Manchester City players pahnih Adam Johnson leh Pablo Zabaleta te chuan an club-a an rinawmzia entir nan contract thar an ziak. Anni pahnih hi tun season-ah first XI an chang thei mang lova, player pawimawh ber tih tur ni chiah lo mahse squad player ṭangkai tak an ni.

‘Robben angin a la ṭha thei ang’ an tih ṭhin, English winger Johnson hian kum 2016 thleng daih contract a ziak a, Man City chu a tâna club dik leh ṭha ber a nih thu a sawi. Johnson chuan, “He club-ah hian hmabak ropui tak ka neiin ka inhria a, chuti ni lo se contract thar hi ka ziak lo ang. He hmun hi a nuam ka ti a, thil hi a kal chak em em a, kum 2 ka awm tawh chhungin nitin thil thar a thleng a ni ber mai.” tiin Man City club official website a hrilh.

Kum 24 mi Johnson hian January 2010 ah Man City hi a zawm a, bench aṭanga game thlak tura Mancini player rin ber pawl a ni.

Kum 2008-a Espanyol aṭanga insawn, left back Zabaleta pawhin kum 2015 thleng daih contract a ziak bawk. Zabaleta contract neih lai hi tun season tâwpah a zo tawh dawn a, hmalam hun chiang lo taka a awm laia contract thar a ziak thei chu a lawm thu a sawi.

Zabaleta chuan, “Team ṭha takah ka awm a, club leh fans te tan ka theihtawp ka chhuah ṭhin. Contract thar min ziahpui duh thu an sawi khan ngaihtuah pawh ka ngaihtuah buai lem lova, ka sign thei kha ka lawm hle zawk a ni.” tiin a sawi a ni.