Inrinni zân Premier League-ah club lian an che ṭha tluang zel a, Manchester City an chak hnuah club lian dang Arsenal, Liverpool, Chelsea leh Tottenham Hotspurs ten an khingpuite an hneh vek a ni.

Arsenal 3 – 0 Bolton Wanderers

 (Robin van Persie 46′, 71′,  Song 89′)

Arsenal chuan Emirates Stadium-ah an mikhual Bolton Wanderers an sawp a, captain Robin van Persie chuan club tâna a goal 99 na leh goal 100 na a thun.

First half-ah team pahnihten chance an ngah lem lo a, Arsenal in nawr zawk mahse Bolton defence a khawng ve tlat. Koscielny, Gervinho leh van Persie ten an chance neih an thun lo a, Bolton lamin goal hlauhawm lutuk sawi tur an nei lo.

Second half an ṭan chiah a, game a danglam ta daih mai. Aaron Ramsey ‘through ball’ ṭha tak ûm tu van Persie chuan minute 46 ah Arsenal goal khatna a thun a, hemi hnu lawk, minute 55 ah Bolton player David Wheater chuan red card a hmu zui. Arsenal in game an thunun chhunzawm a, tlarhmaa awmte an che rang a, a bik takin Walcott leh van Persie te che vel a hmuhnawm. Minute 71 ah hemite pahnih hian Arsenal goal hnihna an siamchhuak a, dinglam aṭanga Walcott cross chu van Persie bawk hian a pet goal.

Arsenal goal 3 na hi huntawp dawna Alex Song tih luh a ni. Arsenal game a hmuhnawm a, season bul an ṭan ‘tak tak’ tawh dawn niin a lang.

Chelsea 4 – 1 Swansea City 

 (Torres 29′, Ramires 36′, 75′, Drogba 94′) ; (Ashley Williams 86′)

Stamford Bridge-ah Chelsea an chak chiang a, tun season-a an pet goal hnem ber ni turin Swansea City goal-ah vawi 4 an pêt lut.

Inkhel ṭantir lamah Swansea hian Chelsea hmatâwngte an dang bet thei viau a, mahse minute 29′ ah Fernando Torres chuan Chelsea goal hmahruai a thun a, hemi hnu hi chuan mual neitu hian inkhel an thunun tluan a ni ber mai. Torres goal-ah hian Juan Mata chip nalh tak kha kan hmuhhmaih awm lo e.

Chelsea tân Ramires a langsar leh a, Lampard awm lohna midfield-ah ro a rêl. Ramires  hian minute 36 ah counter attack aṭangin a thun a, hemi hnu lawk hian Torres chuan red card a hmu zui. Torres a ‘form’ leh tawh a, red card a hmuh hma hian a khel ṭha hle.

Second half-ah Swansea game a kâng hret a, mahse Ramires chuan minute 75′ ah a goal hnihna leh Chelsea goal thumna a thun a, mikhual tân Ashley Williams chuan huntawp dawnah a rawn chhânglet. Chelsea goal li na hi extra time-a substitute Drogba thun a ni.

Liverpool 2 -1 Wolverhampton Wanderers

(Roger Johnson (OG) 11′, Luis Suarez 38′);  (Steven Fletcher 49′)

Anfield-a inkhel hmuhnawm takah Liverpool chuan an mikhual Wolves 2-1 in an hneh a, he inkhelah hian Liverpool captain Steven Gerrard chuan tun season-a a vawikhatnan EPL a khel ve leh ta.

Liverpool in bul an ṭan ṭha a, minute 11 lekah Charlie Adam shot chu Roger Johnson chuan a lo dang pial a, Wolves keeper in a dang hman lo. Hemi hnu hian Wolves zawk hi an khel ṭha sawt a, mahse minute 29 ah striker ṭha mi Luis Suarez chuan Liverpool goal 2 na a thun a, Suarez bawk hian first half tâwp dawnah a pet goal teuh ngei mai.

Awlsam takin Liverpool an chak dawn emaw tih hnuah Wolves tân Steven Fletcher chuan minute 49′ ah a rawn thun a, second half-ah team pahnihte an innawrtawn chu hmuhnawm tak a ni. Lehlam lehlamin goal thun theihna remchang ṭha tak tak an nei a, mahse hun tawp thlengin goal dang a luhbelh lo a, a zawna vawi 2 an chakloh hnuah Liverpool fans te an nui ve leh thei ta.

Inkhel dang result

Wigan Athletic 1 – 2 Tottenham Hotspurs

(Diame 50′)                       (van der Vaart 3′, Bale 23′)

West Bromwich Albion 0 – 0 Fulham

Newcastle United 3 – 1 Blackburn Rovers

(Ba 27′, 30′, 54′)                    (Hoilett 37′)