Hringnun hian lawm zawng a nei a, tuipui zawng pawh a nei. Kum 19** ah khawvel eng ka lo hmu ve a, naupang tualchai rual ka nih chuan ka pa chu khawkhat Hockey khel thiam, H/S sport leh khua leh khua inkhelh-ah pawh a vaw goal thei pawl a ni tih chu kan khaw mite thusawi atang chuan ka hre ve a!! hei hi Thenzawl khua a ni e.

Mahse, sial rangin sial rang a hring tih chu ka tan chuan Dawt-Var a ni tlat. Hockey khel thiam chuan Football pet thiam lo, tuipuitu fapa a nei chu hriatthiam a har a ti awm mange!…

Kum 1994- ka tan kum chhinchhiah tlak!

Mizoram khaw nuam tak leh hmingthang tak, a sakhming Thenzawl chu mangthain he kumah hian Aizawl khawpui -ah chuan chhungkuaa in beng bel ve turin ka lo kal a. Kum lama naupangte e ti lo chuan rual u zawk ten min kaihruai a, College Veng FC manager MP-a ball pet lai ka hmu ta, tun hnu hian amah a ni ang tih ngaihna ka ring pha lo.Football chuan ka nunah bu khuar tanin, College veng field chu tlaiah ka pan ve thin.!!

Arsenal-in JVC tih chuang an ha!!
Ka tan a Khuanu belruat emaw tih mai tur chuan hun a lo inher ta tlat mai. Skylinks cable TV a lo chhuak a, ka pa nen bazar-ah kalin TV kan lei a, in thlen veleh chuan inkhel ka han hmet chhuak a. Tun hnua ka hming (nick) bula Arsenal ka dah chhan Arsenal team chuan Football game mawi tak an lo khel a, he hun atang hian ka thisen zun zam hian ARSENAL chu ka thlahthlam phal tawh lo. An jersey hma-ah tak chuan JVC tih inziakin , Ian Wright, Nicolas Anelka, Tony Adams, Ray Parlour, David Seaman, Lee Dixon sawi tur an va tam em!!! ka mutna pindan luchungah chuan ARSENAL team thlalak lian tawk chu tarin ka mut dawn apiang chuan ka en ta thin a, tun thlengin ka hmangaih hmasa hi ka la ban phal ta lo.

Diego Maradona vangin chatuan ram ka pan tep !
He thu in chhiar hian mak i ti mai thei, mahse han chhawpchhuah ve hram chu ka duh bawk si a, thamral atan chuan ka phal si lo.
ITI veng-ah kan pem thla a, zan khat chu Argentina team inkhelh tawhna (replay) chu TV-ah lo lang ta tlat mai. Ka pa chuan No 10 khi Maradona a nih khi a ti a, ngun taka ka en chuan thiam ka tiin a ke chevel te chu a rang ka ti hle a, a thlalak neih dan ka ngaihtuah ta a. Bazar ka chhuah ni chuan kawngkama dawrkai te ah chuan ball pet thiam thlalak an lo zuar teuh a, an dah khawm zingah ka han en kual chuan ka duhtak chu ka hmu ta a!! Rs 20/- an lo chhiar a, ka pawisa neihin a tlin si lo, dawrkai nu hnehah chuan ngengawl takin Rs 10/- in ka dil a, a ni chuan min leitir. Ka lawm lutuk chu engmah ka ngaihtuah tawh lova, in ka thlen chuan , kan in bang-ah chuan ka tar ta vang mai. Nuam hi ka ti em em mai a ni.

Khamah ka lum

A tuk zing ka tho chu , ka poster duh taka ka lei chu chhuatah a lo tla ni ngei tur a ni , ka chhungte’n kan kawmthlang ruam lamah hian min lo paih sak chu niin, ka zing tho chuan ka hmu zo ta lo chu ka han zawng kual vel a, kan kawmthlangah ngei mai chuan a lo tla a, chhar turin ka kal ta a. Ka hnawmhnawk rah chu vawilehkhatah a tla ta rup a, ko pang per atang chuan ka lum thla ta, thui tak ka lum hnuah chuan ka kal thei tawh si lo chuan ka chhungte chu ka au ta , an ni chuan Pathian khawngaihna leh zahngaihna vangin nung damin min rawn chhar chhuak thei hram a ni.

Ball ka pet ve thin
Chawsing (haha) tawt tak bunin ball ka pet ve thin a, M/S Zonal Sport , H/S Sport , District sports tih velah te chuan ka pet ve , mahse ka chem kalna tur ani lo niang nge, tunah chuan a rorel lamah kan awm ta. Ka thian RS FC Captain Sanga, AFC Rammawia, Dinthar FC Samuela, AFC Zohmangaiha, Kanan Captain Chhuansanga , FC Kulikawn KC-a, (sawi tur an van tam ve) te kha chu an lo thiam a nia nge tun hi an thleng ta. Heti chung hian Football thlarau hian ka nunah thu tam tak a sawi a, phak ang tawkin Club te kan han kaihruai chhunzawm ve a, MPL khel tur Reiltlang FC kan hneh ni a , champion no mawi kan dawm te kha a van nuam em!!

Ka hringnun-ah hian he game ropui tak hian thu tam tak sawiin , bu a khuar hneh ve hle a. Kan Mizo footballer Mama, Tuaitea, Samsona, etc te’n an jersey min han pe te phei hi chu vannei ka van in ti tak em!!

Sawitur a tam si a, hmun a tlem si, han duhtawk dawn phawt i la, Football ngainatu ka nih hi ka inchhir lova, ka nun kaihruaitu pakhat a ni ta tlat a nih hi.