Chanmari FC-in Ramhlun North an beng harh


Ramhlun North-in Mizoram Premier League Season 7 champion an tum a, chumi tur chuan foreigner player pahnih an la fel. September 7, Zirtawpni zan MPL7 round 1 inkhel hnuhnun berah pawh Ramhlun North-in Calcutta Football League khelh vangin Ghana midfielder John Ampong la chhawr thei lo mah se Nigerian forward Waheed Adekunle hoin bul an tan.

Amaherawhchu Chanmari FC-in mumang ram atangin Ramhlun North hi an beng harh a, first half-a Lalnuntluanga leh Lalnunzama te goal hmangin 2-0 in an hneh. Ramhlun North hian an el tawk pui tura ngaih MPL-a vawi hnih champion tawh Chanmari laka goal hnih an chhuah avangin Mizoram chhunga inelna sang bera champion harsat zia an hre nawn ang.

Bul tan that!
Sap thufingin bul tan that a chanve zo a ti a, football-ah erawh bul an that hian goal a ken tel si loh chuan chak nan a tawk lo.

Ramhlun North-in tan phat atangin Chanmari an ngam nghal a, an nawr na nghal hle. Amaherawhchu Ramhlun North finishing a tha tawk lo a, Lalliansanga’n Chanmari defender Lalrosanga tihsual nang fuh mah se keeper Lalruatpuia a paltlang thei lo.

Coach F. Lalrozara hoten half chance dang pawh a nei a, goal an khung lo. Chanmari erawhin minute 10-na lekah Lalnuntluanga hmangin an chance neih hmasak ber chu goal-ah an chantir a, Bawngkawn tlangval ball pet chu an dan pial avangin keeper Liansangpuia tan dan ngaihna a awm lo.

Ramhlun North an vanduai chhunzawm a, Waheed Adekunle-a’n keeper Ruatpuia lakah penalty hlawh chhuak turah inngai mah se referee F. Lalramsanga’n Nigerian forward chu tlu derah puhin yellow card a pe thung. Inkhelh tan tirh ang thoin Ramhlun North an hmanhmawh zel a, goal chance an khung thei lo zel bawk.

Chanmari tan Khelo India best player Lalnunzama a rawn lang a, ani hian corner atanga ball hmuh chu minute 40-naah mawi zetin a tauh lut. Second half-ah Ramhlun North goal nawr na tura ngaih ni mah se Chanmari tlarhnung an inziam that tawh avangin a na chhunzawm tawh lo a, Lalruatliana Sailo (Tawia) hote harsatna hranpa nei loin an chak.

Hmabak
Chanmari FC-in round 2-ah Aizawl FC an hmachhawn nghal dawn a, September 13, Ningani inkhel tur hi tlai inkhel tur ni mah se a hmuhnawm ang. Ramhlun North tan insiamthatna hun a inhawng dawn a, September 14, Zirtawpni zanah kaithar Chawnpui an hmachhawn ang.

Thlirna Tawi
Chanmari FC 2-0 Ramhlun North FC
CFC : Lalnuntluanga 10′; Lalnunzama 40′
MoM : Lalnunzama, CFC

Posted in Tualchhung and tagged , , .

Leave a Reply

Or