chu world-class training pek an ni dawn a ni. Training hi hlawm thumah then a ni a. Introduction, Pre-training leh training-ah te then an ni. He training hi naupang kum 6 atanga kum 17 inkar tana siam a ni a. He camp-a lut tur hian duhsak bik an nei dawn lova, a kal hmasa apiang an la dawn a ni. A sap tawng takin 1^st come 1^st serve basis-in an la dawn a ni.

Conscient Football hi enge?

Conscient Football hi Gurgaon-a awm a ni a, India rama football academy tha ber pawl a ni. An Technical Advisor hi Eric Jones a ni a. Football-a tawnhriat ngah tak, FA qualified coach ngat, kum 15 zet coaching experience nei tawh a ni. World class football academy-a siam tum mek a ni a, India ram mai nilo khawvel huapa players tha chher hi a tum ber a ni. Hmannia Uzbekistan-a zuk kal India U-16 team te pawh kha hemi hmuna trained chhuah hi an ni.

Conscient Football hian football chawisan lamah hna a thawk nasa hle a. Conscient Premier Football League (CPFL) te neiin mi 800 lai an tel a. Camp-te neih puiin khawvel hmun hrang hrang ah an zin pui thin a ni. All India Football Federation (AIFF) nen pawh an in thlunzawm a, an ni hian coaching lamah an lo pui a ni. AIFF ‘D’ License course pawh Heritage School, Gurgaon ah thla hmasa khan hman zawh a ni.

Anu jain, Conscient Football Director chuan an tum ber chu footballer naupang tak tak te chawisan a, world class training pek a nih thu a sawi a. Lungphum nghet tak phum a, khawvel huap a champion thei tur a siam hi an tum a nih thu a sawi bawk.

Mizo te hi vannei zingah kan tel ve dawn em?

Hetianga India rama an rawn kal hi thu lawmawm tak a ni. Mizo te pawh hian chance kan neih tha khawpin ka hria. India ramah academy mumal kan neilo, training tha leh mumal kan dawnglo tih hi kan chhuan lam a ni thin a. Tunah chuan hei kawng a in hawng zau khawp mai le. Tun atang hian hmalak a hun khawpin ka hria. Football hi tui ringawt a tawk lova, eizawn nan a hman tlak a ni. Kan tumna a san loh vang hian kan zuih ral leh mai mai zawk thin a ni. FC Barcelona Soccer Camps ah pawh hian a tam thei ang ber Mizo luh i tum ang u. Kan theih lohna tur ka hrelo. Keini tluka talent nei tha hi an awm bikin ka hrelo. Kan thatchhiat vang leh tumruh tawkloh vang mai mai hian a lawm kan thlen thui loh thin.

Chuvang chuan FC Barcelona Soccer Camps hi Mizo te tan vanneihna a ni ve dawn em le?