Arsenal tan chak leh chak lohvin awmzia a nei tawh lova an Group-ah leader an nih tawh avangin an tling chiang tawh a. Chelsea erawh chak an mamawh a, an mamawh ang takin an chak bawk e. Arsenal leh Chelsea inkhel thlir bing ila, a dang chu kan kal pah thuak mai dawn nia –

Arsenal an chak lo
Group F ah group leader ni chiang tawh sa Arsenal chu Athens-ah va kalin, Olympiacos chuan 3-1 in an lo hneh a, a pawina a awm tawh vak lo.

He inkhelah hian Arsene Wenger chuan Arsenal tana a game 200-naah hian player naupang – Emmanuel Frimpong, Francois Coquelin leh England U-21 Alex Oxlade-Chamberlain te a khelhtir a. Chak lo mahse a player-te hian hlawkna an chhar thar a beisei thu a sawi.

Inkhelh banah Wenger chuan, “Chak lo mah ila player naupang zawkte hian hetiang game sang boruak hi an tem ve \ha ka ti a, \henkhat phei kha chuan a boruak an ngam hle a ni. Midfield-ah kan hneh lo tih loh chu kan khel \ha thawkhat e,” a ti.

He inkhelah hian Arsenal tan Yossi Benayoun chuan goal khat a khung a, Olympiacos tan Algeria striker Rafik Djebbour, David Fuster leh Francois Modesto ten goal an khung a ni.

Chelsea an chak, AVB a intithei
Chelsea chuan Stamford Bridge-ah Valencia 3-0 a hnehin Group E ah group champion niin knockout stage an thleng a. Manager Andre Villas-Boas chuan an hnehna hi Chelsea sawichhetute chhanletna a nih thu a sawi.

He inkhelah hian Didier Drogba chuan minute 3-na lekah goal a khung nghal a. Second half-ah Juan Mata thawh rah sengin Ramires chuan goal a khung a, hemi hnu hian Drogba bawk hian a khung leh a ni.

Villas-Boas chuan, “Inkhelh \an chiaha goal kan khung khan min pui nasa hle a ni. He hnehna hi kan zavaia hnehna a ni a, kan taksa leh rilru a paukhauhzia lantirna, min sawiseltute chhanletna \ha ber a ni. Mi tam takin min sawichhiat tumin min veh \hin a, vawiina kan hnehna hi chu’ng mite hmaia ben letna a ni,” a ti hmak mai!

Chanchibu mite hmaah, “A zialo khawp mai. Kan chak loh thu ziah in chak tehreng nen, naktukah chuan kan chakna ropuizia in ziah a ngai  dawn a, in tan ni hrehawm tak a ni dawn a ni,” a ti deuh kher bawk!

Inkhel dang thlirna
French club Marseille chuan Germany-ah Borussia Dortmund an tlawh a, 3-2 in hnehna an chang a, Group F a\angin group champion Arsenal hnung zuiin knockout stage an thleng a ni.

He inkhelah hian Dortmund hian first half-ah 2-0 in hma an hruai a, Jakub Blaszczykowski leh Mats Hummel ten goal an khung a. Loic Remy leh Andre Ayew ten second half-ah goal khungin an si phurh an rawn sut a, minute 87-naah Mathieu Valbuena chuan goal khungin Marseille chu an chak zawk ta daih a ni.

Group G ah tling chiang tawh APOEL Nicosia chu Ukrain club Shakhtar Donetsk chuan 2-0 in an hneh a, Luiz Adriano leh Evhen Seleznev ten goal an khung a. Zenit St. Petersburg leh FC Porto te goal awm lova in draw-in Zenit hi an tling bawk a ni.

Group H ah champion lai Barcelona chuan 4-0 in BATE Borisov an hneh a, Pedro chuan goal hnih khungin, Sergi Roberto leh Martin Montoya ten goal khat ve ve an khung a. Europa khelh hmabak Viktoria Plzen chuan Barca ang bawka tling tawh sa AC Milan chu 2-2 in an draw bawk.

Group E ah Bayer Leverkusen chuan 1-1 in Gent an va draw a, Chelsea-in Valencia 3-0 a an hneh si avangin Leverkusen hi pahnihna an nih phah ta a. He inkhelah hian Genk hian goal an khung hmasa a, hun tawp dawnah Leverkusen hian an draw hram a ni.