Chelsea manager Andre Villas-Boas (AVB) chuan a midfielder pawimawh pahnih, Frank Lampard leh John Obi Mikel te chu Inrinni zan dar 8;30 pm (IST) a Everton nen an intum hunah an khelh theih tur thu a sawi.

English Premier League team zinga player nei ṭha ber (Manchester City nen) tih ngam Chelsea hian tunhnaiah an player pawimawhte an chhawrkim hleithei lova, an game hnuhnunga bera Manchester United an draw ṭum pawh khan Lampard leh Mikel te bakah hian captain John Terry, Ashley Cole, Didier Drogba te an khel thei lo vek a ni. Heng player te thlaktu tur player dang ṭha tak tak awm mahse, Lampard te ang player pawimawh an rawn kir leh hi Chelsea fans te tân thu lawmawm tak a ni ang.

Chelsea manager chuan, “Obi (Mikel) hi chuan kartluanin training a nei tawh a. Lampard hi Mikel aiin ni khatin a tlâi zawk a, mahse ani pawh ni hnih chhung chu a kan bulah a train thei tawh a ni. An pahnih hian Everton hmachhawn turin an fit tawk.” a ti.

AVB chuan Lampard rawn kir leh chu an ṭhat phah sawt tur thu sawiin, hrem tawj Ashley Cole pawh Everton nen an intum hunah a khel thei dawn tih a sawi bawk a ni.

Lampard a dam tawh lai hian captain John Terry erawh a la khel thei dawn lova. Ramires pawh a hliam a la dam hman loh avangin a inlan thei lo ang. Terry chungchang bik hi sawizawmin, a inhliam vanga chawlh pek a nih thu leh, tunhnaia field pawna buaina a neih chu a khelh loh chhan a nih loh thu a sawi.

“A inhliam avangin a la chawlh rih a ngai a, tunhnaia field pawna a harsatna nen inkungkaihna a awm lo. A hma pawhin Ashley (Cole) chawlh ka lo pe tawh a, Ivanovic te, Fernando (Torres) te pawh an inhliam chuan chawlh kan pe mai a, tunah John (Terry) hun a ni ve a ni mai.” tiin a sawi.

Chelsea hi Inrinni zanah Everton tum turin Goodison Park-ah an lenglut dawn a ni.

source: chelseafc.com