Independence Day Celebration Invitation Football Tournament khelh chhunzawm zel a ni a. Vawiin hi ni 8-na a ni a. Match hmasa zawkah Chanmari FC in Oil India, Duliajan (Assam) 2-0 in an hneh a. Goal thuntute Team Captain Lallawmsanga leh M.S Dawngliana te an ni. Match hnih naah FC RS Annexe leh Luangmual FC 1-1 in an in draw a. FC RS Annexe tana goal thuntu hi Danny Lalduhsaka a ni a, Luangmual FC tana goal thuntu hi Lalrindika a ni thung.

Tihian, Group B atang match 3 khelha point 7 hmu awmchhun Chanmari FC-in Semi final an lut chiang tawh a. FC RS Annexe, FC Kulikawn leh Luangmual FC te’n chance an la nei vek a mahse FC RS Annexe leh Luangmual FC te hi midang khelha innghat an ni a, FC Kulikawn erawhin an match hnuhnung bera Chanmari FC an hneh chuan Semi-final an lut thung ang. FC RS Annexe-in Oil India hneh pawh ni se FC Kulikawn-in Chanmari FC an hneh ve tho chuan Annexe hi an tla thei a ni. Nilaithawhtannia inkhel tur boruak hi a la ‘hot’ hle a, match hmuhnawm tak kan hmuh ngei a rinawm. Chutih rualin Oil India pawh ONGC hnung zuiin an tla fel der a ni.

First match : CHANMARI FC 2-0 OIL INDIA 
(Lallawmsanga 62′) (M.S Dawngliana 90+4) 

Oil India hian Luangmual FC an draw avangin beiseina thar an nei a, Oil India Midfielder tha Zaia’n red card a hmuh avangin a khel thei lova, a aiah Mizo hnahthlak Matthew-a a khel thung a ni. Match 2 an la nei a, an chak ve ve chuan semi-final an lut thei dawn tih an inhria a, chuvang chuan chak an tum hle a ni.

Chanmari FC hian match 2 khelhah point 4 an hmu a, an kheltha tawlh tawlh a. Tin, he inkhelha an chak chuan semi-final an luh theihna chance a tha dawn a, an tan chuan a pawimawh hle a, chak an tum hle a ni. Match hmasa lamah team tha, Luangmual FC an hneh theih avangin an confi’ sawt a, play-off ah champion theihna chance an bawhpelh tawh avangin I-Day ah chuan champion an tum tawh hle a ni.

Tute nge khel?
Chanmari FC : Danny (GK), Zomuana, Rinchhana, Puia, Mpa, Msa, Tluanga, Hlutea (Chhinga), Sawmtea, Dawngtea, Lawmtea (Captain).
Oil India : Prandeep (GK),  Ragui, Biplob, Raju, Jyotish(Chandra), Ruata (Captain), Matthew, Mintu, F.Wary, Birjab (Bimkanta), Jayanta. 

Inkhel chanchin
Tun tournament-a inkhel hmuhnawm ber anih loh vek paw’n passing game hmuhnawm ber te zing ami a ni hial awm e. Inkhelh tantirh atang game a rang a, game a mumal a, a hmuhnawm hle a ni. Oil India hi an pasang a, high ball-ah an tha a, ball an vawrh nasa a. Chutih rualin Chanmari FC players te hi an sang hran lova, mahse ball an thiam em em thung. Passing game hmuhnawm tak kan hmu a, an te nain an ball in pass kual leh chevel a hmuhnawm a, an mahni aia sang an bum zeuh zeuh a ni ber. Chanmari FC formation hi 4-3-3 a ni a, an khelhdan style ber chu tun Euro-a Spain ho khelhdan ang kha a ni ber. Sawi tam ngai lovin kan hre vekin a rinawm. Striker mumal dah lovin midfielder 6 an dah pawh a tih theih awm e.

Oil India player te hi players tha thin, hna nghet neih tak avanga tlachhia kan tih te an ni hlawm a. An vanglaia players tha, an that avanga Oil India-in an lak an ni ber a. Hna nghet an nei fur tawh a, an fitness pawh a tha tawh meuh lo a ni. An ball khawih leh positioning erawh a la tha hle thung. Chanmari FC players te an thawkrim a, an fitness a tha a, an ball in pass vel a hmuhnawm a, Mizoram ‘Barca team’ tih ngam khawpin an passing vel a hmuhnawm hle a ni. Half chance kan hmu zeuh zeuh a, clear chance erawh hmuh tur a awm meuh lo thung. Chanmari FC lamin ball an chang tam zawk a, an nawr zawk a ni.

Second half-ah pawh Chanmari FC lamin bul an tan tha a, Oil India defender Biplob a khel tha a, a pawlte a chanhim a ni ber mai. Chanmari FC striker te a dang nasa hle. Oil Midfielder Ruata leh Matthew-a te’n an fitness that tawk loh an tuar a, Chanmari FC midfielder Msa leh Sawmtea te an chhaihbuai thei meuh lo. Minute 62 naah Chanmari FC lamin Captain Lawmtea hmangin goal an thun a. He goal hi a mawiin Lawmtea finishing a tha hle ! Tin, a siamsaktu leh ball laluttu Dawngtea’n fak a phu thlawt. Midfield battle a hmuhnawm a, Chanmari FC lam hian a khelhah hrim hrim pawh an hneh zawk a, mahse second half tawp dawnah erawh Oil India lam hian an nawr a. Inhliam vanga bench-a thu Captain Chhinga pawh a rawn lut a, Chanmari FC lam hian an goal humhim an tum a, counter attack atang nawr an tum a ni. Goal dang a luh belh dawn lo emaw tih laiin injury time-ah mawi lutukin goal hmasa siamsaktu Dawngtea’n a pet goal ve a. Dawngtea hian Oil India defender leh keeper bum tlangin a pet goal a ni. Chanmari FC fans an bengchheng hle. Inkhel a tawp zui a, 2-0 in Chanmari FC an chak ta ni.

Sawi zui ang
Kan sawi tawh angin OilIndia players te hi tha thin mahse hna nghet neih tak avanga tla chhia leh fit lo an ni hlawm a. An inpuahchahna a chhia a, kan Mizo players tha leh fit te hi an paltlang thei lo a ni ber. Chutih rualin kan tualchhung players te hian hma an sawn a ni tih ka sawi duh bawk. Players te inpuahchahna a tha a, an fitness a tha a, tualchhung players te hian fak an phu ngawih ngawih a ni. Chanmari FC players leh coaching staff te hi an fakawm a, MPL Playoff ah lah inpet tling hmasa ber an ni a. Tunah pawh an group atang semi-final lut hmasa ber an nileh a, fak an phu a ni. An thawkrim a, fans an nei tha a, an discipline a tha a, an tangrual em em bawk a ni. Match 1 na lei mah se an in pet tling tawh a, hahdam takin an group match tawp ber hi an khelh theih phah dawn a ni.

FC RS Annexe hian match 2 an khel tawh a, an tumpuite an la draw ve ve a. An match hnuhnung zawkah phei chuan goal 2 ngawtin hma an hruai tawh a, 2-2 in an inpawhthlak tir leh zawk a ni. Tunah erawh draw an tum tawh lo, an inkhelh hmain Chanmari FC in point 7 an hmu tawh si a, chak an tum ve hle a ni. Luangmual FC hian bul an tan tha a, FC Kulikawn an hneh a, Chanmari FC an hneh lova, Oil India an draw tawk a, point 4 an hmu a ni. An match hnuhnung ber a ni a, draw a thiang tawh lo, chak an mamawh a, chak an tum hle bawk.

Tunge nge khel?
RC RS Annexe : Rinsanga (GK), Zorema, Sangsanga (Captain) (Rinzuala), Zemawia, Rinchhana, Zonunmawia (Chta), Sawmtea, Sangliana, Liantea (Rinzuala), Danny, C.Tea
Luangmual FC : Saia (GK, Captain), Tea, B-a, Ruatthara, Mamawia (Robert), Lalmama (Biaka), Rsa (Bta), Ruatdika, Dina, Mka, Puitea

Inkhel chanchin
Draw tum lo ve ve an ni a. Inkhelh hmain ZoFooty chuan FC RS Annexe Coach Tawia kan kawm a. Defensive game zir ai chuan attacking game zir kan duh a, kan team tan chuan a pawimawh zawk a ni tiin a sawi a. Inkhelh tan tirh atangin an innawr tawn nghal a. Game a rang a, game a hmuhnawm a. Point mamawh ve ve an ni bawk a, an game pawh a open hle a ni. Chutih rualin chesual ve ve thei an ni tih inhre reng chungin awmze nei takin an innawr a. An defender te ve ve an fakawm a, chance nei thei lovin an insiam ve ve a ni. First half-ah goal a lut lova, an inhnehtawk hle a, Annexe lamin an nawr zawk deuh a ni.

Second half-ah erawh Luangmual FC lamin bul an tan tha a, Annexe lam an bet a. Luangmual FC lamin half chance an ngah a. Annexe erawh an bet tawlh tawlh a, midfield play an nei thei tawh meuh lova, counter attack-ah an innghat a tih theih awm e. Luangmual FC lamin draw an tum lova, chak an tum a. Chutih rualin Annexe lam hian match 1 an la neih avangin draw an pawi ti lo deuh niin a lang a. Mahse chak erawh an khelhdan atang an tum tih a hriat a ni. Goal inpe lovin an in draw dawn emaw tih laiin minute 90 naah Luangmual FC lamin freekick an hmu a. Dead ball specialist Lalrindika’n petin keeper Rinsanga’n ball a chang sual a, chiang zetin a goal a. Luangmual FC fans te an sapatal a ni ber mai. Entu te’n Luangmual FC an chak an rin laiin injury time ah Annexe lamin an siphurh an sut tlat mai. Luangmual FC keeper Saia’n ball a delay a, a keng rei deuh a. Referee-in a ham a, Annexe-in indirect freekick an hmu a. Striker finishing tha Danny-a’n ball a chang a, mawi lutukin a pet goal a, a placing a tha khawp mai. Hun a tawp zui a, 1-1 in an in draw a ni.

Sawi zui ang
Luangmual FC hian tournament bul an tan tha a, match hmasa ber an chak a. Mahse an zuih ral hman thelh a. Chanmari FC an hneh loh hnuah Oil India an draw hram a ni. Vawiinah pawh beisei an pha lova, chak an mamawh laiin an in draw a, an dinhmun a him ta lo a ni. Midang khelhah an innghat tawh a. Bul an tan tha nain an finishing tawih lo an tuar a ni ber mai. Players leh coaching staff te pawh an inenfiah deuh angai ang. Vawiina Captain Saia ball delay kha a tul lova, ani ang experience keeper tan chuan tih loh tur a ni. A chhan chun injury time-ah pawh a tawp lam a ni tawh a, ball kha pet chhuak nghal pawh ni se referee-in a ham tawp ngei a rinawm. Ball delay kual lo khan pet chhuak pawp se chuan an chak nimai tur. Annexe lam hian match 3 an khel tawh a, chak loh an la nei miah lo a ni. FC Kulikawn an draw kha chu an ngaihtuah letin an ui telh telh ang le. Vawiinah erawh a vannei zawkah an tang a tih theih. Players langsar an nei lova mahse an players neih ang chhun chhun an hmang thiam a, coaching staff te an fakawm hle a ni. Eng team pawh tum se an chai tawk thei zel a, an in adjust thei zel a, an team balance hi a tha hle a ni.