Vawiin ni 23 Apri1 2012, (Thawhtan ni) chhun dar 12:30 khan Khuallian Pu Lianzuala, Mizoram State Sports Council Secretary chuan 13th MFA Cup chu a hawng a. Pu Lianzuala hian playerte chu fuihin tun aia discipline tha an mamawh thu a sawi a. Team in a chhiatpuina tur pawh nise discipline chhia team atanga paih chu a duh dan a nih thu te a sawi. Hei bakah hian Rajiv Gandhi Stadium chu sak chhunzawm leh anih tur thu te sawiin, he stadium hi MFA Cup bik tan chuan special permission an pek thu a sawi a. Stadium hi sak chhunzawm leh anih dawn avangin khar anih tawh tur thu a sawi bawk. Khuallian in thu a sawi zawh hian Player introduction neih a ni a, hemi zawh hian inkhel tan nghal a ni.

Group A: Chanmari W, Kolasib FC & Theiriat FC
Chanmari W 3-2 Kolasib
(Lalhmlimpuia 53′; Lalfakmawia 76′; Jerry Zorinsanga 88′) – (Lalmuanpuia 13′, 79′)
Chanmari ‘W’ hi Second Division Team an ni a. Second Division hi Aizawl District Football Association hnuaia awm an ni. Chanmari W hi team tha tur zawka ngaih ni mahse inkhelh tan tirh atangin Kolasib in game an thunun zawk a. Minute 13 leka Lalmuanpuia hmanga an thun hnuin goal chance tam tak an thelh a, hei hi an tuar ta a ni. Second Half-ah Lalhlimpuia’n (Tat-a) Chanmari ‘W’ tan goal mawi tak a rawn thun a. Lalfakmawia goal hmangin hma hruai zui mahse chak tura dah chu harsa tak an ni. Hemi hnu reilo te hian Lalmuanpuia bawkin Kolasib tan rawn thun lehin, an in draw mai dawn emaw tih hnuah Jerry Zorinsanga’n (J-tea) chakna goal a rawn thun ta a ni.
Kolasib hi team tha a dah an harsa a, anni ang bawkin vawiin game atanga en chuan Chanmari W hi team tha a dah chi an nilo. Mahse Chanmari W hian player tha tak tak an kawl a, an insiamtha thei anih chuan an pool atangin an tlang theih tho a rinawm. Mahse tun dinhmunah chuan la khel lo Theiriat F.C. dinhmun hi a tha ber niin a lang.

25.4.12 (Wednesday) – RG Stadium
03:00 Kolasib FC Vs Theiriat FC
27.4.12 (Friday) – AR Ground
03:00 Chanmari West Vs Theiriat FC

Pool B: 3rd Bn MAP, Reitlang F.C.& Thingsul Zone FA
3rd MAP 2-0 Reitlang F.C
(Racy K. Lalremmawia 3′, 32′)
Reitlang F.C. hian boruak hranpa an rawn nei a, an team management a tha tih pawh a lang. Coach tha tak Chawnga nei mahse player quality sang an neiloh an tuar a. Team tha zawk 3rd Bn MAP lakah an tlawm ta a ni.3rd Bn MAP hian Champion turin theihna an nei a, vawiin lama goal hnih thuntu Racy hi Chanmari Champion team ami kha a ni a. Ani bakah hian MS-a (Aizawl Venglai), Hruaia (Durtlang), Lawma (Chaltlang), Puite-a (Sesawng), Roliantluanga (Mission VT) leh player tha tak tak an kawl bawk avangin an Pool atang hian an tlang ngei a rinawm.

25.4.12 (Wednesday) – RG Stadium
01:00 Reitlang FC Vs Thingsul Zone FA
27.4.12 (Friday) – AR Ground
01:00 3rd Bn MAP FC Vs Thingsul Zone FA

Naktuk inkhel tur
24.4.12 (Tuesday) – RG Stadium
01:00 Ramthar GSA Vs SYS FC
03:00 Dinthar FC Vs A.W. SC