66^th Santosh Trophy, Cuttack Orrisa a khelh zawh takah Services chuan Tamil Nadu 3-2 a hnehin Santosh Trophy an chawi ta. He tournament-a Services ho player pawimawh leh an captain chu mizo pa ngei, Gordon Zoramchhana a ni. Kan hriat loh takin Services football team hi Indian Defence Services aiawha India ram football tournament hrang hrang a tel thin an ni a, tun tum Santosh Trophy-ah hian coach Sajith Kumar in a rawn hova, he hi Services in Santosh Trophy an chawi vawi hnihna chiah niin, 1960–61 kumah khan an lo chawi tawh bawk a ni.

First half ah goal khat
Final an khelhna hmun hi Barabati Stadium,Cuttack niin inkhelh hma leh inkhelh laiin ruah a tla a, hei hian ground a ti nal a, inkhelh pawh a tih harsat phah a ni. First half ah hian Services-in ball an chang tam zawk a, goal pawh an bawh zawk. A tir lamah Gordon-a hian goal a thun thelh a, goal ban a fuh hlauh. Tamil Nadu lam hi counter-attack ah an in nghat tawp a, minute 22-na ah Jayakumar-a hmang in an thun ve thelh a. Minute 44-na ah pawh Charles Anand Raj hmangin hma an hruai hman teuh hle. Amaherawhchu first half tawp dawn, minute 45-na ah Services lam hian counter-attack atangin Sanju Subba chuan kawh zetin a pet lut a, 1 – 0 a hma hruaiin chawlh lawk an hmang a.

Second half ah goal 4 a lut e!
Second half tan hnu reilo te ah Services lamin hma an hruai lehnghal a. Minute 49-na ah Services goal shot chu Tamil Nadu keeper in lo man pial in, Subrata Sarkar chuan awlsam takin a lo pet lut a. 2–0 a ni tawh a, Tamil Nadu in an defensive game plan a fuh lo tih hria in rawn nawr an tum a, hei hian Services lam tan hmunawl a siam sak a. W.Farhad chuan minute 67-na ah Services goal thum na a rawn thun. A chak zawk tur a chiang thawkhat tawh a, Services lam hi an che ‘nawi’ thut te anih loh chuan an champion ngei ang. Tamil Nadu lam hian  awlsam taka Services chak tir mai an tum bik lo a, goal an rawn bawh ve tan a, minute 82-na ah substitute atanga rawn lut Santa Kumar chuan an siphurh a rawn rul nghal. Hun tawp dawn minute 89-na ah M.Ramesh chuan Tamil Nadu goal hnihna rawn thun ve lehin, an goal hnih hi an siphurh rul zo turin a tawk miau lova, 3-2 in Services ho an chak a, an champion ta a ni.

Services an champion na kalkawng chu…
Services hi team tha tak mai an  ni a, Santosh trophy final pawh ahma in vawi 6 lai an lo in pet thleng tawh a ni. Tun tum ah hian champion zing ber leh rinkai ber West Bengal chuan beisei an pha lo hle a. Group A-ah awm in point 4 chiah an hmu thei anih kha. Group tina pakhatna te’n semi-final an khel a, Group-A atangin Kerela, Group- B atangin Manipur, Group- C atangin Services leh Group-D atangin Tamil Nadu te’n an khel. Services hi an coach Sajith Kumar chuan attacking football diktak khelh puiin, group stage ah an tumpui te lakah goal an thun hnem em em a, game 3 ah goal 11 lawih an thun hman a ni.

Semi-final ah Kerela chu 1-2 a hneh in an final an in pet thleng a. Tamil Nadu lam hian semi-final ah Manipur chu 2–0 a hneh in, final an in pet thleng ve bawk a. Final ah 3–2 in Services hian hnehna an chang ta a ni. Tamil Nadu pawh Santosh trophy final-ah an vawi hnih in pet thlenna niin, an la champion zo lo ve ve a, ‘tling thelh apiang pawi tih a zual’ ngei ang le. Services captain Gordon Zoramchhana hi 1999 khan S Malsawmtluanga(Mama) te nen India aiawhin Singapore Lions Cup khelin an tel ve ve a. Hemi tum hian India team hi an champion nghe nghe. Chuvang chuan Gordon-a hian experience a ngah tawh em em a, tun tum Santosh trophy a Services in a captain-na hnuai a an champion hi kan lawmpui a, Mizo te min ti hmingtha in a kal zelna tur ah ZoFooty chuan duhsakna sang ber kan hlan bawk a ni.

Mizoram leh Santosh Trophy
Santosh trophy ah hian Mizoram hian kan la tawn san ber chu Quarter-final hi ala ni mai a, rual awh ava han na duh tak em! Kan thenawm state Manipur chu vawi 1 champion tawhin, nikum lamah runners-up ni pha in kumin ah pawh semi-final an thleng a, an group ah khan Goa te an la awm mah mah. Mizoram in players tha tak tak kan neih te hi phai lama I-League khel pha an ni a, kumin ah he’ng I-League players te ho hi Santosh trophy a an khelh phal ni lo mah se, Mizoram chhungah players tha tak tak, experience pawh nei tha tak tak an ther fur.

Kumin ah pawh beiseina sang tak nen Santosh trophy kan khel a, Quarter-final awlsam takin in pet thleng mah ila,  Group-D a kan awmpui te kan ngam lo. Railyways 2-2 in kan draw a, chak zo lo mah ila hei hi result chhia ala ni lo. A dawh leh a match kan neih ah, tuna finalist ni pha Tamil Nadu 3–4 in kan hneh zo lo a. Kha inkhel ah khan 2-0 in hma kan hruai hman a, Second half tan tirh a 2–2 a an siphurh an rawn sut pawh khan buaina tur a la awm lo. Mahse  kha inkhelh ah khan thil duhawm loh tak thleng in, kan players in red card 3 lai an hmu anih kha. Kha buaina kha an mahni Tamil Nadu players tan ni mahse, kan players te khan ‘professional’ tak khan han dawh se chu khang buaina te kha kan pumpelh thei tur! Field chhung a buaina leh thil duhawm loh a thlen chungchang ah hian Mizo players te hian zir tur tam tak kan la nei ti ila a sual awm love, ‘DAWHTHEIHNA’ kan mamawh. Kan Mizo ‘thin butut’ hi professional footballer chin nih tawh chuan paih a, kan dahthat hram hram ava tul tak em. Kha match ah khan chak zawk ila chu Delhi kha phur takin kan tum anga, kan chak zawh loh paw’n  0–3 chuan min hneh kher  bik lovang. ‘Chauhthubarawh’ deuh ni mah se a uihawm em a, inzir kan la ngai tak zet.

Kan sorkar chak tak leh MFA hmalakna in tunhnai ah Mizo te’n football ah hma kan sawn nasa em em a, he’ng hmasawnna te hian nakin ah rah tha zawk ala chhuah ngei ang. Kan Mizo footballer te han tang sauh sauh teh u. He’ng level leh tournament sang china result lawmawm in neih hian Mizo mipui te, a hmei a pa, nu nau thleng in kan lawm a, Mizo nih in ti nuam leh thin. Santosh trophy pawh Mizo te’n kan la chawi ve thei ngei ang tih hi kan ‘BEISEINA’ ala ni fan.