Zing dar 6 a ri a, ka alarm set chu a ri ta ṭang ṭang mai a. Zing tho hma ngai lo tih takah lu a hai deuh muai muaiin ka hria a, meng ṭha hleithei lo chungin bathroom lam ka va pan a, ha ka nawt a, hmai-te kan phih a, thawh hma manah stretching tih a ngai tih ka rilruah a lo lang  ve zawk mai. Kan thle kual ve ta ngiang a, kun pawh ka lo kun ṭha hleithei zu nia. Inrinni tuk, mutrei ni tak kan sacrafice ve pap mai chu a niah, khumah kan ṭhu leh rih a, ka room ka enkual a, zana ka dahchhuah tawh ka Camera ka ak a, pawn ka chhuak a, ka bike paw tak chu ka han tlawh nung dut dut a, ka tlanchhuak ṭan dawn chauh tihah thingpui dawr ka rilruah a lang ta tlat mai. Thingpui bakah Paratha 2 leh chhangban 2  ka ei puar leng lawng hnu chuan Joint YMA field ka thleng ta. A pui a pang te u tih hi ka rilruah a lo lang nghal zawk a. Kum 4-5 vel aṭanga kum 40 ral kai dawn tawh thleng hian an lo ri suau suau tawh a. A ṭhen an lo hahchawl tawh a, a ṭhen lah an ball boot an lo la bun ve mek bawk a, ka tlai em em lo a nih dawn hi ka ti ta a, ngaihngam deuh chuan field chhung chu ka va lut phei ve ta a ni.

Dinthar FC lam ka va hnaih tial tial a, an Managing Board member-te chuan min lo chibai ve liam liam a, an kaldan tur leh an hmalaknate chu min hrilh ṭan chu a ni ta der mai. Chutih mek lai chuan an player-te chu Coach Zara chuan exer a lo lakpui mek bawk a. An Secretary Mawitea chuan Samuela an lak let thu phur takin min lo hrilh a, squad an neih zatte leh an inbuatsaih dan ṭhenkhatte min lo hrilh nghal char char a.

Dinthar FC hi kum 1996 a 1st Division an luh aṭang khan anla tla thla leh miah lova, vawi duai lo competition hrang hrangah an lo champion tawh bawk.
Harsatna leh manganna tam tak tawk ṭhin mahse Dinthar Veng mipuite inpekna zarah tun dinhmun hi an thlen theih thu min lo hrilh bawk a. A ni lah tak a, Dinthar Veng hi Mizorama football ngaisang bertu veng ti ila kan sawi sual awm love.

Nikum Red Ribbon khan most rival veng Republic Veng nen he ground-ah hian an inkhel a, boruak a sosan deuh vangin inkhel tihtawp ngai khawpin a awm a, a tuk zingah Ramhlun Sports Complex-ah an inkhelh hun bang zawng inkhel leh tura ruahhman sak an ni a, hetah hian fans tumah kal phalloh an ti nghe nghe bawk. Mahse Dinthar fans faithfuls tam takten inkhel hi a rukin an en tho a ni. MFA league kan sawi tum a nih laiin Red Ribbon-te kan han sawi kai a, mahse hei hi Dinthar Veng-te fans an lo faithful zia tihlan tum vang chauh a ni e.

Tunah hian re-enforce player 3 an nei mek a, Red Ribbon Champion puitu Keeper MS Dawngliana te, Johny-a te leh Achi-a te an nei a, mahse an player rinrawl pathumten sipai lamah an luhsan ve bawk a, Manipur lama an player-te an thei lo vek bawk a ni. Coach Zara chuan tun dinhmunah hi chuan an Champion theih dawn leh dawn loh a chian loh thu leh huphurh engmah an nei loh thu a sawi bawk. Tunah hian an player-te kum zat hi a chawhrualin kum 22 vel an ni a, an ṭhalai seng sawng viau a ni. Anni hi MFA Cup tih loh Mizoram tournament zawng zawngah an champion tawh a, kumin chu MFA Cup hi chawi tumin bei ngawrh hle dawn tih team Manager Pu Tluanga chuan a sawi bawk.

Hemi tuk hian zing dar 11 thleng an practice a, 1st MAP Academy nen friendly match an nei a, 1-1 in an inhnehtawk a ni. 24th April Thawhlehni hian an match hmasaber an khel dawn a, Serchhip nen dar 3-ah an khel dawn a ni.