Real Madrid German midfielder Mesut Ozil chuan Germany chu Euro 2012 a champion thei turin an ṭha tawk a ni tih a sawi a. Euro ah hian team hlauhawm an ni dawn tih entirnan France nen friendly match an khelh hunah pawh an chak ngei a ngaih tur thu a sawi bawk. Kum 23 a upa Ozil hi kum 2011 khan German player of the Year ah thlan a ni a. Mahse mimal chawimawina ai chuan July ni 1 a Euro trophy han chawi kân vel chu a ngaihlu daih zawk a ni tih a sawi bawk.

FIFA ranking thar ber-a pahnihna Germany hi Spain leh Netherlands te nen champion tura rinkai ber an ni a. Euro 2012 ah hian Netherlands, Portugal leh Denmark te nen an awmho dawn a ni.

France nen an inkhelh tur thlirlawkin Ozil chuan, “Eng team pawh hneh thei turin kan ṭha tawk a, European champion kan ni thei a ni. He game (France nen) hi kan nghakhlel tawh a, khawvela team ṭha ber pawl niin, champion tura rinkai ve tho an ni a, kan tân chuan chona lian tak a ni ang.” a ti.

Ozil hian Real Madrid-a a Portuguese teammate ṭhenkhatte chungchang pawh a sawilang a. Cristiano Ronaldo, Fabio Coentrao leh Pepe te nen nitin kan training ho a, Euro 2012 zawhah champion medal nena haw an tum vek a ni a ti.

“German national team ṭhat zia chu an hria. Champion an tum thu an sawi ṭhin a, mahse chak loh nei lo a group winner nih a, European champions nih kan tum thu ka hrilh tawh.” tiin a teammate te nen an infiamna a sawichhuak a ni.

Ozil chuan Germany an champion theih a ring a, tunge i rin ve le?

source: fifa.com