Premier League champion lai Manchester United chu Premier League champion thar ni tura beiseiawm ber an ni zel a, Pathianni zan khan Molineux stadium-ah Wolverhampton Wanderers chu 5-0 a sawpin hma an hruai chhunzawm a, pahnihna Manchester City nen an inthlauhna point 4 a ni ta.

Manchester United tân hian winger ṭha mi Antonio Valencia, Jonny Evans, Danny Welbeck leh Javier Hernandez (goal 2) ten goal an thun a ni.

Pathianni zana inkhel dangah Papiss Cisse goal hmangin Newcastle United in Norwich City 1-0 in an hneh bawk.

First half ah red card leh goal 3

Inkhel ṭantir lamah team pahnihte an inhnehtawk viau a, table mawngphaha awm Wolves hi thihtha in an ṭang tih a lang a, an game a ‘pa’ angreng khawp mai. Dinhmun inang lo taka ding team pahnihte hian chhan inang lo tak avangin mamawh thuhmun an nei a, chu chu ‘chak’ a ni.

Minute 21 ah Rooney corner aṭanga ball kal zel chu Jonny Evans chuan hnai set sawt aṭangin a pet goal a, hei hi Manchester United a a khelh hnua Evans goal thun hmasa ber a ni. Hemi hnu hian Wolves an phur ta lo sawt emaw tih mai turin an game a tlahniam. Midfield-ah Carrick leh Scholes ten ro an rel ṭan a, Wolves left back Ward-a’n Antonio Valencia a veng hneh lo ṭhin ngei mai. Minute 39 ah Wolves player Ronald Zubar chu yellow card pahnih a hmuh avangin hnawhchhuah a ni bawk.

First half tawp dawnah mikhual lamin goal hnih an thun a, counter attack aṭangin minute 43 ah Valencia chuan goal ropui a thun a, Danny Welbeck chuan minute 45 ah a pet goal bawk. Welbeck-a goal hi Valencia siamsak tho a ni. First half a zo a, player 10 a khel Wolves tan beisei tur a awm tawh lo.

Second half-ah Chicharito

Second half-ah pawh inkhel thununtu chu Manchester United bawk an ni. Valencia tlanna, dinglamah ball a tam a, Wolves player ten dan ngaihna an hre lo a ni ber. Minute 56 ah dinglam aṭanga Rafael cross chu penalty box chhunga vengtu nei lo Hernandez chuan a head goal a, minute 60 ah Hernandez hian mawi zetin a volley goal bawk. He goal siamsaktu chu dinglam aṭanga ball cross tu Valencia tho a ni.

Inkhel tawplamah Wolves hian khelh ṭhat lai nei ve bawk mahse United counter attack an veng zo lo teuh ṭhin khawp mai a, Rooney, Hernandez leh Welbeck ten chance ṭha tak tak an nei vek a ni. United in 5-0 a chak hi an phu a, anmahni aia game 1 a khel tlem zawk, pahnihna Man City aiin point 4 in an sâng tawh.

Team Line ups:

Wolves: Hennessey; Zubar, Bassong, Stearman, Ward; Davis (Jonsson 43′), Edwards, Foley, Jarvis; Doyle (Kightly 57′), Fletcher (Ebanks Blake 78′)

Manchester United: De Gea; Rafael, Ferdinand, Evans (Smalling 75′), Evra (Fabio 63′); Valencia, Carrick (Pogba 57′), Scholes, Welbeck; Hernandez, Rooney

Statistics:

Sawizui ila

Manchester United player pawimawh ber chu Wayne Rooney a ni a, mahse January thla aṭanga teh chuan Valencia tluka United in an ṭhatpui an awm lo. Tunhnaiah, a inhliam chhungin Europa league-ah an tla a, a khelh leh khelh loh inkar a hla thei hle. A dam ṭhat phawt chuan ‘right wing’ hi chu a ta a ni deuh ber tawh. Manchester United hian Premier League chiah beisei theih an nei tawh a, he tournament ah hian an champion thei a nih chuan, he Equadorean winger hi an champion theihna chhan pawimawh ber pakhat a ni ngei ang.

Premier League-a Manchester United elpui ber, Manchester City tum leh tur hmasa ber hi Chelsea a ni kher bawk nen, tun dinhmunah chuan United fans te thla a muang rih khawp ang le.

Wolves hi team hmuhnawm an ni ṭhin a, tunah pawh an la hmuhnawm reng. Team lian an khelh ṭum pawha passing game khel a, striker pahnih hmanga nawr ngam ve ngat ṭhin kha an ni. An tihfuh ṭum chuan rin loh deuha chak ṭhin, an tihfuh loh ṭuma si phur lawih ṭhin an ni. Tunah hian point 22 hmuin table mawngphahah an awm a, an league game hnuhnung 14 ah vawi 1 chiah an chak bawk a, season lehah Matt Jarvis leh Kevin Doyle te ho hi Premier League-ah kan hmu tawh lo maithei.

“Kha ai khan kan la khel ṭha thei” – Sir Alex

Inkhelh zawhah Sir Alex-a chuan a player te chu an ‘finishing’ ṭhat avangin a fak a, mahse a khelh hrim hrimah chuan hmasawnna tur an la nei tih a sawi. “Vawiina pawimawh tak chu, (Man City nen) kan goal difference inthlauhna goal 5 a kan tihniam hi a ni. Kan khel ṭha pangngai a, kan game kha special lem lo mahse player te an ṭang em em a, game pawimawhzia an hriat avangin an la thutak em em tawh a ni. He hmuna Wolves khelh hi a harsa ṭhin a, mahse vawiin chu goal kan thun thei em a ni.” tiin Sky Sports leh MUTV a hrilh.

Sir Alex-a chuan title race chu a la inṭan dawn chauh tih sawiin, “A tawp thlengin kan inum ka ring. Tunah hian game 9 a la awm a, game khat te te a kan chak chhoh nghauh nghauh a ngai tawh dawn a, a tawpa game khelh tur a awm tawh loh hunah chuan kan awm duhna-ah kan awm tawh ngei ka beisei a ni.” tiin a sawi.

Tunah chuan Manchester ‘sen’ zawk an pawr rih khawp mai a, Nilaini zanah Manchester ‘pawl’ hoin engtin tak chhanglet ang maw?