1. October thla thleng Wilshere a chawl dawn

England leh Arsenal midfielder Jack Wilshere chu a la dam thei lo zel a, kumin October thla hma chuan a inkhelh theih a rinawm loh thu Arsenal manager Arsene Wenger chuan a sawi.

Wilshere hi a khup na avangin kum khat vel lai inkhel thei lovin a awm tawh a. Tun season-ah pawh bul a tan ve thei dawn lova. Tuna Arsenal-in pre-season tour an neihna, Asia-ah pawh a kal ve thei lova, May thlaa an zai hnu khan ball vawikhat mah a la pet leh ch hin lo a ni.

Wenger chuan, “A tha chho zel a, mahse kan dim hle a ngai dawn a ni. Doctor-te chuan a tha zel tih an sawi a, tunah hian gym-ah a kal leh tawh a, mahse July thlaa gym la kal player hi chuan August thlaa field chhung an lut thei lo tlangpui a, a lo let leh hun tur hi ka sawi chiang thei lo na a, October thla velah chuan kan beisei thei ang chu,” a ti a. Hemi hma pawh hian a inkhel thei thut lovang tih a sawi theih loh bawk.

2. Ka tel lovin United a kal thei – Sir Alex

Sir Alex Ferguson chu kum 70 a ni tawh a, Manchester United manager a ni reng thei dawn lo tih a hria. Mahse Manchester United hi a awm hma pawhin a lo awm tawh a, a awm tawh loh hnuah pawh a awm zel dawn tih a chiang a. ‘Ka tel lo pawhin Manchester United hi a nung reng ang,’ a ti.

Sir Alex Ferguson chuan amah thlaktu turin harsatna a neih a rin loh thu sawiin, he club hi mimala innghat ni lovin, a lungphum avangin a nung reng tawh dawn niin a hria a ni.

United hian season hmasa kha trophy la miah lovin an hmang zo va, pawisa hmang hnem Manchester City chu Premier League-ah an champion a, pawisa hmang hnem ve tho Chelsea pawh Champions League-ah an champion a ni. Mahse Sir Alex-a chuan Red Devils hi Premier League table chungnung berah an awm a ring tlat a, a awm loh hnuah pawh Premier League-a roreltu an nih tho a ring.

Daily Mirror-in an kawmnaah Sir Alex-a chuan, “Manchester United hian history ropui tak a nei a. Khawvel hmun hrang hranga tantu ngah ber a nih avangin mite beiseina pawh a sang a ni. Ka awm loh hnuah pawh he club hi a nung reng dawn tih ka hrechiang a ni,’ a ti.

Ferguson chuan, “Beiseina sang mahse, min thlaktu tan tuna kan tih ang tih theih lohna chhan tur a awm lova, he club ruhrel hi a tha tawk a, manager tha leh tawnhriat ngah a mamawh thung ang,” a ti a. “Tumahin he club enkawl hi an hreh ka ring lo,” a ti bawk.

Club ropui tak, Premier League-a stadium lian ber nei, training-na hmanrua changkang ber ber awmna Old Trafford chu player naupang zawkten tangkai taka hmangin Manchester United hi a than zel a beisei a, “He club hi lungphum nghet tak nei a ni a. Stadium ropuit ak kan nei a, training ground tha tak leh player naupang tha tak tak kan nei bawk a. Duh ila chuan tunah ringawt pawh hian first-team-ah hian kum 23 aia naupang hlir khelhtir tlak ka nei a ni. David De Gea, Rafael, Chris Smalling, Phil Jones, Jonny Evans, Tom Cleverley, Nick Powell, Chicharito (Hernandez), Jesse Lingard, Danny Welbeck leh Shinji Kagawa te hi he club hma lam hunah player ropui leh rintlak tur an ni,” a ti.

3.  India ramah Luis Figo

Portuguese footballer ropui Luis Figo chuan kumin November ni 1 hian India ram lo kal a tum a. Goa-ah lo kalin, Youth Football Festival a hmanpui ang a, football match a rawn khel ang.

Goa-ah hian School naupang tan Youth Champions League (YCL) an khel dawn a. School 250 aia tam mah an tel ang a, October ni 29 atanga November ni 2 chhung hian khelh an tum a ni.

He YCL huaihawttute hian tuna football khel mek, mi lar zinga mi chah chhuah an duh hle a. Mahse European League hrang hrang an tan vanglai tak a nih dawn avangin chah chhuah theih an nih hmel si lohva, chuvangin Luis Figo chu a chah chhuah man a lo tlawm deuh bawk nen, an chah ta niin an sawi.

YCL atang hian naupang 15 thlanchhuah an ni ang a, Portugal-a Carlos Queiroz-a Football Academy-ah ni 15 chhung training nei turin an tir dawn a ni.

4. Kum khata pound mtd. 10 hlawh duh RVP

Arsenal captain, Arsenal-a contract ziak duh tawh lo Robin Van Persie chuan kum khatah pound maktaduai 10 hlawh a duh a nih chu!

Arsenal hian Van Persie hi kar khata pound nuai khat leh sing thum (130,000 – India pawisa chuan, cheng 80 aia tam a ni a, 130000 x 80 = 10,400,000 – cheng maktaduai  10 aia tam!) hlawh turin an sawm a, mahse a duh lo. Amah duhtu nia sawi Juventus hnena Van Persie-a agent-in a sawidan chuan,m Van Persie hian a lo berah kar khatah £195,000 hlawh a phut a ni awm e! Heti zat hi a hlawh chuan khawvela player hlawh sang ber ber zingah a tel ve tawh ang.

A tirah chuan Italian Champions Juventus hian a hlawh phut zat hi an pe ngam lova, mahse tunah hian an inngaihtuah tha leh mek niin an sawi a. Hetih lai hian amah duhtu dang Manchester khaw club pahnihte hi chuan a hlawh chungchangah hian buaina an nei vak dawnin a lang lova. A chhan chu City hian Yaya Toure chu kar khatah £225,000 an hlawhtir mek a, United hian Wayne Rooney chu kar khatah £200,000 an hlawhtir mek a ni.

Arsenal manager Arsene Wenger chuan Van Persie chu khawvela striker tha ber zinga mi, Arsenal-a awm zel tura a duh a nih thu sawi mahse, tunah hian an player lei thar Lukas Podolski hnenah Van Persie-a jersey hak thin, number 10 chu a pe daih lawi a! Hei hian RVP hi a chhuak dawn nia rinna a tilian lo thei lo a ni. Chu a chhapah Wenger hian Podolski leh Oliver Giroud-te a lakluh bakah Spain atangin Fernando Lloriente lakluh a la tum bawk!

1. 5.       Japan nuho an thinrim

Olympic-a Japan ram aiawha football khel tur Japanese women’s football team, nikuma World Cup, Germany-a champion te chu London Olypics-ah pawh Gold medal la leh ngei tura beisei an ni a. An mipa football team-te erawh gold medal la tura rinkai an ni chiah lo. Hetih lai hian hmeichhe team-te hi thlawhnaah, economy class-ah kaltir an ni a, mipa lam erawh business class-ah kaltir an ni thung a, nuho an thinrim nasa mai!

Japanese FA chuan hetianga hmeichhia leh mipa class inang lova an zin tirna chhan leh mipa business class-a zin tir a, hmeichhia economy class-a an kal tirna chhan chu an sawifiah a. Mipa footballer-te chu professional deuh vek an nih laiin, hmeichhiate erawh chu professional ni lo, amateurs an nih vang niin an sawi a. Japanese infiammi zawng zawng, mipa footballer tih loh chu economy class-ah an kal tir tih sawiin, hmeichhe footballer-te chu medal la thei tura ngaih an nih avangin duhsakna tlem pek an ni a, ‘premium economy class’ pek an ni tih an sawi bawk.

Japanese hmeichhe star player Homare Sawa chuan, “Mipa aiin kan upa zawk a, heti lo deuh hian min enkawl se ka ti khawp mai. World Cup-a kan champion khan kan haw lamah business class-ah kan chuang a. Tunah pawh hian Olympic gold medal kan lak chuan haw lamah chuan business class-ah kan chuang haw ve thei maithei a ni,” a ti.

1996 atang khan Japanese mipa football team-te hi chu business class hlirah zin tir an ni tawh a ni.