Manchester United striker Wayne Rooney hming inziahna jersey chu Premier League players te replica shirt zinga hralh hnem ber a nih thu Premier League chuan a puang.

Khawvel hmun hrang hranga jersey hralh zat chhuitu hi Sporting iD a ni a, kum 1993 aṭang khan players te official jersey bakah, Barclays Premier League bungraw siamchhuah hrang hrangte engzat chiah nge hralhchhuah a nih tih a lo chhinchhiah thlap thlap ṭhin a ni.

Sporting iD hian Premier League history-a replica jersey hralhchhuah hnem panga a tarlang a. Hetah hian Wayne Rooney hi a sâng ber a ni. England captain hlui leh LA Galaxy-a khel mek David Beckham chu top 5 ah a langpha lo thung. Jersey hralh hnem pangate chu:

1. Wayne Rooney (Everton leh Manchester United)
2. Steven Gerrard (Liverpool)
3. Fernando Torres (Liverpool leh Chelsea)
4. Cristiano Ronaldo (Manchester United)
5. Frank Lampard (West Ham United leh Chelsea)

Bracket chhung ami hi jersey an hralh laia an khelhna club a ni.

Sporting iD Global Sales & Marketing Director Rob Thayne chuan, “Kum 2002-a Everton tâna a khelh hmasak ber ṭum khan Rooney kawr hralh zat kan chhinchhiah ṭan a. Kum 2004 a Manchester United a zawm hnu khan a jersey replica hralh zat hi a pung hluai a. Kum 2007 a Manchester United aṭanga Ruud van Nistelrooy a chhuah hnuah, jersey no 10 a hak hnu phei kha chuan elpha an awm tawh meuh lo a ni. Number 10 hi Rooney hero Dennis Law number hak ṭhin a ni a, Pele leh Maradona ten an lo ha lâr ṭhin bawk a, mi rilru-a a thawh dan a dang tlat a ni.” a ti.

Premier League a lar tawlh tawlh a, kum 20 kalta ai chuan tun dinhmunah Premier League players te hming inziahna jersey hi khawvel pumah hralh a tla lehzual tawh a. A bik takin kum 2003 vel aṭang khan nasa lehzualin jersey hralh zat hi a pung a ni. Hei vang hian top 5 ah pawh hun hmasa lama players te ni lovin, tuna la khel te an lang réng a ni.

Thayne chuan, “David Beckham kha Premier League ah chuan la khel se kan top 5 pawh hi a danglam maithei. Premier League nen kum 20 chhung thawhhona ṭha tak kan nei thei hi kan lawm a. Kan ‘market’ a zau tial tial a, Premier League fans ten players te hming leh number inziahna jersey an lei nasa tial tial a ni.” a ti bawk.

Sporting iD in an chhinchhiah hi original jersey chauh a nih a rinawm a, tlawm te te a helaia kan lo lei ṭhin hi a huam a rinawm chiah loh bawk.

source: premierleague.com