Chelsea FC chuan midfielder Jacob Mellis chu an training ground-a smoke grenade a lo kam avangin an ban a, a team-mate Billy Clifford erawh pawisa chawitir a ni thung.

He thil hi March ni 2-a thleng kha niin Chelsea training ground (Cobham)-a thil thleng a ni. Billy Clifford hian training ground-ah smoke grenade hi a keng lut a, Jacob Mellis hian a lo kam thung a ni. Hemi avang hian suspend nghal an ni a, Mellis chu an ban nghe nghe a ni.

Kum 21-a upa Mellis hian 2007 khan Sheffield United atang Chelsea a zawm a, loan in Southampton leh Barnsley-ah te a khel tawh bawk a. Chelsea tana a match hmasa ber chu season hmasa khan Champions League-a MSK Zilina nena an inkhel tumin a khel a, Josh McEachran a rawn thlak a ni. Clifford erawh kum 19 mi niin nikum September thla khan Chelsea tan kum li daih contract a ziak thar a, reserves team-ah regular player a ni nghe nghe.

Smoke grenade hi zing dar 10:30 hma, training tan hmaa kam a ni a, reserve team dressing room-ah kam a ni. Meikhu a chhuah nasat avangin building chhungah hian Fire Marshal-te tirh luh an ni nghal a. Players, officials leh staffs te chu a rang thei ang berin building atang hruaichhuah an ni a. A khuk nasat avang hian mahni sahimna zawngin an talbuai nasa hle a, an hmai pawh an theih ang tawk tawkin an khuh ve a, darkar khat chuang zet an buai hman a ni.

He thil thleng avang hian players te leh staff te chu an thlabar hle a, club hnenah pawh an sahimna ngaihtuah tha turin an dil a ni. Chelsea hi an che chhe thei hrim hrim a. Nikum December thla pawh khan youth dressing room ah chem char a ni tawh a mahse hei hi chu hnathawktute ta a ni awm e. January thla khan Ashley Cole chuan training ground-ah air rifle a keng lut tawh bawk a, student ke-ah a kap fuh palh tawh bawk a ni.