Nimin ni 10-02-2012 a Aizawl FC leh Green Valley te inkhel chu goal awm lo-a inhneh tawkin, Aizawl FC chuan vawi li khel tawhin table-ah pathumna kan ni.

Nimin inkhel hi entu an tha hnem ang reng hle a, mualneitu lam, Green Valley, Assam te hi khuang leh fans thahnem tak nen an rawn thawk chhuak a, a tantirh phat atangin an tang nghal hle tih a hriat. Goal hlauhawm tak tak pawh an nei nghal a. Green Valley chuan dinglam kil atangin an nawr deuh mawlh mawlh reng a, goal chance pawh an insiam nual mai. Aizawl FC lam pawhin passing mawi tak mai lantirin a khat tawkin an nawr ve reng bawk. Vawikhat chu Keeper rawn tlan chhuak tawh si nen. Aizawl FC goal line atangin defender, Chully chuan a pet chhuak a, Aizawl FC kan him hram.  Uiawm takin Clear chance vawihnih Aizawl FC lamin kan hmuhte goal-ah an thun thei bik lo. First Half-ah hian lehlam lamin chance an hmuh ang te goal-ah an chantir thei lo a. 0-0 in first half a zo.

Second Half a ni a. Green Valley lamin an rawn nawr na hle a, minute 60 velah D-line chhungah Green Valley lam tihthluk a nih avangin penalty Aizawl FC lamin kan chawi ta. Green Valley striker no 10 a rawn ding chhuaka, kawh tak maiin keeper dinglamah a pet, mahse Aizawl FC keeper a dive fuh hlauh mai. A nam chhuak a. Aizawl FC kan him hram. Aizawl FC lamin, an nawr tulh tulh a, chance pawh an hmu nual reng a. Sawmtea chu last defender a tlan pelh hnu-ah D-line hrul-ah chiah hnung lam atanga petthluk a ni a. Red Card tur a ni. Mahse Green Valley a mi chu yellow card pek a ni. Dinglam atanga Biaktea ball vawrh luh chu, a goal tawh dawn emaw tiin Aizawl FC tantute an lo au hman, Keeperin a kut hmawrin a khawih chhuak hman hram. Hun a tawp tep. T-a ball rawn um tlang chu Penalty box bulah shoot mai tawh tur, chhak lamah a pe chho leh rih. Hunin a daih ta lo. Hun a tawp a. Goal awm lo-in kan inhneh tawk ta a ni. Ni 14-02-2012, Thawhlehni hian Aizawl FC hian Southern Samity kan khel leh ang.

source : www.aizawlfc.com