Edwood Park-a inkhel hmuhnawm takah Chelsea in si khat faiin Blackburn Rovers an hneh a, top 4 team zingah an tel chhunzawm zel. He inkhela goal awmchhun hi English midfielder Frank Lampard thun a ni.

Tutenge khel

Blackburn: Robinson, Lowe, Samba (Hanley 45′), Givet, Olsson, Rochina (Dunn 72′), Nzonzi, Pedersen, Hoilett, Formica, Yakubu.

Chelsea: Cech, Ivanovic, Alex, Terry, Cole, Mikel, Ramires (Romeu 93′), Lampard, Mata (Meireless 82′), Sturridge, Malouda (Torres 45′)

Goal awm lohna first half

Team pahnihte chet chhiat lai a ni bawk a, inkhel tir lamah an fimkhur dun hle. Chak ngei ngei ngai ve ve ni mahse ‘pawngpaw goal nawr’ a awm lo. Blackburn Rovers in minute 4 ah pet goal theihna ‘chance’ ṭha lutuk an nei a, veilam aṭanga Formica ball cross chu hnai zet aṭangin Yakubu chuan a pet goal lo hlauh. Mual neitu lam tân tlarhmaah Swedish forward tlanchak Martin Olsson a langsar hle.

Blackburn khelh ṭhat lai takin, minute 12 ah Chelsea keeper Petr Cech chuan a hmaia hliam a tuar vangin minute 5 vel lai enkawl a ngai a, hei hian Blackburn game kaltluang lai a tichhia kan ti thei awm e. Torres leh Drogba tel lova khel Chelsea an khel ṭha sawt a, Mata leh Lampard ten inkhel an thunun chhunzawm a, veilamah Ashley Cole a langsar tawlh tawlh bawk.

Chelsea hian ball chang hnem viau mahse goal chance ‘ṭha’ an siamchhuak tam bik lo hle. Sturridge leh Mata ten half chance an nei a, mahse Samba leh Givet te an paltlang thei bik lo. Mual neitu lam hi tlarhnungah an inrem phui hle a, midfield-a roreltu Chelsea hi lehlam goal bulah an hawihai fo mai. First half tâwp dawnah Blackburn Rovers defender Christopher Samba chu inhliam vangin thlak a ni.

Lampard a la chuai lo

Second half an ṭan deuh chiah a, minute 51 ah dinglam aṭanga Ivanovic cross chu Lampard  chuan dive chungin a lo head goal. Lampard hi season tirlamah a che ṭha lo a, a kum a lo tam ve deuh tawh nen, mi ṭhenkhat chuan a ropuina hun a liam tawh niin an ngai hman hial. Mahse tun season-ah ringawt pawh midfield aṭanga goal 5 thun tawhin assist vawi 4 a nei tawh a, Chelsea ‘player pawimawh’ hian a thiam a la theihnghilh lo tih min hmuhtir zel.

Chak mamawh tak Blackburn in an nawrlet nghal. Minute 56 ah Pederson freekick chu Cech chuan manbet lovin a tiper a, hei hi Hanley chuan lo changin goal-ah a pet a, mahse keeper zawnah tak a pet hlauh. First half-a inkhel fimkhur tak min entirtute kha an ni ta lo emaw tih turin team pahnihte goal nawr a hmuhnawm a, second half hi chu Premier League game dik tak, hmuhnawm kan tih em em ang chi kha a ni.

Goal thun tuma innawr ve ve an ni bawk a, goal chance pawh a awm malh malh hle. Minute 67 a Alex tihsual zarah Yakubu bawk hlauhawm lehin mual neitu tân an siphurh a sût teuh hle. Chelsea pawhin Sturridge leh Torres hmangin an thun teuh hle bawk.

Inkhel tâwplamah player nei ṭha zawk Chelsea bawkin inkhel an thunun a, Blackburn lamin an siphurh sût tum viau mahse ball an chang tam thei lo. Minute 93 ah Fernando Torres-a’n a ṭhelh uihawm lehpek a, Ashley Cole ball cross chu goal bul sêt aṭangin a pet over hram. He goal a miss chiah hi chuan Torres pawh a nui ve tawp a nih kha. Huntawp thlengin goal dang a luhbelh lo.

Tichuan..

Premier League-ah a zawna game 2 an chak loh hnuah Chelsea in point 3 hlu tak an hmu a, game 11 ah point 22 hmu tawhin 4 na an ni mek. He inkhelah hian chak an phû zawk a, fans te duhthusam, game ropui la khel chiah lo mahse an game hi a ‘khawng’ riau mai a, a bik takin midfield-a Lampard, Ramires leh Mikel te an ‘solid’ hlawm ngei mai. A hmatâwng ho pawh an khel chhe hran lova, Mata leh Sturridge te hi hunrei tak chhung chu Chelsea innghahna an la nih ngei a rinawm. Tlarhnung erawh pawp lai a awm leh zeuh ṭhin.

Player malkhaiah chuan Manchester City nen Premier League-ah an ṭha ber a tih ngam a, season tâwpah team ṭha ber an ni thei angem le.

Blackburn Rovers in relegation zone an chhuahsan thei meuh lo a ni ber mai. Tunah hian 18 na niin game 11 ah point 6 chiah an la hmu a, Pathianni zanah Bolton leh Wigan te an chak phei chuan Premier League mawngphahah an awm dawn. Manager Steve Kean hian engtia rei tak la daih ang maw.