Kar kalta Zirtawp zana international friendly match khelhah Germany chuan Ukraine an draw hram!

Germany 3 – 3 Ukraine

Kiev khawpuia Olympic Stadium chei thara inkhelah hian Ukrain tan Andriy Yarmolenko leh Tevhen Konoplyanka te chuan goal khungin hma an hruai nghal a. Minute 38-naah Toni Kroos chuan Germany tan goal khat a khung ve a. Half-time hma hretin Serhiy Nazarenko chuan Ukraine tan goal khat a khung leh a, half-time a nih chuan Ukraine-in 3-1 in hma an hruai tawh.

Second half-ah Germany an rawn er let a, Simon Rolfes leh Thomas Muller ten goal rawn khungin 3-3 in an in draw ta hram a, Germany an mualpho thelh a ni.

Inkhel thlir kualna

Italy chuan Wroclaw-ah Poland 2-0 in an hneh a, Manchester City striker Mario Balotelli a langsar a. Minute 30-naah goal a khung a, second half-ah Giampaolo Pazzini goal khung tur a siamsak bawk.

France chuan 1-0 in United States an hneh a. Paris-a inkhelah hian Loic Remy chuan he inkhel a goa awmchhun hi minute 72-naah a khung a, yard 18 atangin Remy hian a pet goal a, a mawi kher mai.

Switzerland defending thatzia a lang leh a, Amsterdam Arena a inkhelah Holland striker ropuiten goal an khung thei lova, goal awm lovin Holland nen an in draw. He inkhelah hian Switzerland keeper Diego Benaglio a che ṭha a, goal ngei tura ngaih tam tak a dang a ni.

Hungary-in 5-0 in Liechtenstein an sawp a, Ipswich striker Tamas Priskin chuan goal hnih khungin, Balazs Dzsudzsak, Vladimir Komanleh Robert Feczesin ten goal an khung bawk.

Inkhel dangah Denmark chuan 2-0 in Sweden an hneh a,Nicklas Bendtner leh Michael Krohn-Delhi te chuan goal an khung a. Belgium-in Romania 2-1 in an hneh bawk a. Greece leh Russia 1-1 in an inhnehtawk a, Georgia chuan Moldova 2-0 in an hneh thung.
Mexico-in 2-0 in Serbia an hneh a, Manchester United striker Javier Hernandez chuan goal khat a khung a. Azerbaijan chuan 1-0 in Albania an hneh a, Burkina Faso leh Mali 1-1 in an in draw a, Cameroon-in Sudan 3-1 in an hneh thung.