Indian football ngainatute tan thu lawmawm tak a thleng leh ta. India Captain Sunil Chhetri chuan Sporting Clube de Portugal (a tawi zawngin Sporting Lisbon) B team a zawm a, kum hnih chhung atan contract a ziak a ni.

Sunil Chhetri chuan “European club lian pawl Sporting Lisbon-a ka khel thei tur hi ka lawm a, ka phur tak zet zet a ni. Hetiang hun hi a la thlen ringin ka nghak thin a. Tunah chuan ka nghak chhuak ta a ni. Hetiang dinhmun ka thlen theihna chhan hi chu ka agent Yogesh Joshee vang liau liau a ni a, a hnenah hian lawmthu ka sawi duh a ni.” tiin a sawi.

Tunge Sunil Chhetri chu?
Mi tam tak chuan tunge anih kan hria ang mahse chiang kuang takin kan la hmelhriat lo mai thei. Tlem azawng Sunil Chhetri chanchin hi kan han tarlang ang e.

Feet 5 leh inches 7 a sang, kumin August-a kum 28 tling tur Sunil Chhetri hi Delhi-a piang a ni a. A chhungte hnathawhna avangin Gangtok, Darjeeling, Kolkata leh Delhi-ah te an awmkual a. A awmna apiangah hian football thiam tiha sawi a ni a. Kolkata-a pawl 12 a zir laiin Asian School Championship (2001) khel tura thlan a ni a. Heta tang hian football luhchilhin lehkha zir a chawlhsan ta a ni.

Club Career
Mohun Bagan (2002-2005)
New Delhi club-ah bul tanin kumkhat chhung a khel a. Mohun Bagan chuan lo hmu fuhin 2002 khan contract an ziah pui a. A tir chuan khelhna chance a chang ngai meuh lova. Mahse a khel tha chho tial tial a. 2004 SAFF Games-ah khan India tana khel tura koh a ni a. Kum thum chhung Mohun Bagan-ah hian a khel a, goal 8 chiah a thun a ni.

JCT (2005-2008)
2005 khan JCT a zawm a. A season hmasa berah hian goal 2 chiah a thun a. Mahse a season hnih naah erawh a rawn che tha hle a. Goal 12 ngawt rawn thunin Indian player zinga goal thun hnem ber a rawn ni chhova. Hemi season (2006-2007) ah hian “Player of the Year leh Best forward”ah thlan a ni a. Tin, 2007 tho hian “AIFF Player of the Year” ah thlan bawk. Hemi award a dawn hian kum 22 chauh a la ni nghe nghe. A season leha goal 7 a thun a. Hemi season hian Portugal-ah India team-in summer camp an nei a. Portuguese second division club te chuan tha an lo ti tawh a, lak an duh thu pawh an lo sawi tawh a ni. Mahse hmalakna erawh engmah a awm lo thung.

East Bengal & Trail in Coventry City (2008-2009)
2008 khan East Bengal tan contract a ziak leh a. East Bengal-a a khelhlai hian Coventry City (England)-ah trail turin a kal a mahse a tling lo hlauh a ni. Kum khat chauh East Bengal-a a khelh chhung hian goal 7 a thun a ni.

Dempo SC & QPR trail (2009-2010) 
2009 khan Dempo SC a zawm leh a. Hemi kum hian “Football Players Association of India (FPAI) – Best Player leh Best Striker” ah thlan a ni a. Hemi kum vek hian English Club – Queens Park Rangers (QPR) chuan contract ziahpui an tum a mahse work permit a hmuh theih loh avangin a khel thei ta lo a ni. FIFA ranking-ah India hi a hniam lutuk a, top 70-ah a awm lova, hei vang hian work permit a hmu thei ta lova, Q.P.R-ah hian a khelh theih loh phah a ni.

Kansas City Wizards (2010-2011)
He mi hnu hian U.S.A lamah a kal a. Major League Soccer (MLS) club ‘Kansas City Wizards’ a zawm leh a. 2010-2011 season kha a zuk awm a. Kum khat chhung a zuk awm nain vanduaithlak takin league match pakhatmah a khel lo a ni.

Prayag United (2011)
2011 Asian Cup khelh dawn khan AIFF chuan Kansas City atang hian la chhuak a. Asian Cup khel zawh hian Kansas City a chhuahsan fel a. United Sports Club (tuna Prayag United hi) a zawm leh a. Match 7 ah goal 7 ngawt a thun a ni.

Mohun Bagan (2011-2012)
2011 khan Mohun Bagan-ah bawk a let leh a. Mahse duh angin a che tha tawh lova. A aia tha tih ngam Barreto leh Odafa an awm bawk nen, match 15 khelin goal 5 chiah a thun a ni. Kum khat chhung chiah contract a ziah avangin tunah hian free agent a ni tawh a, chuvang chuan a club duhna ber a zawm ta a ni.

Tin, club hrang hrang tana a game khelh tawh zat chu 117 niin goal 53 a thun tawh bawk a ni.

Sporting Lisbon (2012 – )
Nimin (4^th July) khan Portuguese second division ( Liga de Honra ) club – Sporting Clube de Portugal “B” team a zawm fel a, kum hnih chhung atan contract a ziak a ni.

International Career
Sunil Chhetri hian 2004 atang khan India tan a khel tan a. Hemi tum hian Pakistan-ah Asian Games an khel a ni. A goal hmasa ber chu Pakistan lamah a thun a. 2007 khan Nehru Cup-ah India a champion pui a. Goal 4 thunin India top scorer a ni bawk. 1997 hnua India-in trophy an chawi leh vawikhatna a ni nghe nghe.

2008 khan AFC Challenge Cup-ah India a champion pui leh bawk a. Goal 4 bawk a thun leh a, India top scorer a ni leh bawk a ni. SAFF Championship nikum December thlaa khelhah khan India champion pui lehin goal 7 zet a thun a, top scorer a ni bawk.

Tunah hian India Senior team tan vawi 58 khel tawhin goal 33 a thun tawh a ni.

Sporting Lisbon hi enge?
Sporting Lisbon hi Portugal club niin Portugal-ah chuan Sporting Clube de Portugal tih deuh kher a ni a. Hmun dangah erawh Sporting Lisbon tih mai zel a ni. Club upa tawh tak niin July ni 1, 1906 khan din a ni a, kum 106 zeta upa a ni.

European club zinga club hlun leh players chherchhuak hnem pawl tak an ni a. Portuguese club zinga hlawhtling ber pawl leh tawnhriat ngah ber pawl an ni a. FIFA Footballer of the Year pawh lo ni tawh Luis Figo leh Christiano Ronaldo te hi Sporting Lisbon chhuak langsar zualte chu an ni awm e. Tin, Nani, Quaresma, Rui Patricio, Simao, Hugo Viana, Luis Boa Morte leh Nuno Valente te pawh hi kan hre furin a rinawm.

Sporting Lisbon President Godinho Lopes hi thla hmasa khan India ramah a rawn zin a. Luiz Godinho Lopes chuan “ Indian football-in hma a sawn theih nan hian theihtawp chhuah kan inhuam a. Kan partner ‘Football One’ nen hian kan thawh hona a tha em em a. Anni hian technical knowledge leh coaching hmanga Indian football kan tanpui theih dan tur te pawh rem an ruat a ni. AIFF nena thawh hova Indian football chawikan hi kan duh a ni. Hemi atan hian a hmasa berah Sunil Chhetri pawh kan sign pui a ni” tiin a sawi.